SAN LUCAS 22 - Dios Rimashcata Quillcashcami

Jesusta huañuchingapac yuyarinacushcamanta

¹ Levadura illac tandata micuna Pascua fiestami chayamucurca.

² Curacunata mandac curacunapish, mandashcacunata yachachiccunapish gentecunata manchashcamantami, Jesusta ima shina huañuchinata yuyarinacurca.

³ Chashna cacpimi, Jesuspac chunga ishcai yachacuccunapuramanta Judas Iscariotepac shungupi Satanasca yaicurca.

⁴ Judasmi curacunata mandac curacunahuan, Diosta mañana huasita cuidaccunahuan Jesusta ima shina japichinata parlangapac rirca.

⁵ Chaimantami paicunaca cushicushpa, Judasman cullquita pagashun nircacuna.

⁶ Paicuna cullquita cushun nicpica, Judasca ari nishpami, Jesusta pi mana yachacpi, pacalla japichinata yuyarishpa puricurca.

Apunchic Jesús pai huañunata yuyarishpa micushcamanta

⁷ Levadura illac tandata micuna punzhami chayamurca. Chai punzhapimi Pascua fiestapac pactalla ovejata huañuchishpa micuna carca.

⁸ Chaimantami Jesús Pedrotapish, Juantapish cayashpaca: —Richic, ñucanchic Pascua fiesta micunata allichigrichic— nirca.

⁹ Shina nicpica paicunaca: —¿Maipitac allichigrichun ninguiyari?— nirca.

¹⁰ Shina nicpimi Jesusca: —Cancuna puebloman chayacushpaca, yacu puñu aparishca shuc runahuanmi tupanguichic. Pai mai huasiman yaicungacaman catishpa ringuichic.

¹¹ Shina rishpa huasiyuctaca: “Yachachicca: ‘¿Maijan ucupitac ñuca yachacuccunahuan Pascua fiesta micunata micusha?’ ninmi” ninguichic.

¹² Chashna nicpimi, chai huasiyucca sumacta allichishca jatun ucuta altopi ricuchinga. Chaipi micunata allichinguichic— nirca.

¹³ Yachacuccuna rishpaca, Jesús nishca shinallatacmi tarirca. Chaipimi Pascua fiesta micunata allichirca.

¹⁴ Micuna horas chayamucpimi, Jesusca paipac apostolcunahuan micungapac mizapi tiyarirca.

¹⁵ Chaipimi Jesusca: —¡Ñucaca manarac llaquita apashpami, cancunahuan Pascua fiestata micunata munacurcani!

¹⁶ Ñucaca ninimi: Cai micunataca Dios mandacucpi micungacaman manatac micushachu— nirca.

¹⁷ Jesús vaso vinota japishpa, Diosta pagui nishpaca: —Caica japichic, asha ashata ubiaichic.

¹⁸ Ñucaca ninimi: Cunanmanta pacha cai uvas vinotaca, Dios mandana punzhacaman manatac ubiashachu— nirca.

¹⁹ Shinallatac tandata japishpa Diosta pagui nishpa, chaupishpa chaupishpa cushpaca: —Caica, cancunamanta cushca ñuca cuerpomi. Ñucata yuyarishpa, cashna ruhuacunguichiclla— nirca.

²⁰ Micushca quipaca, Jesús vaso vinota japishpaca: —Cai vaso vinoca, cancunamanta jichana ñuca yahuarmi. Chaihuanmi Diosca shuc mushuc ari ninacuita ruhuagrin.

²¹ Ashtahuanpish ñucata japichic runaca, ñucallahuantacmi cai mizapi micucun.

²² Runa Tucungapac shamushca ñucaca, Dios munashca shinami huañusha, ashtahuanpish ñucata japichic runalla, ¡imachari tucunga!— nirca.

²³ Chaimantami paicunaca ‘¿Maijantac paita japichicca canchic?’ nishpa tapunacurca.

Serviccuna tucuita yalli cashcamanta

²⁴ Jesuspac yachacuccunapurami maijan ashtahuan alli mandac canamanta rimanacurca.

²⁵ Chashna rimanacucucpimi, Jesusca: —Jatun llactacunata mandaccunallami, paicuna munashcata ruhuachishpa mandan. Shinallatac mandaccunallami: ‘Allita mandacun’ nichunmi munan.

²⁶ Cancunaca ama chashna canguichicchu. Ashtahuanpish cancunapurapi maijan alli nishca casha nishpaca, quipa huiñaicuna shina cachun. Mandac cashpapish, servic runa shina cachun.

