SAN LUCAS 11 - Dios Rimashcata Quillcashcami

Jesús Diosta mañanata yachachishcamanta

¹ Shuc cutinmi Jesusca Diosta mañacurca. Mañashca quipa shuc yachacucca: —Apunchic Jesús, Juan paipac yachacuccunata yachachishca shina, ñucanchictapish Diosta mañanata yachachi— nirca.

² Chashna nicpimi Jesusca: —Cancuna Diosta mañashpaca: “Jahua pacha ñucanchic Taitalla, cambac sumaimana shutitaca tucuilla alli nishca cachun. Can mandana punzha shamuchun. Ima shinami jahua pachapi can munashca ruhuaricun, shinallatac cai pachapipish ruhuarichun.

³ Ñucanchic punzhanta micuna tandataca, cunan punzhapish carai.

⁴ Ima shinami ñucanchicta mana alli ruhuaccunata perdonanchic, shinallatac ñucanchic juchacunatapish perdonai. Ama ima millaipi urmachun saquinguichu, ashtahuanpish tucui mana allimanta huacaichingui” ninguichic— nirca.

⁵ Shinallatac Jesusca paicunataca: —Maijan cancunamanta shuc ricsishca runapacman huasiman chaupi tutata rishpaca: “Uyai, quimsa tandata mañachi.

⁶ Shuc ricsishca runami, carumanta ñuca huasiman chayamun. Ima caranata mana charishpami, mañac shamuni” ninguichicmanchari.

⁷ Chashna nicpi, ucumanta huasiyucca: “Pungu huichcashcami. Huahuacunahuanmi sueñucuni. Mañashcata cungapac mana jatari pudinichu” ninmanchari.

⁸ Mana paipac ricsishca cashcamantachu mañashcata cungapac jatarinman, ashtahuanpish ama cayashpa piñachichunmi, jatarishpa mañashcata cunman.

⁹ Chaimantami ñucaca nini: Diosta mañaichic, paica cungami. Mashcaichic, taringuichicmi. Huasiyuc nichic, paica pascangami.

¹⁰ Maijanpish mañacca japinmi. Maijanpish mashcacca tarinmi. Maijanpish cayactaca chasquingami.

¹¹ ¿Maijan taita, huahua tandata mañacpica, rumita cunguichicmanchu? ¿Cutin challuata mañacpica, culebrata cunguichicmanchu?

¹² ¿Ruruta mañacpica, alacranta cunguichicmanchu?

¹³ Cancuna mana alli cashpapish, huahuacunamanca allitami cunguichic. Ashtahuanpish jahua pacha Dioscarin, jucha illac Espiritutami mañacpica cunga— nirca.

Jesustaca “diablohuanmi cangui” nishcamanta

¹⁴ Jesusca shuc runamantami supaita llucchishpa cachacurca. Chai runataca supaimi upata ruhuashca carca. Supaita llucchishpa cachacpica, chai runaca rimarircami. Chaimantami chaipi caccunaca yallita macharishpa saquirirca.

¹⁵ Cutin maijancunaca: —Supaicunata mandac Beelzebuhuan cashpami, supaicunataca llucchishpa cachan— ninacurca.

¹⁶ Maijancunaca Jesusta pandachisha nishpami: —Jahua pacha Dios cachashca cashpaca, milagrota ruhuai— nirca.

¹⁷ Jesusca paicuna imata yuyacucta yacharcami. Chaimantami: —Maijan llactapi jatun mandaccunapura piñanacushpa raquirinacucpica, chai llactaca chingarinmanllami. Shuc huasipi causaccunapura piñanacushpaca, llaqui tucunmanllami.

¹⁸ Satanás paicunapura piñanacucpica, ¿manachu pai mandacucca chingarinmanlla? Chaica, cancuna ñucata: “Beelzebuhuan cashpami, supaicunata llucchishpa cachan” nishcamantami chashna nini.

¹⁹ Ñuca Beelzebuhuan cashpa, supaicunataca llucchishpa cachacpica, ¿cancunapac yachacuccunaca pipac poderhuantac llucchishpa cachan? Chaimanta paicunallatacmi cancuna pandaricushcata ricuchin.

