SAN LUCAS 13 - Dios Rimashcata Quillcashcami

Diosman cutirinamanta

¹ Chai punzhallatami maijancuna Jesuspacman shamushpaca: —Galilea llacta runacunatami Diosman animalta cushpa huañuchicucpi, mandac Pilato huañuchichirca. Chashna huañuchicpimi, chai runacunapac yahuarca animalcunapac yahuarhuan chapurirca— nishpa huillarca.

² Chashna huillacpimi Jesusca: —Chai huañuchishca runacuna, ¿Galilea llacta gentecunata yalli juchayuccuna cashcamantami chashna tucushca canga, yuyanguichicchu?

³ Mana, mana yalli juchayuccuna cashcamantachu chashnaca tucurca. Cancunapish juchayuc cashcamanta llaquirishpa, Diosman mana cutirishpaca, tucuimi huañunguichic.

⁴ Siloé torre tigrashpa, chunga pusacta ñitishca huañuccunaca, ¿tucui Jerusalenpi causaccunamanta yalli juchayuccuna cashcamantami huañushca canga yuyanguichicchu?

⁵ Mana chaimantachu chashna tucushca. Cancunapish juchayuc cashcamanta llaquirishpa, Diosman mana cutirishpaca, tucuimi huañunguichic— nirca.

Mana pucuc higo yuramanta

⁶ Jesús chimbapurashpa parlashpaca: «Shuc runami paipac allpapi higo yurata charirca. Chai yurapi pucushcata mashcangapac rishpaca mana tarircachu.

⁷ Chaimantami chagrata cuidactaca: “Ñami quimsa huatata cai yura pucushcata mashcac shamushcani. ¿Imapactac cai allpapi yanga shayacunga? Pitishpa shitai” nirca.

⁸ Chashna nicpimi, chagrata cuidacca: “Amito, jallmashpa huanuta churashpa ricungapac, cai huatahuan shuyai.

⁹ Pucushpaca, allimi canga. Mana pucucpica, pitichinguilla” nirca» nirca.

Jesús samana punzhapi huarmita alliyachishcamanta

¹⁰ Jesusca samana punzhapimi israelcuna tandanacuna huasipi yachachicurca.

¹¹ Chaipimi chunga pusac huatata supai unguchishca huarmi tiyacurca. Chai huarmica mana derechari pudicchu carca.

¹² Chai huarmita Jesús ricushpa cayashpaca: —Huahua, ungüimanta cacharichishcami cangui— nirca.

¹³ Chashna nishpa paipac uma jahuapi maquita churacpica, ña derecharishpa, Diosta “allimari cangui” nircallami.

¹⁴ Tandanacuna huasipi mandacca, Jesús samana punzhapi alliyachishcamantami yallita piñarishpa, chaipi caccunataca: —Semanapica sucta punzhallatami trabajana. Chai punzhacunapimi jambichingapacca shamuna canguichic, samana punzhapica mana— nirca.

¹⁵ Shina nicpimi Apunchic Jesusca: —¡Mishqui shimi, jayac shungu! ¿Manachu samana punzhapi cancunapac huagrata, burrotaca, cacharishpa yacuchingapacca apanguichic?

¹⁶ Cai huarmica Abrahampac huahua huahuapurami. Paitaca Satanasmi chunga pusac huatata unguchishpa charicushca. Paitaca, ¿manachu samana punzha cacpipish, ungüimanta cacharichina cani?— nirca.

¹⁷ Jesús chashna nicpica, paita piñaccunaca pingarcami. Ashtahuanpish chaipi cac gentecunaca Jesús sumacta ruhuacta ricushpaca, yallitami cushicurca.

Mostaza muyuhuan chimbapurashcamanta

¹⁸ Jesusca: «Dios mandacucca, ¿ima shina cashcatatac nisha? ¿Imahuan chimbapurashpatac “cai shinami, chai shinami” nishpa parlasha?

¹⁹ Dios mandacucca, mostaza muyuta shuc runa paipac allpapi tarpucpi, huiñashpa jatunyac shinami. Chai yurapica, volac animalcunami ramacunapi cuzhata ruhuan» nirca.

Jesús levadurahuan chimbapurashpa parlashcamanta

²⁰ Shinallatacmi Jesusca: “Dios mandacuctaca, ¿imahuantac chimbapurasha?

²¹ Dios mandacucca, shuc huarmi quimsa taza harinata ashalla levadurahuan chapushpa, tucui chaputa punguillichic shinami” nirca.

Quichqui punguta yaicunamanta

²² Jesús Jerusalenman ricushpaca, pueblocunapipish, uchilla llactacunapipish yachachishpami rirca.

²³ Chashna ricucpi, shuc runa tapushpaca: —Apunchic Jesús, ¿ashacunallachu quishpirigrin?— nirca. Shina nicpimi Jesusca:

²⁴ —Quichqui punguta yaicunata yuyaichic. Taucacuna chaita yaicusha nicushpapish, mana yaicui pudingachu.

²⁵ Huasiyuc jatarishpa, punguta huichcashca quipa, cancuna canzhapi saquirishpaca: “Huasiyuc, amito, punguta pascai” nicunguichic. Chashna nicpica huasiyucca: “Pichari canguichic, mana ricsinichu” ningami.

²⁶ Chashna nicpimi cancunaca: “Canhuanmi micushpa puric carcanchic. Canllatacmi ñucanchic llactacunapipish yachachicurcangui” nicunguichicmi.

²⁷ Chashna nicpipish huasiyucca: “¿Manachu uyanguichic? ¡Caimanta anchurichic, millaita ruhuaccuna! ¡Cancunataca mana ricsinichu!” ningami.

²⁸ Taita Abrahamtapish, Isaactapish, Jacobotapish, Dios ima nishcata huillaccunatapish Dios maipi mandacucpi tiyacucta ricushpa, cancuna canzhaman shitashca cashpaca, quirucuna canirishpami huacacunguichic.

²⁹ Dios maipi mandacucpi micungapac, tiyaringapacmi tucui llactacunamanta tandanacunga.

³⁰ Chaipica alli nishcacunaca, mana alli nishcami canga. Mana alli nishcacunaca, alli nishcami canga— nirca.

Jesús Jerusalén pueblomanta huacashcamanta

³¹ Chai punzhallatacmi maijan fariseocuna Jesuspacman chayamushpaca: —Mandac Herodesmi canta huañuchisha nicun. Caimanta utca rilla— nirca.

³² Chashna nicpimi, Jesusca: —Richic, chai atuctaca: “Riqui, cai punzhacunaca supaicunatami llucchisha, ungushcacunatapish alliyachishami. Minchami, ñuca ruhuanataca tucuchisha” ninmi, nigrichic.

³³ Shina cacpipish, Dios ima nishcata huillactaca mana maipipish huañuchinllachu, Jerusalenllapimi huañuchin. Chaimanta cunanpish, cayapish, minchapish ñuca ricushca ñantaca rinallatami cani.

³⁴ ¡Aij, Jerusalenpi causaccunalla! Dios ima nishcata huillaccunataca huañuchiccunami canguichic. Dios huillachun cachashcacunatapish rumihuan shitaccunami canguichic. Cancunataca tauca cutinmi mama huallpa huahuacunata ucllac shina, tandachisha nircani. Chashna tandachisha nicucpipish, mana uyarcanguichicchu.

³⁵ Chaimantami cancunapac huasica shitashca saquiringa. Cancunaman huillanimi: Dios cachashca, ñuca cutimucpi “allimari cangui” ningacaman, ñucataca manatac ricunguichicchu— nirca.