²⁷ ¿Maijantac ashtahuan alli nishcaca? ¿Mizapi micungapac tiyaric, mana cashpaca, micunata cushpa servic? ¿Manachu mizapi tiyaric ashtahuan alli nishca? Chashna cacpipish, ñucaca servic shinallami cancunapurapica cani.

²⁸ Cancunaca ñuca mai llaquihuan cacpipish, ñucahuanmi carcanguichic.

²⁹ Chaimantami ñuca Taita ñucata Jatun Mandacta ruhuashca shina, cancunatapish jatun mandacta ruhuasha.

³⁰ Cancunaca ñuca mandacucpimi, mizapi tiyarishpa ñucahuan micunguichic, ubianguichic. Mandashpa tiyarinapi tiyarishpami, Israelpac chunga ishcai aillucunata mandanguichic— nirca.

Pedro Jesusta negana cashcamanta

³¹ Shinallatac Jesusca: —Simón, Simón, Satanasca trigota shushuc shina ruhuangapacmi, Cancunataca mañashca.

³² Chashna cacpipish, can sinchi cric cachunmi ñucaca Diosta mañarcani. Can ñucaman cutirishpaca, ñucata caticcunamanpish ñucata catichun alli yuyaita cungui— nirca.

³³ Chaimantami Pedroca: —Apunchic Jesús, canta carcelman apacpipish, canhuanmi risha. Huañuna cacpipish, canhuanmi huañusha— nirca.

³⁴ Chashna nicpimi Jesusca: —Pedro, canca cunan tutallatacmi gallo manarac cantacpi, quimsa cutin ‘mana ricsinichu’ nishpa negangui— nirca.

Jesús llaquita apanaca chayamushcamanta

³⁵ Jesús paicunata tapushpaca: —Ñuca cancunata mana cucayuhuan, mana cullquihuan, mana ushutahuan cachacpica, ¿ima faltarcachu?— nirca. Shina nicpimi yachacuccunaca: —Mana ima faltarcachu— nircacuna.

³⁶ Shina nicpimi Jesusca: —Cunanca maijanpish cucayutapish, cullquitapish charicca, apaichiclla. Maijanpish espadata mana charicca, churanata catushpa randichic.

³⁷ Ñucaca ninimi: Ñuca ima tucunamanta Dios quillcachishcapica: “Juchayuc runacuna shinami huañunga” nishcaca, pactanatacmi can. Ñucamanta Dios quillcachishcaca pactanami can— nirca.

³⁸ Chashna nicpimi yachacuccunaca: —Apunchic Jesús, caipimi ishcai espadacuna tiyan— nirca. Chashnacpimi Jesusca: —Upallai— nirca.

Jesús Getsemaní huertapi Diosta mañashcamanta

³⁹ Jesús chaimanta llucshishpaca, Olivos urcumanmi ric cashca shinallatac rirca. Yachacuccunapish catishpami rirca.

⁴⁰ Ña chaiman chayashpaca: —Mana pandachishca cangapacca, Diosta mañaichic— nirca.

⁴¹ Chashna nishpami yachacuccunapacmanta ashata caruyashpa, Diosta mañangapac cungurirca.

⁴² Pai mañashpaca: «Ñuca Taitalla, can munashpaca, cai jayac ubiana shina llaquita ñucamanta anchuchiyari. Shina cacpipish, ama ñuca munashca shina ruhuaichu, ashtahuanpish can munashcata ruhuai» nirca.

⁴³ Chashna mañacucpimi, jahua pachamanta ángel shamushpa sinchiyachirca.

⁴⁴ Jesús yalli llaquihuan cashpami, ashtahuan Diosta mañarca. Jumbipish yahuar shinami pambaman shuturca.

⁴⁵ Diosta mañashpa jatarishpaca yachacuccunapacmanmi cutirca. Yachacuccuna llaquihuan cashcamanta sueñucucpimi tuparirca.

⁴⁶ Chaimantami paicunataca: —¿Ima nishpatac sueñucunguichic? Mana pandachishca cangapacca Diosta mañaichic— nirca.

Jesusta japishcamanta

⁴⁷ Jesús nicucllapitacmi achca gentecuna chayarca. Paipac chunga ishcai yachacuccunapuramanta Judasmi ñaupashpa chayarca. Pai cuchuyashpami Jesusta mucharca.

