SAN LUCAS 19 - Dios Rimashcata Quillcashcami

Jesús Zaqueohuan parlashcamanta

¹ Jesús Jericoman yaicushpaca, chai pueblo chaupitami ricurca.

² Chaipimi impuestota japiccunata mandac, chayuc Zaqueo shuti runa causarca.

³ Zaqueo runaca Jesús pi cashcata yachangapacmi ricunata munarca. Shina cashpapish, pai uchilla cashcamanta, tauca gentecuna Jesus-huan ricushcamantami mana ricui pudirca.

⁴ Chaimantami ñaupata callpa rishpa, Jesusta ricungapac sicómoro yuraman huichicurca. Jesusca chaitami rina carca.

⁵ Jesús chaita pasacushpa, yura jahuata huichailla ricushpaca: —Zaqueo, utca uricui. Cunanca cambac huasipimi pozangapac rina cani— nirca.

⁶ Chaimantami Zaqueoca utca uricushpa, cushilla Jesusta paipac huasiman pushashpa rirca.

⁷ Chaita gentecuna ricushpa piñarishpaca: —Caica, juchasapa runapac huasimanmi yaicun— nishpami, rimarca.

⁸ Zaqueo jatarishpaca: —Apunchic Jesús, ñuca charishcacunamanta chaupitami huacchacunaman cugrini. Maijanmanta umashpa shuhuashcataca chuscu cutin yallihuanmi cutichigrini— nirca.

⁹ Chashna nicpimi Jesusca: —Canpish Abrahampac huahua huahuami cangui. Chaimantami cunan punzha quishpirinaca cai huasiman chayamushca.

¹⁰ Runa Tucungapac shamushca ñucaca, chingarishcacunata mashcashpa, quishpichingapacmi shamurcani— nirca.

Chunga cullquihuan chimbapurashpa parlashcamanta

¹¹ Jesús Jerusalenman chayagricushpaca, gentecuna: “Dios mandanaca ñami chayamugrin” yuyacucta yachashpami chimbapurashca parlohuan parlarca. Pai chashna parlashpaca:

¹² «Shuc alli mandacmi paipac llactata mandanata chasquishpa, cutingapac caru llactaman rirca.

¹³ Pai manarac rishpa, chunga paita serviccunata cayashpa, chunga cullquita cushpaca: “Ñuca cutingacaman, cai cullquihuan randishpa, catushpa” nirca.

¹⁴ Pai ña ricpica, chai llacta gentecuna paita piñashpa: “Cai runa ñucanchicta mandachunca, mana munanchicchu” nichun, huillaccunata quipata cacharca.

¹⁵ Chashna nishpa cachacpipish, chai runaca mandac tucurcami. Pai cutimushpaca, chai saquishca cullquicunamanta mashna mirachishcata yachangapacmi, tucui chunga serviccunata cayachun cacharca.

¹⁶ Chaimantami punta shamuc runaca: “Amito, can saquishca cullquitaca, chunga cutinhuanmi mirachircani” nirca.

¹⁷ Chashna nicpimi chai mandacca: “Allimi, allitami ruhuashcangui. Ashallatapish, alli ruhuashcamantaca chunga pueblocunatami mandachun cugrini” nirca.

¹⁸ Cutin shuc shamushpaca: “Amito, can saquishca cullquitaca, pichca cutinhuanmi mirachircani” nirca.

¹⁹ Chashna nicpimi, chai mandacca: “Canca pichca pueblocunatami mandangui” nirca.

²⁰ Cutin shuc shamushpaca: “Amito, caipimi cambac cullqui. Quipishpami huacaichircani.

²¹ Chaica, canca piñami cangui. Manapish cushpa chasquiclla, manapish tarpushpa cosechacmi cangui. Chaimantami chashna ruhuarcani” nirca.

²² Chashna nicpimi chai mandacca: “Mana allita ruhuac servicmi cangui. Chashna nishpaca, canllatacmi llaquita apangui. Ñuca cashcatapish, manapish cushpa chasquiclla cashcatapish, manapish tarpushcata cosechaclla cashcatapish yacharcanguimi.

²³ ¿Chaita yachashca jahuachu ñuca saquishca cullquitaca bancollapipish mana churarcangui? Ñuca cutimushpaca, interes cullquindimi chasquiman carcani” nirca.

