SAN LUCAS 20 - Dios Rimashcata Quillcashcami

Jesusta pihuan milagrota ruhuacushcata tapushcamanta

¹ Shuc punzha Jesús Diosta mañana huasipi alli huillaimanta yachachicucpimi, Israel curacunata mandac curacunapish, mandashcacunata yachachiccunapish, cunac yuyaccunapish chayarca.

² Paicunaca: —¿Pipac poderhuantac caicunata ruhuacungui? ¿Pitac chashna ruhuachun mandarca?— nirca.

³ Shina nicpimi Jesusca: —Ñucapish cancunaman tapusha. Cancunapish huillaichic.

⁴ ¿Pitac Juantaca bautizachun cacharca? ¿Dios, mana cashpaca, runacunachu cacharca?— nirca.

⁵ Chashna nicpi, paicunapura parlanacushpaca: —Ñucanchic: “Diosmi cachashca” nicpica: “¿Ima nishpatac Juan huillashcata mana crircanguichic?” ningami.

⁶ Cutin: “Runacunallami cachashca” nicpica, gentecuna ñucanchicta rumicunahuan shitashpa huañuchingami. Chaica, tucui gentecunami Juantaca “Dios ima nishcata huillacmi” nincuna— ninacurca.

⁷ Chaimantami paicunaca: —Pi cachashcata mana yachanchicchu— nirca.

⁸ Chashna nicpimi Jesusca: —Shinashpaca, ñucapish pipac poderhuan ruhuacushcataca mana huillashachu— nirca.

Millaita ruhuaccunamanta chimbapurashpa parlashcamanta

⁹ Jesús tucui chaipi cac gentecunaman yuyaita japina parlohuan parlashpaca: «Shuc runami uvas chagrata ruhuashpa, maijan runacunaman partir cushpa unaipi cutimungapac caru llactaman rirca.

¹⁰ Uvas pallana punzha chayamucpimi, chagrayuc runaca paita servicta chaupimuchun cacharca. Chai servic runa chayacpica, partedariocunaca macashpa, imata mana cushpami cacharca.

¹¹ Chaimantami chagrayucca cutin shuc servicta cacharca. Chai shinallatacmi paitapish camishpa, imata mana cushpa, macashpa cacharca.

¹² Cutinllatacmi shuc servicta cacharca. Chai shinallatacmi paitapish chugriricta macashpa, chagramanta llucchishpa cacharca.

¹³ Chaimantami chagrayuc runaca: “Cunanca, ¿imatatac ruhuashayari? Ñuca cuyashca churita cachasha. Paita ricushpaca, manapishchari imata ruhuanga” nirca.

¹⁴ Partedariocuna paita ricushpa, parlanacushpaca: “Paimi, paipac taita charishcacunataca tucui japinga. Ñucanchic pai japina allpahuan saquiringapac, huañuchishunchic” ninacurca.

¹⁵ Chashna ninacushpami, chagramanta llucchishpa huañuchirca. Chagrayuc runa shamushpaca, ¿chai huañuchiccunataca imatashi ruhuanga?

¹⁶ Pai shamushpaca, partedariocunata huañuchishpami, chagrata quichushpa, shuccunaman cunga» nirca. Chashna nicta uyashpaca, gentecunaca: —¡Amatapish caica tucuchun!— nirca.

¹⁷ Jesús paicunata ricushpaca: —Dios quillcachishcapica: “Huasita ruhuaccuna mana nishca, shitashca rumillatacmi, huasita ruhuangapac callaripi churana, tucuimanta yalli rumi tucushca” ninmi. Caimantaca, ¿imatatac yuyanguichic?

¹⁸ Maijanpish chai rumipi mitcaricca, polvoringami. Shinallatac chai rumi maijanpac jahuapi urmashpaca ñutuchingami— nirca.

Impuestomanta tapushcamanta

¹⁹ Curacunata mandaccunapish, mandashcacunata mandaccunapish “Jesusca chimbapurashca parlohuan parlashpaca ñucanchictami rimacun. Cunancarin, huañuchichingapac japichishun” nircacuna. Shina ninacushpapish, gentecunata manchashpami, mana imata ruhuarcacuna.

²⁰ Chaimantami ima mana allita nicpica, juchanchishpa llactata mandacman japichingapac, shuc cashcata ruhuac runacunata tapuchun cacharca.

²¹ Paicuna Jesustaca: —Yachachic, canca mana ñahuita ricushpalla, yachachicmi cangui. Gentecuna Dios munashca shina causachunmi, mana llullashpa yachachicungui.

²² ¿Jatun mandac Cesarmanca impuestota paganachu, mana cashpaca mana?— nishpa tapurca.

