SAN LUCAS 15 - Dios Rimashcata Quillcashcami

Chingarishca ovejahuan chimbapurashcamanta

¹ Impuestota japiccunapish, israelcuna caishuc juchayuccunapish, achcacunami Jesús huillashcata uyangapac cuchuyarca.

² Chaita ricushpami fariseocunapish, mandashcacunata yachachiccunapish rimarishpaca: —Cai runaca juchayuccunahuan tandarishpa micunllami— ninacurca.

³ Chaimantami Jesusca chimbapurashca parlohuan parlashpaca:

⁴ «Maijan cancuna patsac ovejacunata charishpa shuc oveja chingaricpica, iscun chunga iscunta michina pambapi saquishpa, chai chingarishca ovejata taringacaman, ¿manachu mashcangapac ringuichicman?

⁵ Ña tarishpaca hombroschishpami cushilla apamunguichicman.

⁶ Ña huasiman chayamushpaca, cuchullapi causaccunatapish, alli ricsishcacunatapish tandachishpami: “Chingarishca ovejatami tarimuni. Cushicungapac shamuichic” ninguichicmanmi.

⁷ Ñucaca ninimi: Chashnallatacmi jahua pachapica, iscun chunga iscun llaquirishpa, Diosman mana cutirishcacunamanta yalli, shuc juchayuc llaquirishpa Diosman cutiricpica, ashtahuan cushicui tiyan.

Chingarishca cullquihuan chimbapurashcamanta

⁸ Shuc huarmi, chunga cullquita charicushpa shuc chingaricpica, ¿manachu luzta japichishpa, huasi ucuta pichashpa, taringacaman mashcanman?

⁹ Ña tarishpaca, vecinocunatapish, ricsishcacunatapish tandachishpa: “Chai chingarishca cullquitaca tarinimi. Ñucahuan cushicungapac shamuichic” ninmanmi.

¹⁰ Ñucaca ninimi: Chashnallatacmi shuc juchayuc llaquirishpa Diosman cutiricpica, Diospac angelcunapish yallita cushicun» nirca.

Chingarishca churihuan chimbapurashcamanta

¹¹ Shinallatac Jesusca: «Shuc runami ishcai churita charirca.

¹² Quipa churica taitataca: “Taitito, ñuca japina cashcataca cui” nirca. Shina nicpimi, taitaca tucui charishcacunata chaupishpa curca.

¹³ Asha punzhacuna quipaca, chai quipa churica, tucui pai japishcacunata tandachishpami, caru llactaman rirca. Chaipi maipish cachun causashpami, tucui pai charishcacunata tucuchirca.

¹⁴ Tucui tucuchishca quipaca, chai llactapi ima mana pucucpi, yalli yarcaimi tiyarca. Chaimantami paipish llaquilla causai callarirca.

¹⁵ Chaimantami chai llactapi causac shuc amopacman rishpa, imalla ruhuanata mañarca. Chai amomi paipac allpapi cuchicunata michichun cacharca.

¹⁶ Paica yalli yarcaihuan cashpami, cuchicuna micunata micusha nishpa yuyacurca. Pipish imata mana cararcachu.

¹⁷ Chaimantami paipac shungupica: “¡Ñuca taitapac huasipica, serviccunapish micunata atichicungami! Ñucaca caipi yarcaihuanmi huañucuni.

¹⁸ Ñuca taitapacman cutishpa rishalla. Chaiman chayashpaca: ‘Taitito, Diostapish, cantapish piñachishpami, juchallishcani.

¹⁹ Cunanca ña mana cambac churi shinachu cani. Canta servic runa shinalla cachun chasqui’ nishami” nishpa yuyarirca.

²⁰ Chaimantami jatarishpa, paipac taitapacman cutirca. Ña cutimucucpica, paipac taitaca caruta shamucuctami ricurca. Chashna ricushpami, yallita llaquishpa, tupangapac llucshishpa, ucllarishpa mucharca.

²¹ Paipac churica: “Taitito, Diostapish, cantapish piñachishpami, juchallishcani. Cunanca ña mana cambac churi shinachu cani” nirca.

²² Ashtahuanpish taitaca paipac serviccunataca: “Ashtahuan sumac churanata apamushpa churachichic. Maqui dedopica sortejasta, chaquipica ushutata churachichic.

²³ Shuc alli huira huagrata apamushpa, huañuchishpa fiestata ruhuashunchic.

²⁴ Ñuca churica, huañushcami carca, causarishcami. Chingarishcami carca, cunanca cutimushcami” nirca. Chashnami yallita cushicui callarirca.

²⁵ Punta churica chagrapimi carca. Chagramanta huasiman ña chayamucushpami, tocaccunatapish, bailacuccunatapish uyarca.

²⁶ Chaimantami taitapac serviccunamanta shucta cayashpaca: “¿Imatatac ruhuacuncuna?” nirca.

²⁷ Chashna nicpimi paica: “Cambac huauquimi cutimushca. Pai allilla shamushcamantami, cambac taitaca huira huagrata huañuchichishpa cushicucun” nirca.

²⁸ Shina nicpimi, chai huauquica yallita piñarishpa, mana yaicusha nirca. Chaimantami taita llucshishpa yaicuchun rogarca.

²⁹ Paica taitataca: “Taita, ñucaca cai tucui huatacunatami can ima nishcata ruhuashpa servishcani. Chashna cacpipish ñuca ricsishcacunahuan cushicuchunca, shuc chivollatapish mana cushcanguichu.

³⁰ ¿Chai mana alli huarmicunahuan purishpa, can cushcacunatapish tucuchishpa shamucpichu, canca huira huagrata huañuchichishpa cushicucungui?” nirca.

³¹ Chashna nicpimi taitaca: “Huahua, canca tucui punzhacunami ñucahuan cashcangui. Chaimantaca, tucui ñuca charishcacunaca cambacmi.

³² Cai cambac huauquica, chingarishcami carca, cunanca cutimushcami. Huañushcami carca, cunanca causarishcami. Chaimantami jatun micuita ruhuashpa, cushicuna canchic” nircami» nirca.