SAN LUCAS 2 - Dios Rimashcata Quillcashcami

Jesús huacharishcamanta

¹ Chai punzhacunapica Roma llactata jatun mandac Augustomi, tucui llactapi causaccuna shuticunata quillcachichun mandarca.

² Chai quillcachinaca, Cirenio runa Siria llactata mandacucpimi callarirca.

³ Tucui gentecunami paicuna huacharishca llactapi quillcaringapac rina carca.

⁴ Joseca Davidpac huahua huahuapura cashcamantami, Galilea llacta Nazaret pueblomanta ñaupa mandac Davidca huacharishca Judea llacta Belén puebloman rirca.

⁵ Chaimanca paihuan cazarangapac ari nishca Mariahuanmi, shutita quillcachingapac rirca. Mariaca huicsa jundami carca.

⁶ Paicuna Belenman chayacpimi, María sajuarinaca pactarca.

⁷ Pozana huasi mana pactashcamantami, paipac punta cari huahuataca huagracuna shayana ucupi sajuarirca. Chai huahuataca maitushpami, ucsha jahuallapi sirichirca.

Angelcuna michiccunaman huillashcamanta

⁸ Chai Belén pueblo lado pambapica, michiccunami ovejacunata tuta cuidacurca.

⁹ Chaipimi Dios cachashca angelca Diospac sumaimana achic nicuc-huan ñapish cungailla paicunapac muyundita achicyachirca. Chaimantami michiccunaca yallita mancharirca.

¹⁰ Chaimantami angelca: —Ama mancharichicchu. Cancunaman alli huillaita huillangapacmi shamuni. Caita uyashpaca, tucuimi yallita cushicunga.

¹¹ Cunanmi David huacharishca Belén pueblopi Quishpichic huacharishca. Paica tucuita Mandac, Quishpichic Cristomi.

¹² Cancuna rishpaca, huagracuna shayana ucupi maitushca huahua ucsha jahuapi siricuctami ricunguichic— nirca.

¹³ Chashna huillacucllapitacmi, cungailla jahua pacha angelcuna, chai angelhuan Diosta alli nishpaca:

¹⁴ «¡Jahua pacha Diosca, alli nishca cachun! ¡Dios cuyashcacunaman cushi tiyachun!» nirca.

¹⁵ Jahua pachaman angelcuna rishca quipa, michiccunaca: —Dios huillashca ima cashcata ricungapac, Belenman jacuchic— ninacurca.

¹⁶ Chashna utca rishpaca, huagracuna shayana ucupi Josetapish, Mariatapish, ucsha jahuapi huahua siricuctapishmi ricurca.

¹⁷ Chaita ricushpaca, ángel chai huahuamanta paicunaman imata nishcatami parlarca.

¹⁸ Michiccuna parlacpica, tucui uyaccunami mancharishca saquirirca.

¹⁹ María tucui chaicunata uyashpaca paipac shungupimi yuyarishpa causacurcalla.

²⁰ Michiccunaca paicunaman huillashca shinallatac ricushpa uyashpaca, Diosta “allimari cangui, sumacmari cangui” nishpami cutirca.

Diosta mañana huasiman Jesusta apashcamanta

²¹ Huahua pusac punzha tucucpica, circuncisionta ruhuachishpami, María manarac huicsayuc cacpi, ángel huillashca shina, JESUSTA shutichirca.

²² Moisés mandashca shina sajuarishca quipa chuyayana punzhacuna pactacpica, huahua Jesusta Diosman ricuchingapacmi Josehuan Mariahuan Jerusalenman rirca.

²³ Mandac Dios mandashcapica: «Tucui punta huacharishca cari huahuacunaca, Diospaclla chicanyachishcami canga» nishcamanta,

²⁴ shinallatac: «Ishcai urpita, mana cashpaca ishcai huahua palomata cungui» nishcamantami chashnaca ruhuarca.

²⁵ Simeón shuti runami Jerusalenpi causarca. Paica Diosta cazucpish, cashcata ruhuacpishmi carca. Paica israelcunata Dios quishpichingapac shamuctami shuyacurca. Diospac Espiritumi paihuan carca.

²⁶ Diospac Espiritumi: “Dios cachashca Cristota ricungacaman, canca mana huañunguichu” nishca carca.

