SAN LUCAS 16 - Dios Rimashcata Quillcashcami

Mana cazuc mayordomomanta

¹ Jesusca paipac yachacuccunataca: «Shuc chayuc amomi, shuc mayordomota charirca. Paitami amoca, paipac charishcacunata yanga tucuchishcamanta juchanchirca.

² Chaimanta, amo chai mayordomota cayashpaca: “Canmantaca, mana allicunatami uyani. Cunanca ña mana ñuca mayordomochu cagringui. Chaimanta ñuca charishcacunata imata ruhuashcata huillai” nirca.

³ Chaimantami chai mayordomo paipac shungupica: “Cunanca, ¿imatatac ruhuani? Ñuca amoca ña mana mayordomo cachun ninchu. Allpapi trabajanatapish mana pudishachu. Imata mañashpalla causanatapish pinganayangami.

⁴ Mayordomomanta llucchicpi, ñucata huasicunapi chasquichun imata ruhuana cashcataca ñami yuyarini” nicurca.

⁵ Chaimantami amoman debic runacunata shucllancaman cayashpa, punta shamuctaca: “Canca, ¿mashnatatac ñuca amomanca debingui?” nirca.

⁶ Shina nicpimi paica: “Patsac barril aceitetami debini” nirca. Shina nicpimi, chai mayordomoca: “Caipimi debishca recibo. Utca tiyarishpa, pichca chungallata mañashcata churai” nirca.

⁷ Cutin caishuc debic runataca: “Canca amomanca, ¿mashnatatac debingui?” nirca. Chashna nicpimi paica: “Ñucaca patsac cushtal trigotami debini” nirca. Shina nicpimi mayordomoca: “Caipimi debishcata recibo. Utca tiyarishpa, pusac chungallata mañashcata churai” nirca.

⁸ Amo chaita yachashpaca, chai mana cazuc mayordomotaca ‘allitami ruhuashca’ nirca. Cai pachapaclla caccunaca paicunapura ima allita ruhuangapacca, Diosta caticcunata atishpa alli yuyaiyucmi.

⁹ Ñucaca ninimi: Cai pachapi charishcacuna tucuricpi, jahua pachapi huiñaita chasquichun, cai pachapaclla charishcacunata shuccunaman cushpa, paicunahuan alli caichic.

¹⁰ Ashalla charishcacunahuan allita ruhuacca, achcata charishcacunahuanpish allitami ruhuanga. Chashnallatac ashalla charishcacunahuan mana allita ruhuacca, achcata charishcacunahuanpish mana allillatatacmi ruhuanga.

¹¹ Cancuna cai pachapi charishcacunahuan mana allita ruhuacucpica, Diosca huiñaita causangapac allicunataca cancunamanca mana cungachu.

¹² Shucpac charishcacunata mana allita ruhuashpaca, quiquinpac cashcatacarin imatachari ruhuanman.

¹³ Maijan servicpish ishcai amotaca mana servi pudinchu. Shuc amotaca piñangami, caishuc amotaca cuyangami. Mana cashpaca, shuc amotaca cazungami, cutin caishuc amotaca mana cazungachu. Chashnallatacmi maijanpish charicyana yuyailla cashpaca, Diostaca mana servi pudin» nirca.

¹⁴ Cullquita charina yuyailla cac fariseocunaca tucui chaicunata uyashpaca, Jesusta burlarcami.

¹⁵ Chaimantami Jesusca: «Cancunaca gentecunapac ñaupapica, cashcata ruhuaclayallami canguichic. Ashtahuanpish Diosca cancuna imata yuyacushcataca yachanmi. Cai pachapi gentecunalla alli nishcacunaca, Diospac ñaupapica millanami can.

Moisés mandashcacunamantapish, Dios mandacucmantapish

¹⁶ Moisés mandashcacunapish, Dios ima nishcata huillaccuna huillashcapish, Bautizac Juan causai punzhacamanllami carca. Chaimanta pachami, Dios mandacucmanta alli huillaica callarirca. Chaimanta tucuimi Dios mandacucman ima shinapish yaicunata munancuna.

¹⁷ Jahua pachapish, cai pachapish tucurinallami, ashtahuanpish Dios mandashcacunaca, shuc rimaillapish mana chingaringachu, pactacungallami.

Cazarashcacuna mana raquirinamanta

¹⁸ Maijanpish huarmimanta raquirishpa, shuc huarmihuan cazaracca huainayanmi. Maijanpish cusamanta raquirishca huarmihuan cazaracpish, huainayanllatacmi.

Chayuc runamantapish, huaccha Lazaromantapish

¹⁹ Shuc chayuc runami tiyarca. Paica punzhantami achca valic churanata churarishpa, alli micunallata micushpa cushicuc carca.

²⁰ Shinallatac sisuhuan apyacuc, huaccha Lázaro runapish tiyarcami. Paica chayuc runapac huasi pungupimi

²¹ chayuc runa mizamanta urmachishcallatapish micuna yuyaihuan tiyacurca. Sisutaca allcucuna shamushpami, lambic carca.

²² Huaccha runa ña huañucpica, angelcunami jahua pachapi causacuc Abrahampac cuchuman aparca. Shinallatac chayuc runa huañucpica, enterrarcami.

²³ Chai chayuc runaca ucu pachapi llaqui nanaihuan cashpami, huichailla ricushpaca Abrahamtapish, paipac ladopi Lazarotapish ricurca.

²⁴ Chaimanta chayuc runa caparishpaca: “¡Taita Abrahamlla, ñucata llaquiyari! Ñucaca cai ninapimi llaqui nanaihuan apacuni. Chaimanta Lazarota cachai, paipac dedota yacupi satishpa, ñuca callullatapish chiriyachichun” nirca.

²⁵ Chashna caparicpimi Abrahamca: “Huahua, can causacushpa allita causashcata yuyari. Ashtahuanpish Lazaroca llaquitami causarca. Cunanca caipica cushicushpami tiyacun.

²⁶ Chaipac jahuapica caimanta cancunapacman, cancunapacmanta caimanca shuc jatun huaicumi tiyan. Chaimantami caiman, chaimanpish, chaimanta caimanpish maita mana pasai pudincuna” nirca.

²⁷ Chashna nicpimi, chai chayuc runaca: “Taita Abrahamlla, shinashpaca Lazarota ñuca taitapac huasiman cachashpa cui.

²⁸ Chaipica pichca huauquicunatami charini. Paicunapish cai ninapi ama llaquita apangapac shamuchun huillachun cachai” nirca.

²⁹ Chashna nicpimi Abrahamca: “¡Moisés mandashcacunatapish, Dios ima nishcata huillaccuna quillcashcacunatapish charincunami! ¡Chaicunata uyashpa, cazuchun!” nirca.

³⁰ Chashna nicpimi chai chayuc runaca: “Ari, Taita Abrahamlla. ¡Chaicunata uyashpapish mana cazungacunachu, ashtahuanpish huañushcacunapuramanta maijan paicunapacman ricpimi, juchayuc cashcamanta llaquirishpa Diosman cutiringa!” nirca.

³¹ Shina nicpimi Abrahamca: “Moisés mandashcacunatapish, Dios ima nishcata huillaccuna huillashcacunatapish mana cazushpaca, huañushcacunapuramanta maijan causarishpa ricpipish, ¡maitatac cazungayari!” nircami» nirca.