²⁴ Chashna nishpami, chaipi caccunataca: “Cai runamanta ñuca cushca cullquita quichushpa, chai chunga cullquita charicman cuichic” nirca.

²⁵ Chashna nicpimi chai runacunaca: “Amito, paica ñami chunga cullquita charin” nirca.

²⁶ Chashna nicpimi, chai mandacca: “Ñucaca ninimi: Charicmanmi, ashtahuan cushca canga. Mana charicmantaca, ashallata charishcatapish quichushcami canga.

²⁷ Cutin, ñucata piñashpa mana mandac cachun munaccunataca apamushpa, ñuca ñaupapi huañuchichic” nircami» nirca.

Jesús Jerusalén puebloman yaicushcamanta

²⁸ Chashna nishca quipami, Jesusca yachacuccunapac ñaupata Jerusalenman rirca.

²⁹ Betfagé pueblo, Betania pueblo cuchulla, Olivos urcumanmi chayarca. Chaimanta Jesús paipac ishcai yachacuccunata cachashpaca:

³⁰ —Chimba, chai uchilla llactaman richic. Chaiman chayashpaca, pi manarac montashca shuc burro huatashca shayacuctami ricunguichic. Chai burrota cacharishpa apamugrichic.

³¹ Maijan: “¿Imapactac aparicunguichic?” nicpica: “Apunchic Jesusmi apamuchun cachan” ninguichic— nirca.

³² Yachacuccuna rishpaca, Jesús nishca shinallatacmi burro shayacucta tarirca.

³³ Cacharicucpi, dueñocunaca: —¿Imapactac cacharicunguichic?— nirca.

³⁴ Chashna nicpica: —Apunchic Jesusmi apachun cachan— nirca.

³⁵ Jesuspacman apamushpaca, churanacunata burropi sudashpami, Jesusta montachirca.

³⁶ Jesús montashca ricucpimi, gentecunaca churanacunatami ñanpi tendirca.

³⁷ Jesús ña Jerusalenman cuchuyashpa, Olivos urcu cuchuta urai ricucpica, pai milagrocunata, mancharinacunata ruhuashcamantami tucui paita catishpa riccunaca cushicushpa, Diosta alli nishpa caparirca.

³⁸ Paicuna caparishpaca: —¡Diospac shutipi shamucuc Jatun Mandacca alli nishca cachun! ¡Jahua pachapipish alli sumac cushicui cachun! ¡Diostapish alli nishca cachun!— nishpami caparirca.

³⁹ Chaimantami gentecunapuramanta maijan fariseocunaca: —Yachachic, cambac yachacuccunataca upallachi— nirca.

⁴⁰ Chashna nicpimi Jesusca: —Paicuna upallacpica, rumicunami caparinga— nirca.

⁴¹ Jesús Jerusalenman chayagrishpa, chai pueblota ricushpaca:

⁴² “¡Cai pueblopi causaccunalla! Cunan punzhallapish cushi causaimanta yachashpaca, allichari canguichicman, ashtahuanpish yuyai illac cashpami, mana entendinguichic.

⁴³ Cancunata piñaccuna shamushpa, muyundita jarcashpa shayarina punzhacunami shamun.

⁴⁴ Cai pueblota urmachishpa, caipi causaccunatapish tucuchingami. Shuc rumillapish pircashcaca mana saquiringachu. Dios quishpichingapac shamucpi, mana chasquishcamantami llaquita apanguichic” nirca.

Diosta mañana huasimanta catuccunata llucchishpa cachashcamanta

⁴⁵ Jesús Diosta mañana huasiman yaicushpa, catuccunatapish, randiccunatapish llucchishpa cachacushpaca:

⁴⁶ “Dios quillcachishcapica: ‘Ñuca huasica, ñucata mañana huasimi canga’ ninmi. Ashtahuanpish cancunaca shuhuaccuna miticuna machaitami ruhuashcanguichic” nirca.

⁴⁷ Jesusca tucui punzhacunami Diosta mañana huasipi yachachic carca. Cutin curacunata mandac curacunapish, mandashcacunata yachachiccunapish, llactata mandaccunapish Jesustaca ima shina huañuchinatami yuyacurca.

⁴⁸ Ashtahuanpish Jesús huillacucta tucui gentecuna alli uyacushcamantami, paicunaca imata mana ruhuai pudirca.