SAN LUCAS 3 - Dios Rimashcata Quillcashcami

Bautizac Juan huillashcamanta

¹ Jatun mandac Tiberioca chunga pichca huatatami Roma llactata mandacurca. Poncio Pilatoca Judea llactata, Herodesca Galilea llactata, paipac huauqui Felipeca Iturea llactatapish, Traconite llactatapishmi mandacurca. Cutin Lisaniasca Abilinia llactatami mandacurca.

² Anaspish, Caifaspish curacunata mandac curacunami carca. Chai punzhacunapimi Diosca Zacariaspac churi Juanman shitashca pambapi huillarca.

³ Chaimantami Juanca tucui Jordán yacu cuchulla llactacunapi juchacunata Dios perdonac cashcamanta, juchayuc cashcamanta llaquirishpa, Diosman cutirishpa bautizarinamanta huillashpa purirca.

⁴ Dios ima nishcata huillac Isaías huillashpaca: «Shitashca pambapi shuc caparishpaca: “Mandac Dios shamuna ñanta allichichic. Quingu ñancunatapish derechaichic.

⁵ Huaicucunapish pamballami tucunga. Urcucunatapish urmachishpa, pamballami canga. Huishtu ñancunapish derechashca, ucu jahua ñancunapish sumacta allichishcami canga.

⁶ Tucui gentecunami Dios quishpichicuctaca ricunga” ninmi» nirca.

⁷ Achca gentecunami bautizarisha nishpa shamurca. Juanca paicunataca: —¡Culebrapac huahuacuna! ¿Pitac Dios piñarishpa, cachashca llaquimanta quishpirinata huillarca?

⁸ Grano allita pucucuc shina, Diosman cutirishca cashcataca ricuchichicyari. Ama cancunapac shungupi: “Abrahampac huahua huahuacuna cashcamantaca quishpirishunllami” nishpa yuyacuichicchu. Ñucaca ninmi: Dios cai rumicunatapish Abrahampac huahua huahuacunata ruhuanmanllami.

⁹ Hachaca ñami yura chaquipi churashca. Chaimanta tucui mana pucuc yuracunataca pitishpami, ninapi shitanga— nirca.

¹⁰ Chai gentecunaca Juantaca: —Shinashpaca, ¿imatatac ruhuashun?— nishpa tapurca.

¹¹ Chashna nicpimi Juanca: —Ishcai churanata charicca, shucta mana charicman cuchun. Micunata charicpish chai shinallatac mana charicman cuchun— nirca.

¹² Impuestota japiccuna bautizarisha nishpa shamushpaca: —Yachachic, ¿imatatac ruhuashun?— nishpami tapurca.

¹³ Chashna tapucpimi Juanca: —Impuestotaca japina cashcallata cobraichic— nirca.

¹⁴ Maijan soldadocuna tapushpaca: —Ñucanchicca, ¿imatatac ruhuashun?— nirca. Shina tapucpimi Juanca: —Ama manchachishpa, cullquita cobraichicchu. Ama cullquita japingaraicu, pitapish manchachichicchu. Mashna cullquita japicushcallahuan cushilla caichic— nirca.

¹⁵ Chai llactapi causaccunaca pi cashcata yachasha nishpami Juantaca: “¿Paichu Cristo canga?” nishpa yuyacurca.

¹⁶ Chashna nicucpimi, Juanca chaipi caccunataca: —Ñucaca yacullahuanmi bautizani, ashtahuanpish shucmi Diospac Espirituhuanpish, ninahuanpish bautizangapac shamunga. Paica ñucata atishpa, ashtahuan poderta charicmi. Ñucaca paipac ushuta huatashcallatapish mana pascaipacmi cani.

¹⁷ Trillana pambapi granota chuyayachingapacmi huairachinata apashca shayacun. Granotaca huacaichinapimi huacaichinga. Tamotaca jaicapi mana huañuc ninapimi shitanga— nirca.

