SAN LUCAS 23 - Dios Rimashcata Quillcashcami

Mandac Pilatopacman Jesusta apashcamanta

¹ Chaimantaca tucui chaipi caccuna jatarishpami, Jesustaca mandac Pilatopacman aparcacuna.

² Paipac ñaupapica Jesustaca juchanchishpaca: —Cai runataca mandacta ama cazuchunmi gentecunata jatarichicucta japircanchic. Paica: “Ñucami Jatun Mandac Cristo cani” nishpami, impuestota jatun mandac Cesarman ama pagachun ninmi— nirca.

³ Chashna nicpimi Pilatoca: —¿Canchu israelcunata Jatun Mandac cangui?— nishpa tapurca. Shina nicpimi, Jesusca: —Ari, canllatac nishcanguimi— nirca.

⁴ Pilato curacunata mandac curacunatapish, gentecunatapish: —Cai runapica, ima juchata mana tarinichu— nirca.

⁵ Shina nicpipish paicunaca: —Paica tucui Judea llactacunapi, Galilea llactamanta Jerusalén llactamanmi gentecunata mana allita yachachishpa, piñanacuipi churacun— nircacuna.

Mandac Herodespacman Jesusta apashcamanta

⁶ Chashna “Galilea” nicta Pilato uyashpaca: —Cai runaca, ¿Galilea llactamantachu?— nishpa tapurca.

⁷ Herodes mandacuc Galilea llactamanta cashcamantami Jesustaca mandac Herodespacman cacharca. Chai punzhacunapica, Herodespish Jerusalenpimi carca.

⁸ Herodesca “Jesusca milagrocunatami ruhuan” nicta uyashpami, utcamanta pacha Jesusta ricunata munacurca. Shinallatac ima milagrota ruhuacta ricunatapishmi munacurca.

⁹ Herodes caita chaita tapucpipish, Jesusca imata mana nircachu.

¹⁰ Curacunata mandac curacunapish, mandashcacunata yachachiccunapish Jesusta juchanchishpami chaipi carcacuna.

¹¹ Herodespish, paipac soldadocunapish Jesusta burlashpa, asishpami, jatun mandac churana sumac churanata churachirca. Chashnami Pilatopacman cutichishpa cacharca.

¹² Chai punzhamantami Pilatoca Herodes-huan alli tucurca. Ñaupamanca piñanacushcami carca.

Jesusta huañuchingapac juchanchishcamanta

¹³ Pilato curacunata mandac curacunatapish, mandaccunatapish, tucui gentecunatapish tandachishpaca:

¹⁴ —Cai runataca ‘Gentecunatami mana allita yachachicun’ nishpami, juchanchishpa apamushcanguichic. Cai runata cancunapac ñaupapi tapushpaca, ima cancuna juchanchishcata mana tarinichu.

¹⁵ Herodespish manallatac ima juchata tarircachu, chaimantami cutichishpa cachashca.

¹⁶ Chaimanta macachishpallami cacharigrini— nirca.

¹⁷ Cada huatami Pascua punzhapica shuc prezuta cacharic carca.

¹⁸ Tucui chaipi caccunaca shuc shinalla caparishpaca: —¡Chai Jesustaca huañuchilla! ¡Barrabasta cachari!— nishpa caparirca.

¹⁹ Barrabasca mandac-huan piñarishpa gentecunata jatarichishcamanta, huañuchishcamantami carcelpi carca.

²⁰ Pilatoca Jesusta cacharina yuyaihuan cashpami, cutin gentecunata tapurca.

²¹ Shina tapucpipish tucuimi: —¡Chacatailla, chacatailla!— nircacuna.

²² Pilato quimsa cutin tapushpaca: —Paica, ¿ima mana allitatac ruhuashcayari? Paita huañuchingapacca, ima juchata mana tarinichu. Paitaca macachishpallami cacharigrini— nirca.

²³ Gentecunaca “chacatailla” nishpa ashtahuan caparirca. Chaimantami paicuna munashcata pactachirca.

²⁴ Chaimantami Pilatoca paicuna munashcata pactachishpa, Jesusta huañuchichun mandarca.

²⁵ Cutin, mandac-huan piñarishpa gentecunata jatarichishcamanta, huañuchishcamanta prezu cac runataca cacharircami, ashtahuanpish Jesustaca gentecuna munashca ruhuachunmi curca.

Jesusta chacatashcamanta

²⁶ Jesusta chacatangapac apacushpami, campomanta shamucuc Cirene pueblomanta Simonhuan tuparca. Paitami Jesuspac huashata cruzta apachishpa pusharca.

²⁷ Jesuspac huashataca achca gentecunami caticurca. Huarmicunapish Jesusta llaquishpami llaquilla huacashpa caticurca.

²⁸ Jesús chai huacacuc huarmicunata tigrarishpa ricushpaca: —Jerusalén huarmicunalla, ama ñucamantaca huacaichicchu, ashtahuanpish cancunamanta, cancunapac huahuacunamanta huacaichic.