²³ Ashtahuanpish paicuna mana alli yuyaihuan tapucushcata yachashpami, Jesusca:

²⁴ Cullquita ricungapac apamuichic— nirca. Paicuna ricuchicpica: —Cai cullquipica, ¿pipac ñahuitac, pipac shutitac?— nirca. Shina tapucpica: —Jatun mandac Cesarpac ñahuimi— nirca.

²⁵ Chashna nicpimi Jesusca: —Shinashpaca jatun mandac Cesarpac cashcataca, jatun mandac Cesarllamantac cuichic. Diospac cashcataca, Diosllamantac cuichic— nirca.

²⁶ Gentecunapac ñaupapi Jesús tucuita allita huillacpimi, paicunaca imata mana juchanchi pudishpa, yallita mancharishpa saquirirca.

Huañushcacuna causarinamanta tapushcamanta

²⁷ Huañushca causarinata mana cric maijan saduceocuna Jesuspacman cuchuyashpaca:

²⁸ —Yachachic, chaica Moisés quillcashpaca: “Shuc runa manarac huahuata charishpa huañucpica, chai huañushcapac huauquillatac chai viuda huarmihuan cazarashpa, huañushca huauquipac randi huahuata charichun” nicunmi.

²⁹ Canchis huauquicunami tiyarca. Chai canchis huauquimantaca punta huauquimi cazarashpa, manarac huahuata charishpa huañurca.

³⁰ Quipa huauqui chai huarmihuan cazarashpapish, manarac huahuata charishpami huañurca.

³¹ Ashtahuan quipa huauqui chai huarmihuan cazarashpapish manarac huahuata charishpami huañurca. Chashnami canchis huauquicuna manarac huahuata charishpa huañurca.

³² Quipaca huarmipish huañurcami.

³³ Canchis huauquicunahuantac cazarashca cashcamantaca, huañushcacuna causarina punzhapica, ¿pipac huarmitac canga?— nirca.

³⁴ Chashna tapucpimi Jesusca: —Cai pachallapimi caripish, huarmipish cazaran, shinallatac cazarachincuna,

³⁵ ashtahuanpish huañushcacuna causari punzhapica, maijanpish huiñai causaiman yaicuccunaca, caripish, huarmipish mana cazarangachu, shinallatac mana cazarachingacunachu.

³⁶ Dios causachishca cashcamantaca, pai acllashcacunami canga. Shinallatac angelcuna shinami canga. Chaimanta paicunaca ña mana huañungachu.

³⁷ Huañushcacuna causarinamanta Dios rupacuc zarza yuramanta rimashpaca: “Ñucaca Abrahampac, Isaacpac, Jacobopac Diosmi cani” nishcami.

³⁸ Diosca mana huañushcacunapac Dioschu, ashtahuanpish causaccunapac Diosmi— nirca.

³⁹ Mandashcacunata yachachicpuramanta maijancunaca: —Yachachic, allitami ningui— nirca.

⁴⁰ Pi imata mana ashtahuan tapurcachu.

Cristoca mandac Davidtapish Mandac cashcamanta

⁴¹ Chaimantami Jesusca: —¿Ima nishpatac Cristotaca: “Mandac Davidpac aillupurami canga” nincuna?

⁴² Chaica Davidllatacmi Salmopica: “Mandac Diosca ñucata Mandactaca: ‘Canta piñaccunata

⁴³ cambac chaqui sarunapi churangacaman, canca ñuca alli maquiman tiyacuilla’ nin” nirca.

⁴⁴ Davidllatac Cristotaca: “Ñucata Mandacmi” nicpica, ¿ima shinatac Cristoca Davidpac aillupurallaca cangayari?— nirca.

Mandashcacunata yachachiccunata rimashcamanta

⁴⁵ Tucui chaipi caccuna uyacucpimi, Jesusca paipac yachacuccunataca:

⁴⁶ —Mandashcacunata yachachiccuna yachachishcamanta cuidaringuichic. Paicunaca pambata aisacuc suni churanata churarishcami purinata munancuna. Plazacunapi tupaccuna paicunata manchaihuan alabachunmi munancuna. Paicunaca mai tandanacuna huasicunapipish, punta alli tiyarinacunapi tiyarinami munan. Shinallatac micungapacpish, punta alli tiyarinata mashcashpami tiyarin.

⁴⁷ Viudacunapac huasicunatapish quichuccunami. Chashna ruhuashpaca, alli ricuringapacmi unaita Diosta mañac tucun. Chashna ruhuashcamantaca, paicunallatacmi ashtahuan llaquita apanga— nirca.