²⁷ Simeonca Diospac Espíritu pushacpimi, Diosta mañana huasiman rirca. Chaimanmi mandashcapi nishca shina ruhuangapac, taita mamaca huahua Jesusta apamurca.

²⁸ Simeón chai huahuata marcashpa, Diosta pagui nishpaca:

²⁹ «Dioslla, can mandashpa nishca shina, canta servic runataca cushicuihuan huañuchun saquilla.

³⁰ Can cachashca Quishpichictaca, ñuca ñahuihuantacmi ña ricuni.

³¹ Paitaca tucui llactacuna ricuchunmi cachashcangui.

³² Mana israelcunamanca, achicyachic luz shinami canga. Pai acllashca israelcunapacca mandacmi canga» nirca.

³³ Josepish, paipac mamapish huahua Jesusmanta Simeón imata nishcata uyashpaca mancharishpami saquirirca.

³⁴ Simeonca paicunata Dios bendiciachun nishca quipa, Mariataca: —Riqui, cai huahuataca achcacuna quishpirichun, cutin maijancunaca chingarichunmi Diosca Israelpi churashca. Pai Diospac munaita ricuchicpimi, yallita piñanga.

³⁵ Shinallatac achcacuna yuyacushcapish yacharingami. Llaquica shuc espada shunguta chaupishpa pasac shinami llaquichinga— nirca.

³⁶ Shinallatac Dios ima nishcata huillac, yuyac Ana huarmipish chaipimi carca. Paica ñaupa taita Aserpac aillupuramanta Fanuelpac ushimi carca. Paica huambrarac cazarashpapish canchis huatallatami cusahuan causarca.

³⁷ Paica pusac chunga chuscu huatatami viuda carca. Chai yuyac huarmica Diosta mañana huasimanta mana llucshishpami, punzhanta Diosta servishpa, mañashpa ayunashpa, causac carca.

³⁸ Chai huarmi, chai horasllatac shamushpami, chai huahuamanta Jerusalén llactata Quishpichicta shuyaccunaman parlai callarirca.

Nazaret puebloman cutishcamanta

³⁹ Dios mandashcacunata tucui pactachishpaca, Joseca Mariandimi paicuna causana Galilea llacta Nazaret puebloman cutirca.

⁴⁰ Huahuaca huiñashpa, sinchiyashpa, ashtahuan yachac tucushpami catirca. Diosca yallitami paita cuyarca.

Jesús Diosta mañana huasipi cashcamanta

⁴¹ Jesuspac taita mamaca huatantami Pascua fiestapica Jerusalenman ric carca.

⁴² Chashna ric cashca shinallatacmi, Jesús chunga ishcai huatayuc cacpi, Jerusalenman rirca.

⁴³ Fiesta tucuricpi, taita mama huasiman cuticpica, Jesusca Jerusalenpimi saquirishca carca. Chaitaca Josepish, Mariapish mana yacharcachu.

⁴⁴ Paicunaca “shuctac gentecunahuanmi ricunga” yuyashpami, tucui punzha rircalla. Chaimanta familiacunapurapi, ricsishcacunapurapi Jesusta mashcashpa,

⁴⁵ mana tarishpaca, Jerusalenllapitac mashcangapac cutircacuna.

⁴⁶ Ña quimsa punzhapimi, Diosta mañana huasipi mandashcacunata yachachiccunahuan, paicunata uyashpa, tapushpa tiyacucta tarircacuna.

⁴⁷ Jesús yachac cashcamanta, tucui tapushcata cutichicpimi, paita uyaccunaca mancharircacuna.

⁴⁸ Taita mama Jesusta ricushpaca, mancharircami. Chaimantami paipac mamaca: —Huahua, ñucanchicca yallita mancharishpami mashcacurcanchic. ¿Imamantatac caita ruhuangui?— nirca.

⁴⁹ Chaimantami Jesusca: —¿Imapactac mashcacurcanguichic? ¿Manachu Taitapac huasipi ñuca cana cashcataca yacharcanguichic?— nirca.

⁵⁰ Taita mamaca chai nishcata mana entendircachu.

⁵¹ Jesusca taita mamahuanmi Nazaret puebloman cutimushpa, paicunata alli cazushpa causarca. Paipac mamaca tucui chaicunacata shungupi huacaichishpami causacurca.

⁵² Jesusca huiñashpa, ashtahuan yachac tucushpami catirca. Diospacpish, gentecunapacpish cuyashcami carca.