SAN LUCAS 21 - Dios Rimashcata Quillcashcami

Huaccha viuda huarmi ofrendata churashcamanta

¹ Jesusca Diosta mañana huasipi chayuccuna ofrendata churacuctami ricurca.

² Shuc huaccha viudapish, ishcai ashalla valic cullquita churacuctami ricurca.

³ Chaimantami Jesusca yachacuccunataca: —Huaccha viudami, caishuccunamanta yalli ofrendata cushca. Chaica chashnatacmi.

⁴ Tucui chayuccunami puchushcallata ofrendata Diosman cuncuna, ashtahuanpish cai huarmica paipac causaipac charishcatami cushca— nirca.

Diosta mañana huasita urmachinamanta

⁵ Tauca runacuna Diosta mañana huasita sumac rumicunahuan ruhuashcamanta, pircapish sumacta allichishcamanta parlanacucucpimi,

⁶ Jesusca: —Tucui urmachishca, rumillapish mana pircashca saquirina punzhacunami chayamucun— nirca.

Cai pacha manarac tucuricpi llaquicuna tiyanamanta

⁷ Chashna nicpimi yachacuccunaca: —Yachachic, ¿ima punzhatac chaica tucungayari? Ña chashna tucungapacca, ¿imacunatac ricuringayari?— nirca.

⁸ Shina tapucpimi Jesusca: —Achcacunami ñuca shutipi shamushpa: “Ñucami Cristoca cani” ningacuna. Maijanca: “Cunanmi pai cutimuna punzhaca chayamun” ningami. Pacta paicunata pacta catinguichicman, ashtahuanpish alli yuyaihuan puringuichic.

⁹ Cancunaca llactacunapura macanacuitapish, llacta ucupi macanacuitapish uyanguichicmi. Ama mancharinguichicchu. Chai llaquicunaca cai pacha manarac tucuricpi tiyanallatacmi can. Chashna tucucpipish, cai pachaca manarac tucuringachu— nirca.

¹⁰ Shinallatac Jesusca: —Llactacunapurami macanacunga. Jatun mandaccunapurapish macanacungami.

¹¹ Maipica, jatun allpa chucchuimi tiyanga. Yalli yarcaipish, ungüicunapish tiyangami. Jahua cielopica, jaicapi mana ricushcacunami ricuringa. Yalli manchaimi tiyanga.

¹² Manarac caicuna tucucpimi, ñucata caticushcamantaca piñashpa prezunga. Cancunata juchanchishpami, tandanacuna huasicunaman apanga. Carcelpipish churangacunami. Llactacunata jatun mandaccunapacmanpish, quiquin llactata mandaccunapacmanpish apangami.

¹³ Chashna apacpimi, paicunamanpish ñucamanta huillanguichic.

¹⁴ Ama paicunapac ñaupapica: “¿Imatashi nishun?” nishpa, chai yuyailla canguichicchu.

¹⁵ Ñucallatacmi cancunamanca rimana alli yuyaicunatapish cusha. Chashna allita rimacpica, cancunata piñaccunaca mana imata ni pudishpa, upalla saquiringallami.

¹⁶ Cancunataca ricsishcacunallatac, familiacunallatac, huauquicunallatac, taita mamacunallatacmi huañuchichun japichinga. Chashna japichicpica, maijan cancunataca huañuchingami.

¹⁷ Ñucata caticushcamantami, tucui gentecunapac piñashca canguichic.

¹⁸ Chashna cacpipish cancunapac shuc uma acchallapish mana chingaringachu.

¹⁹ Chashna llaquichicucpipish, tucui shunguhuan catirashpaca quishpiringuichicmi.

²⁰ Jerusalén pueblota soldadocuna muyunacushpa shayacucta ricushpaca, tucui chingachishca cashca shinata yachanguichic.

²¹ Judea llactapi caccunaca urcucunapi miticugrichun. Jerusalenpi caccunapish llucshishpa richun. Chagrapi caccunapish ama cutichun.

²² Chai punzhacunaca, Dios quillcachishca shina llaquichina punzhacunami canga.

²³ Chai punzhacunaca Dios cai llactapi causaccunata nina japiric shina piñarishpa llaquichinami canga. ¡Chai punzhacunapi huicsayuc huarmicunalla, chuchucuc huahuayuc huarmicunalla, imachari tucunga!

²⁴ Maijantaca espadahuanmi huañuchinga. Maijantaca huatashpami, tucui llactacunaman prezu apanga. Dios llaquichichun saquishca punzhacuna pactangacamanmi, Jerusalenpi causaccunataca shuctac llactacunaca paicuna munashcata ruhuashpa llaquichinga.

Apunchic Jesús ima shina cutimunamanta

²⁵ Intipipish, quillapipish, lucerocunapipish jaicapi mana ricushcacunami ricuringa. Cutin cai pachapica mama cucha yallita cuyurishpa huajiacta ricushpami yallita mancharishpa, yuyaita chingachinga.

²⁶ Cai pachapi yalli llaquicuna catipi shamucpi, jahua cielopi tiyaccunapish chucchucpimi, gentecunaca yallita mancharishpa, yuyaita chingachinga.

²⁷ Chashna tucucpica, Runa Tucungapac shamushca ñuca poderhuan, sumaimana achiclla cashcahuan achicyachishpa, puyupi shamucuctami ricunga.

²⁸ Chai tucui llaquicuna callaricpica, Dios cancunata quishpichigricushcamanta huichaita ricushpa, cushicuihuan chaparacuichic— nirca.

²⁹ Jesús cai chimbapurashca parlohuan parlashpaca: «Higo yurata, mana cashpaca ima yuracunatapish ricushpa alli yuyarichic.

³⁰ Chai yuracunapi pangacuna jundarimucta ricushpaca, usyai punzhacuna chayamucushcatami cancunallatac yachanguichic.

³¹ Chai shinallatac cancunapish caicuna pactamucucta ricushpaca, Dios mandana punzhacuna ña chayamucushcatami yachanguichic.

³² Cunan punzha causaccuna cai ñuca huillashcacunaca tucui pactangacaman manarac huañungachu. Chashnami canga.

³³ Cai pachapish, jahua pachapish tucuringami. Ashtahuanpish ñuca huillashcacunaca pactacungallami.

³⁴ Cancunallatac alli yuyarichic. Pacta machanallapi, micunallapi, cai pachapi imatapish charinallapi yuyashpa causacunguichicman. Pacta cancuna mana yuyashca horas chai punzhaca chayamunman.

³⁵ Cai pachapi causaccunataca, shuc tucllahuan japic shinami chai punzhaca chayamunga.

³⁶ Chaimanta cancunaca allichirishca, ña rinalla shinami cana canguichic. Chai tucui llaquimanta quishpiringapacca, Runa Tucungapac shamushca ñucapac ñaupapi alli ricuringapac Diosta mañaracuichic» nirca.

³⁷ Jesusca punzhaca Diosta mañana huasipimi yachachic carca. Tutaca Olivos urcumanmi ric carca.

³⁸ Tucui gentecunami Jesús yachachishcata uyangapac utca jatarishpa, Diosta mañana huasiman shamuc carca.