SAN LUCAS 17 - Dios Rimashcata Quillcashcami

Juchapi mana urmachina cashcamanta

¹ Jesusca paipac yachacuccunataca: «Juchapi urmaccunaca tiyangallatacmi. Shina cacpipish maijanpish juchapi urmachicca, ¡imachari tucunga!

² Huahuacuna shina ñucata criccunata maijanpish juchapi urmachictaca, cutana rumita cungapi huatashpa, jatun cuchapi shitanami ashtahuan alli canman.

³ ¡Allita cuidaringuichic! Maijan canta ima mana allita ruhuacpica cunashpa rimangui. Chaita uyashpa alli tucucpica, perdonangui.

⁴ Shuc punzhapi canchis cutin canta llaquichishpa juchallishpa, canchis cutinllatac: “Llaquirishpa, perdonai” nishpa shamucpica, perdonanguilla» nirca.

Ashtahuan crina yuyaita Jesusman mañashcamanta

⁵ Apostolcunaca Jesustaca: —Ñucanchicman ashtahuan crina yuyaita cuiyari— nirca.

⁶ Shina nicpimi Apunchic Jesusca: —Mostaza muyu shina ashallatapish crishpaca, cai jatun sicómoro yurata: “Caimanta anchuri, jatun cuchapi shayarigri” nicpica, cazunmanllami— nirca.

Shuc servic ima shina canamanta

⁷ Shinallatac Jesusca: «¿Maijan cancuna shuc servic yapushpa, mana cashpaca michishpa cutimucpica: “Shamui, micungapac tiyari” ninguichicmanchu?

⁸ Mana chashna ninguichicmanchu. Chaipac randica: “Utca mudarishpa, micunata ruhuashpa, ñucamanrac carai, ubiachi, quipata micunguillami, ubianguillami” ninguichicmanmi.

⁹ Mandashcata shina ruhuacpipish, servictaca mana diosolopagui ninguichicchu.

¹⁰ Chashnallatac cancunapish tucui mandashcacunata ruhuashpaca: “Ñucanchicca imata ruhuana cashcallatami ruhuashcanchic. Mana alli serviccunachu canchic” ninami canguichic» nirca.

Jesús chunga lepra ungüihuan caccunata alliyachishcamanta

¹¹ Jesús Jerusalén puebloman ricushpaca, Samaria llactahuan, Galilea llactahuan tupanacuitami rirca.

¹² Shuc uchilla llactaman chayacucpimi, chunga lepra ungüihuan cac runacuna tupangapac llucshishpa, Jesuspac carullapi shayarirca.

¹³ Paicuna caparishpaca: —¡Yachachiclla, Jesuslla, ñucanchicta llaquiyari!— nirca.

¹⁴ Jesús paicunata ricushpaca: —Richic, Israel curacunaman ricuchigrichic— nirca. Chashna paicunaca ñanta ricushpallatacmi alli tucurca.

¹⁵ Paicunapuramanta shuc runaca pai alli tucushcata ricushpaca, Diosta alli nishpa caparishpami cutimurca.

¹⁶ Chashna cutimushpami, Jesuspac ñaupapi pambacaman cumurishpa diosolopagui nirca. Ashtahuanpish chai runaca, Samaria llacta runami carca.

¹⁷ Jesús paita tapushpaca: —¿Maipitac caishuc iscuncunaca? Chungatami alliyachircani.

¹⁸ Cai mana Israel runami, Diosta alli ningapac cutimushca, ashtahuanpish israelcunaca mana cutimushcachu— nirca.

¹⁹ Chashnami Jesusca chai runataca: —Can crishcamantami alliyashcangui. Cunanca jatarishpa rilla— nishpa cacharca.

Dios mandanamanta tapushcamanta

²⁰ Fariseocunami ima punzha Dios mandangapac shamunamanta tapurca. Chashna tapucpimi Jesusca: —Dios mandangapac shamunataca, mana ricuipacllachu.

²¹ Mana: “Caipimi, chaipimi ña mandacun” ningachu. Ashtahuanpish Diosca ñami cancunapac chaupipi mandacun— nirca.

²² Jesusca paipac yachacuccunataca: —Runa Tucungapac shamushca ñuca mandacucta ashallapish ricunata munana punzha chayamungami. Chashna munashpapish, mana ricungachu.

²³ Maijancunaca: “¡Cristoca caipimi! ¡Chaipimi!” ningami. Chaitaca ricungapacllapish, ama ringuichicchu.

²⁴ Chaica, Runa Tucungapac shamushca ñuca cutimuna punzhaca, relampa jaguin nishpa tucui cai pachata achicyachic shinami canga.

²⁵ Shina cashpapish cunan punzha gentecunapac piñashca, llaquichishca canaracmi cani.

²⁶ Ima shinami Noé causai punzhacunapi carca, chashnallatacmi Runa Tucungapac shamushca ñuca cutimuna punzhacunapipish canga.

²⁷ Noé jatun barcoman yaicuna punzhacamanca, gentecunaca micushpa, ubiashpa, cazarashpa, cazarachishpami causacurca. Chashna causacucpimi, yacu juizhu shamushpa, tucuita tucuchirca.

²⁸ Shinallatac Lot causai punzhacunapipish, allita micushpa, ubiashpa, catushpa, randishpa, tarpushpa, huasichishpami causacurca.

²⁹ Lot Sodoma pueblomanta llucshi punzhapica, jahua pachamanta nina, azufre tamyashpa, tucui tucuchirca.

³⁰ Chashnallatacmi Runa Tucungapac shamushca cutimuna punzhapipish canga.

³¹ Chai punzhapi maijanpish huasi jahuapi cashpaca, imata apangapac ama ucuman yaicuchun. Maijanpish chagrapi cashpaca, huasiman ama cutichun.

³² Lotpac huarmi ima tucushcataca yuyarichic.

³³ Maijanpish quiquin causaita llaquicca chingaringami, ashtahuanpish quiquin causaita mana llaquicca, huiñaitami causanga.

³⁴ Ñucaca ninimi: Chai tutapica shuc camapimi ishcai sueñucunga. Paicunamantaca shucca apashca, shucca saquishcami canga.

³⁵ Shinallatac ishcai huarmicunami cutacunga. Paicunamantaca shucca apashca, shucca saquishcami canga.

³⁶ Shinallatac ishcai runacunami chagrapi canga. Paicunamantaca shucca apashca, shucca saquishcami canga— nirca.

³⁷ Chashna nicpimi paicunaca: —Apunchic Jesús, ¿maipitac chashnaca tucunga?— nirca. Chashna nicpimi Jesusca: —Maipimi huañushca tiyan, chaipimi ullachucunaca tandanacun— nirca.