²⁰ Ashtahuanpish ñucaca Diospac poderhuanmi supaicunata llucchishpa cachani. Chashna ruhuashpaca, cancunapurapi Dios mandai callarishcatami ricuchicuni.

²¹ Shuc sinchi runa macanacunahuan huasita cuidacucpica, huasipi ima tiyashcacunataca pi mana shuhuangachu.

²² Ashtahuanpish paimanta ashtahuan sinchi runa shamushpaca, paita atishpa, macanacunatapish quichushpa, ima charishcacunatapish chaupinacunmanllami.

²³ Maijanpish mana ñucahuan tandaricca, ñucata piñacmi. Maijanpish mana ñucahuan tandachicca, ñuca tandachishcatapish shic-huashpa cachacmi.

Supai cutimuc cashcamanta

²⁴ Runamanta supai llucshishpaca, shitashca pambacunapimi samarinata mashcashpa purin. Samarinata maipi mana tarishpaca: “Ñuca maipimi punta causacurcani, chaillamantac cutishalla” nishpami yuyarin.

²⁵ Ña cutimushpaca, pichashpa sumacta allichishcatami tarin.

²⁶ Chashna tarishpaca, paita yalli ashtahuan millai canchis supaicunata pushashpami, chai runapica causac shamun. Chaimantami chai runaca ñaupa causacushcata yalli, ashtahuan millai tucun— nirca.

Imamanta cushicuna cashcamanta

²⁷ Jesús chashna huillacucpiracmi, gentecunapac chaupimanta shuc huarmi caparishpaca: —¡Canta chuchuchishpa huiñachicca, yallita cushicuchun!— nirca.

²⁸ Chashna nicpimi Jesusca: —Maijanpish Dios rimashcata uyashpa cazuccunami, yallita cushicun— nirca.

Jesusta “milagrota ruhuai” nishcamanta

²⁹ Achca gentecuna ashtahuan tandanacumucpimi, Jesusca: «Cunan punzha causaccunaca millaicunami. Milagrota ruhuachunmi munan. Diosca imata mana ricuchingachu, ashtahuanpish Dios ima nishcata huillac Jonás ima tucushcallatami ricunga.

³⁰ Ima shinami Jonasca Nínive pueblopi causaccunaman yuyarina tucurca, chashnallatacmi Runa Tucungapac shamushca ñucatapish, cunan punzha causaccunaca ricunga.

³¹ Caru Sabá llactata jatun mandac huarmipish, Salomón yachachishcata uyangapacmi shamurca. Cunan ñucaca Salomontapish yallimi caipica cani. Chaimantami Dios taripana punzhapica chai huarmipish cunan punzhapi causaccunataca juchanchishpa llaquichinga.

³² Ninivepi causac gentecunapish Jonás huillacpica, juchayuc cashcamanta llaquirishpa, Diosman cutirircami. Ñucacarin, Jonastapish yallimi caipica cani. Chaimanta Dios taripana punzhapica Nínive pueblopi causaccunapish cunan punzhapi causaccunataca juchanchishpa llaquichinga.

Runapac shunguca luz shina cashcamanta

³³ Pipish luzta japichishpaca pacalla ucupi, mana cashpaca cajonhuan tapangapac churanchu, ashtahuanpish ucuman yaicuccunata achicyachichunmi, pata jahuapi churan.

³⁴ Ñahuica cuerpopac luz shinami. Ñahui alli cacpi, tucui cuerpomi achiclla shina canga, ashtahuanpish ñahui mana alli cacpica, amsapimi causacungui.

³⁵ Cuidaringui, pacta canpi cac luzca amsa canman.

³⁶ Cambac tucui cuerpopi luz tiyashcamanta ima amsa mana tiyacpica, shuc allita achicyachic luz shinami cangui» nirca.

Fariseocunatapish, mandashcacunata yachachiccunatapish Jesús rimashcamanta

³⁷ Parlashca quipami shuc fariseo paipac huasipi micungapac Jesusta pusharca. Jesús chaiman chayashpami mizapi tiyarirca.