⁴⁸ Chaimantami Jesusca: —Judas, canca Runa Tucungapac shamushca ñucataca, ¿muchashpachu japichingui?— nirca.

⁴⁹ Paihuan cac yachacuccuna Jesusta japicucta ricushpaca: —Apunchic Jesús, ¿espadahuan macanacushunchu?— nirca.

⁵⁰ Jesus-huan caccunamanta shucmi espadahuan huactashpa, curacunata jatun mandac curapac servicpac alli lado ringrita pitirca.

⁵¹ Chashna piticpimi Jesusca: —Ña chailla, saquichic— nirca. Chaimantami chai runapac ringri chugripi tuparishpa, alliyachirca.

⁵² Jesús, paita japingapac shamuc curacunata mandac curacunatapish, Diosta mañana huasita cuidaccunata mandaccunatapish, cunac yuyaccunatapish rimashpaca: —¿Ñucataca shuhuacta shinachu espadacunahuan, caspicunahuan japingapac shamunguichic?

⁵³ Punzhantami Diosta mañana huasipi cancunahuanca carcani. Chashna cacpipish, mana japircanguichicchu. Cunanca ñucata japina horas chayamucpimi, amsapi mandacuc supai yuyaita cucpi, ñucataca japinguichic— nirca.

Pedro Jesusta negashcamanta

⁵⁴ Jesusta japishpaca, curacunata jatun mandac curapac huasimanmi aparirca. Pedroca caru carullatami caticurca.

⁵⁵ Pungu pambapimi ninata japichishpa, muyundita tiyarishpa masharicurca. Pedropish paicunahuanmi masharicurca.

⁵⁶ Pedro masharishpa tiyacucpi, shuc servic huarmi paita alli ricushpaca: —Cai runapish Jesus-huan puricmi carca— nirca.

⁵⁷ Chashna nicpimi Pedroca: —Marmi, mana ricsinichu— nirca.

⁵⁸ Chai quipalla, shuc runa Pedrota ricushpaca: —Canpish chai runacunapurami cangui— nirca. Shina nicpimi Pedroca: —Uyai, mana paicunapurachu cani— nirca.

⁵⁹ Shuc hora caipac shinapi, shuc runaca: —Cai runapish Jesus-huan puricmi carca. Paipish Galilea llactallamantatacmi— nirca.

⁶⁰ Chashna nicpipish, Pedroca: —Imamantapish nicunguichari, mana entendinichu— nirca. Pedro chashna nicucpimi, ñapish galloca cantarca.

⁶¹ Chashna cantacpimi, Apunchic Jesusca Pedrota tigrarishpa ricurca. Chashna ricucpimi: «Manarac gallo cantacpimi, quimsa cutin ñucataca negangui» nishpa, Apunchic Jesús nishcata yuyarirca.

⁶² Chaimantami Pedroca canzhaman llucshishpa munai huacarca.

Jesusta burlashpa asishcamanta

⁶³ Jesusta cuidac runacunaca pucllashpa paita huactarca.

⁶⁴ Ñahuita pañohuan huatashpa, huactashpaca: —¿Maijantac huactanchic? ¡Huillai!— nircami.

⁶⁵ Shinallatac Jesustaca munai camishpami imatapish rimarcacuna.

Mandaccunapuralla tandanacushcapacman Jesusta apashcamanta

⁶⁶ Ña punzhayacpimi, Israel curacunata mandac curacunapish, cunac yuyaccunapish, mandashcacunata yachachiccunapish tandanacushca mandaccunapacman Jesusta aparca. Chaiman apacpica:

⁶⁷ —¿Canchu Cristo cangui? Huillai— nirca. Chashna nicpimi Jesusca: —Ari nicpipish, cancunaca mana cringuichicchu.

⁶⁸ Cancunaman ñuca tapucpipish, cancunaca mana huillanguichicchu, shinallatac mana cacharinguichicchu.

⁶⁹ Shina cacpipish, cunanmanta pachami, Runa Tucungapac shamushca ñucaca poderyuc Diospac alli maquiman tiyacusha— nirca.

⁷⁰ Chashna nicpica, tucui mashna tapushpaca: —Shinashpaca, ¿canchu Diospac Churi cangui?— nircacuna. Shina tapucpimi paica: —Ari, cancuna nishca shinallatacmi cani— nirca.

⁷¹ Shina nicpimi paicunaca: —Paipac shimimantami uyashcanchic. Chaimanta mana piman ashtahuan tapunachu canchic— nircacuna.