SAN LUCAS 14 - Dios Rimashcata Quillcashcami

Jesús shuc ungushca runata alliyachishcamanta

¹ Shuc samana punzhapimi Jesusca mandac fariseopac huasipi micungapac yaicurca. Chaipimi caishuc fariseocunaca Jesusta ima shinapish juchanchingapac chapacurca.

² Jesuspac ñaupapica, punguillichic runami chaipi carca.

³ Chaimantami Jesús mandashcacunata yachachiccunatapish, fariseocunatapish tapushpaca: —¿Samana punzhapi ungushcata alliyachinaca allichu canga? Mana cashpaca, ¿saquinallachu canga?— nirca.

⁴ Paicuna imata mana nicpica, Jesusca chai ungushcataca alliyachishpami cacharca.

⁵ Chashna ruhuashpaca fariseocunataca: —Maijan cancunapac shuc huahua, mana cashpaca shuc huagra jutcupi ucuyacpica, ¿manachu samana punzha cacpipish llucchinguichicman?— nirca.

⁶ Chashna nicpica, imata mana ni pudircacunachu.

Bodahuan chimbapurashcamanta

⁷ Jesús micungapac cayashcacuna punta tiyarinata mashcashpa tiyaricucta ricushpaca:

⁸ «Bodaman canta pi cayacpi rishpaca, ama punta tiyarinapi tiyaringuichu. Pacta canta atishpa ashtahuan alli nishca runa quipata chayamucpi,

⁹ bodayuc shamushpa: “Caimanta anchuri, paitami caipica tiyachigrini” ninman. Chashna nicpica, pingaihuanmi yangalla tiyarinapi tiyaringui.

¹⁰ Ashtahuanpish canta bodaman cayacpi rishpaca, yangalla tiyarinapi tiyaringui. Chashna tiyacucpi, bodayuc shamushpa: “Uyai, cai ñaupaman tiyari” nicpica, chaipi caccunapac alli nishcami cangui.

¹¹ Maijanpish “allimi cani” nictaca, “mana allichu cangui” ningami. Maijanpish “mana allichu cani” nictaca, “allimi cangui” ningami» nirca.

¹² Jesusca micuiman cayac runataca: —Micungapac cayashpaca, ama cambac ricsishcacunallata, huauquicunallata, familiacunallata, chayuc vecinocunallata cayanguichu. Pacta paicunapish canta cayashpa, can carashcamantaca cutichinman.

¹³ Ashtahuanpish jatun micuita ruhuashpaca, huacchacunatapish, ungushcacunatapish, suchucunatapish, ñahui mana ricuccunatapish cayangui.

¹⁴ Chashna mana cutichipaccunaman carashcamantaca, cushicunguimi. Chaica, cashcata ruhuaccuna causarimui punzhapimi, Diosca canmanca cutichinga— nirca.

Jatun micuihuan chimbapurashcamanta

¹⁵ Mizapi Jesus-huan tiyacuccunapuramanta shuc runa chashna nicta uyashpaca: —Pipish Dios maipi mandacucpi micungapac chayacca cushicungami— nirca.

¹⁶ Chashna nicpimi, Jesusca: «Shuc runami jatun micuita ruhuashpa, achcacunata cayarca.

¹⁷ Micuna horas cacpimi, paita servic runataca: “Ñami tucui allichishca, shamuichic” nichun cacharca.

¹⁸ Chashna cayachun cachacpica, caita chaita ninacushpami, mana shamushun nircacuna. Shucca: “Cunanllami allpata randircani. Chaitami ricungapac ricuni. Mana ri pudinichu” nirca.

¹⁹ Cutin shucca: “Ñucaca pichca yuntatami randircani. Chaicunatami yugoshpa ricugricuni. Chaimantami mana shamui pudini, perdonai” nirca.

²⁰ Cutin shucca: “Ñucaca cunanllami cazararcani. Chaimantami mana ri pudinichu” nirca.

²¹ Chaimantami chai amo cachashca runa cutimushpaca, amoman huillarca. Chashna huillacpi, amoca yallita piñarishpaca: “Shinashpaca, plazacunapi, ñancunapi puricuc huacchacunatapish, ungushcacunatapish, suchucunatapish, ñahui mana ricuccunatapish utca cayamugri” nishpa cacharca.

²² Chai quipata servic runaca: “Amito, can mandashca shinami pushamushcani. Shina cacpipish, ucupica manarac jundanchu” nirca.

²³ Chashna nicpimi amoca: “Shinashpaca mai callecunamantapish, ñancunamantapish pushamushpa, ñuca huasipi jundachi.

²⁴ Cancunaman ninimi: Ñaupaman cayashcacunaca, shucllapish cai micuitaca mana micungachu” nirca» nircami.

Cristota catinamanta

²⁵ Jesusca paihuan ricuc achca gentecunata ricushpaca:

²⁶ «Maijanpish ñucata catingapac shamushpa, taita mamata, huarmita, huahuacunata, huauquicunata, panicunata, quiquin causaita llaquicca mana ñuca yachacuc cai pudinchu.

²⁷ Maijanpish ñucata catingapac shamushpapish, cruzpi chacatashca shina llaquita mana apasha nicca, mana ñuca yachacuc cai pudinchu.

²⁸ ¿Manachu maijan cancuna huasita shayachingapacca cullqui pactanatarac ricunguichic?

²⁹ Pacta huasita ruhuangapac rumita churashpalla saquicpica, shuccuna burlashpa asinman.

³⁰ Shina burlashpaca: “Cai runaca manapish tucuchingapacmi huasitaca callarishca” ninman.

³¹ Maijan jatun mandac shuctac jatun mandac-huan macanacungapac chunga huaranga soldadocunallahuan cashpaca, caishuc mandacca ishcai chunga huaranga soldadocunahuan shamucucpica, manarac macanacushpami yuyarinman.

³² Mana macanacuipac cashpaca, caishuc mandac manarac chayamucpimi alli tucungapac huillaccunata cachanman.

³³ Chashnallatac maijanpish tucui charishcacunata mana saquishpaca, mana ñuca yachacuc cai pudinchu.

Jesús cachimanta parlashcamanta

³⁴ Cachica allimi. Chashna cashpapish gamuyashpaca, ¿imapactac alli canga?

³⁵ Allpapi shitangapacpish, huanupi churangapacpish mana valinmanchu. Ringrita chariccunaca, caita alli uyaichic» nirca.