¹⁸ Cai yuyachinacunahuan, shuctac rimaicunahuanmi alli huillaita huillarca.

¹⁹ Chashnallatac Juanca mandac Herodestaca paipac huauqui Felipepac huarmi Herodias-huan causacushcamantapish, shuctac mana allicunata ruhuashcacunamantapishmi sinchita rimarca.

²⁰ Herodesca tucuilaya millaita ruhuashca jahuapish, Juantaca carcelpimi churarca.

Jesusta bautizashcamanta

²¹ Juanca manarac carcelpi churacpimi, tucui gentecunata bautizacurca. Chaimantami Jesustapish bautizarca. Jesús Diosta mañacucpimi, jahua pacha pascarirca.

²² Chashnallatac Diospac Espiritumi paloma shina jahuamanta paipac jahuaman urai shamurca. Shinallatac jahua pachamanta rimashpaca: «Canmi ñuca cuyashca Churi cangui. Canllami ñucataca cushichingui» nirca.

Jesucristopac ñaupa taitacunapac shuticunami

²³ Jesús huillanata callarishpaca, ña quimsa chunga huatayuc shinami carca. Gentecuna Jesustaca Josepac churi cashcatami yuyarca. Joseca Elipac churimi carca.

²⁴ Elica Matatpac churi, Matatca Levipac churi, Levica Melquipac churi, Melquica Janapac churi, Janaca Josepac churimi carca.

²⁵ Joseca Matatiaspac churi, Matatiasca Amospac churi, Amosca Nahumpac churi, Nahumca Eslipac churi, Eslica Nagaipac churimi carca.

²⁶ Nagaica Maatpac churi, Maatca Matatiaspac churi, Matatiasca Semeipac churi, Semeica Josepac churi, Joseca Judapac churimi carca.

²⁷ Judaca Joananpac churi, Joananca Resapac churi, Resaca Zorobabelpac churi, Zorobabelca Salatielpac churi, Salatielca Neripac churimi carca.

²⁸ Nerica Melquipac churi, Melquica Adipac churi, Adica Cosampac churi, Cosamca Elmodampac churi, Elmodamca Erpac churimi carca.

²⁹ Erca Josuepac churi, Josueca Eliezerpac churi, Eliezerca Jorimpac churi, Jorimca Matatpac churimi carca.

³⁰ Matatca Levipac churi, Levica Simeonpac churi, Simeonca Judapac churi, Judaca Josepac churi, Joseca Jonanpac churi, Jonanca Eliaquimpac churimi carca.

³¹ Eliaquimca Meleapac churi, Meleaca Mainanpac churi, Mainanca Matatapac churi, Matataca Natanpac churimi carca.

³² Natanca Davidpac churi, Davidca Isaipac churi, Isaica Obedpac churi, Obedca Boozpac churi, Boozca Salmonpac churi, Salmonca Naasonpac churimi carca.

³³ Naasonca Aminadabpac churi, Aminadabca Arampac churi, Aramca Esrompac churi, Esromca Farespac churi, Faresca Judapac churimi carca.

³⁴ Judaca Jacobopac churi, Jacoboca Isaacpac churi, Isaacca Abrahampac churi, Abrahamca Tarepac churi, Tareca Nacorpac churimi carca.

³⁵ Nacorca Serugpac churi, Serugca Ragaupac churi, Ragauca Pelegpac churi, Pelegca Heberpac churi, Heberca Salapac churimi carca.

³⁶ Salaca Cainanpac churi, Cainanca Arfaxadpac churi, Arfaxadca Sempac churi, Semca Noepac churi, Noeca Lamecpac churimi carca.

³⁷ Lamecca Matusalenpac churi, Matusalenca Enocpac churi, Enocca Jaredpac churi, Jaredca Mahalaleelpac churi, Mahalaleelca Cainanpac churimi carca.

³⁸ Cainanca Enospac churi, Enosca Setpac churi, Setca Adanpac churi, Adanca Diospac huahuami carca.