³⁸ Fariseoca, Jesús mana maquita jahuashpa micucta ricushpami yallita mancharirca.

³⁹ Chaimantami Apunchic Jesusca: —Cancuna fariseocunaca vasotapish, platotapish jahuallatami jahuanguichic, ashtahuanpish shungupica shuhuana yuyai, imapish mana allita ruhuana yuyaicunallami canguichic.

⁴⁰ Yuyai illaccuna, ¿manachu Diosca ucutapish, jahuatapish ruhuarca?

⁴¹ Cancunaca imalla charishcata huacchacunaman caraichic. Chashna cushpami jahuashca shina chuyanlla canguichic.

⁴² ¡Aij, fariseocunalla, cancunaca cashcata ruhuanata, Diosta cuyanata saquishpami, mentata, rudata, ima micuna sachata chungamanta shucta Diosman cunguichic! Chaita ruhuashpapish, cashcata ruhuanata, Diosta cuyanataca mana saquinachu canguichic.

⁴³ ¡Aij, fariseocunalla, cancunaca tandanacuna huasicunapipish, punta alli tiyarinapimi tiyarinata munanguichic! Ñancunapi tupaccuna cuyaihuan alabaduchun munanguichic.

⁴⁴ ¡Aij, mandashcacunata yachachiccunalla, fariseocunalla, cancunaca mishqui shimi, jayac shungucunami canguichic! Cancunaca huañushcacunata enterrashca jutcu shinami canguichic. Chai enterrashca jahuata puriccunaca, ucupi ima tiyashcataca mana yachanchu— nirca.

⁴⁵ Chashna nicpimi, mandashcacunata yachachiccunapuramanta shuc runaca: —Yachachic, can chashna nishpaca, tucui ñucanchictapish rimashcanguimi— nirca.

⁴⁶ Chashna nicpimi Jesusca: —¡Cancuna yachachiccunalla, imachari tucunguichic! Mana aparipac llashac quipitami shuccunaman apachinguichic, ashtahuanpish cancunaca dedollahuanpish chai quipitaca mana ayudashun ninguichicchu.

⁴⁷ ¡Dios ima nishcata huillaccunata enterrashca bovedata allichiccunalla, imachari tucunguichic! Chai huillaccunataca cancunapac ñaupa taitacunami huañuchirca.

⁴⁸ Chashna ruhuashpaca, cancunapac ñaupa ruhuashcacunata ricunguichicmi, shinallatac allitami ruhuashca ninguichicmi. Chaica, cancunapac ñaupa taitacunaca huañuchircami, cutin cancunaca chai enterrashca bovedacunatami allichinguichic.

⁴⁹ Chaimantami Diosca tucuita yachac cashpa: “Ñuca ima nishcata huillaccunatapish, ñuca acllashca huillaccunatapish cachashami. Paicunataca maijantaca huañuchingami, maijantaca llaquichishpa, catingami” nirca.

⁵⁰ Cai pacha callarishcamanta pacha paimanta huillaccunata huañuchishcamantaca, cunan punzha causaccunatami juchanchinga.

⁵¹ Abelta huañuchishca yahuarmanta callarishpa, Zacariasta huañuchishca yahuarcamanmi cunan punzha causaccunataca juchanchinga, chashnami canga. Zacariastaca, Diosta mañana huasipi tiyac altar ladopimi huañuchirca.

⁵² ¡Mandashcacunata yachachiccunalla, imachari tucunguichic! Cancunaca Diosmanta yachana yuyaitaca huichcanguichicmi. Cancunapish mana yachanguichic. Shinallatac shuccuna yachachunpish, mana saquinguichic— nirca.

⁵³ Chashna nicpimi, mandashcacunata yachachiccunapish, fariseocunapish piñarishpa, Jesustaca caita chaita tapushpa, piñachi callarirca.

⁵⁴ Ima mana allita nicpica, juchanchingapacmi chashnaca tapurca.