²⁹ Chaica: “Huahuata mana chari pudic, mana huicsayuc tucuc, mana chuchuchic huarmicunapish cushicuichic” nina punzhacuna chayamungami.

³⁰ Chaimantami urcucunataca: “Ñucanchic jahuapi tuñiri” cutin lomacunataca: “Ñucanchicta tapai” ningacuna.

³¹ Verde yura shina ñucata cashna ruhuashpaca, chaquishca yura shina cancunatacarin, ¿imatachari ruhuanga?— nirca.

³² Ishcai millai runacunatapish Jesus-huan pacta chacatangapac aparcacuna.

³³ Calavera nishca urcuman chayashpaca, Jesusta chacatarcami. Ishcai millai runacunatapish, shuctaca alli maquiman, shuctaca lluqui maquimanmi chacatarca.

³⁴ Chashna chacatacpipish Jesusca: —Ñuca Taitalla, cai gentecunaca ima ruhuacushcata mana yachanchu. Chaimanta perdonai— nirca. Cutin Jesuspac churanacunata suerteta ruhuashpami chaupinacurca.

³⁵ Gentecunaca Jesusta chaparacurcami. Cutin, mandaccuna burlashpaca: —Shuccunataca quishpichircami. Dios cachashca Cristo cashpaca, paillatac quishpirichun— nircami.

³⁶ Soldadocunapish vinagreta ubiachisha nishpa burlashpaca:

³⁷ —¡Can, israelcunata Jatun Mandac cashpaca, canllatac quishpiriyari!— nirca.

³⁸ Jesuspac uma jahua caspipica, griego rimaipi, latín rimaipi, hebreo rimaipi: «Caica Israelcunata Jatun Mandacmi» nishpami, quillcashca carca.

³⁹ Chacatashca millai runaca: —¡Can Cristo cashpaca, canllatac quishpirishpa, ñucanchictapish quishpichiyari!— nishpami rimarirca.

⁴⁰ Shina nicpi, caishuc millai runaca: —Canpish pai shinallatac llaquita apacushpapish, ¿manachu Diosta manchangui?

⁴¹ Ñucanchicca millaita ruhuashcamantaca llaquita apanatacmi canchic, ashtahuanpish cai runaca ima millaita mana ruhuashcachu— nirca.

⁴² Shina nishpami chai runaca Jesustaca: —Can mandangapac shamushpaca, ñucata yuyaringuiyari— nirca.

⁴³ Chashna nicpimi Jesusca: —Cunanllatacmi jahua pachapi ñucahuan cangui. Chaica chashnatacmi canga— nirca.

Jesús huañushcamanta

⁴⁴ Chaupi punzhamanta quimsa horas chishicamanmi, tucui cai pachaca amsayarca.

⁴⁵ Intipish amsayarcami. Diosta mañana huasi ucupi cac jatun pañopish, jahuamanta uraiman chaupita lliquirircami.

⁴⁶ Jesús sinchita caparishpaca: —Taitalla, cambac maquipimi ñuca espirituta mingani— nirca. Shina nishpaca huañurcallami.

⁴⁷ Mandac soldado chaita ricushpa, Diosta “allimari cangui” nishpaca: —Cai runaca cashcata ruhuacmi cashca— nirca.

⁴⁸ Tucui chaipi cac gentecunapish chaita ricushpaca, llaquihuan shungupi huactarishpami cutircacuna.

⁴⁹ Jesuspac tucui ricsishcacunapish, Galilea llactamanta Jesus-huan shamuc huarmicunapish carumantami chai tucuitaca ricucurca.

Jesusta enterrashcamanta

⁵⁰ Judea llacta Arimatea pueblomanta José shuti runami tiyarca. Paica israelcunata mandacpuramanta cashcata ruhuac runami carca.

⁵¹ Paipish Dios mandacucta ricusha nishpami shuyacurca. Jesusta japichingapac yuyarishcatapish, imata ruhuashcatapish mana allichu nicmi carca.

⁵² Paimi mandac Pilatopacman rishpa, Jesuspac cuerpota enterrangapac mañarca.

⁵³ Jesuspac cuerpota cruzmanta uricuchishpa pañohuan pillushpami, rumi quingrai jutcushca sepulturapi churarca. Chaipica pitapish manarac enterrashcami carca.

⁵⁴ Chaica samana punzhapac allichirina punzha chishimi carca.

⁵⁵ Galilea llactamanta Jesus-huan shamushca huarmicunapish catishpa rishpami, Jesuspac cuerpota ima shina sepulturapi churacta ricucurca.

⁵⁶ Chai huarmicuna huasiman cutimushpaca, mishquilla ashnacuctami Jesuspac cuerpopi churangapac allichirca. Samana punzha chayamucpica, Dios mandashca shinami samarirca.