SAN LUCAS 10 - Dios Rimashcata Quillcashcami

Jesús canchis chungacunata huillachun cachashcamanta

¹ Chai quipami Apunchic Jesusca canchis chungacunata acllashpa, pai chayana pueblocunaman, llactacunaman ishcai ishcaita ñaupachishpa cacharca.

² Paicunataca: «Cosechanaca achcami. Cosechaccunaca ashallami. Chaimanta ashtahuan cosechaccunata cachachun, Chagrayucman mañaichic.

³ Cancunataca atuccunapac chaupita ovejacunata cachac shinami cachani. Cunanca richiclla.

⁴ Cancunaca cucayutapish, cullquitapish, ushutallatapish ama apaichicchu. Ama ñanpi pihuan saludashpa unaiyanguichicchu.

⁵ Mai huasiman chayashpaca: “Cushi causai tiyachun” nishpa, saludanguichic.

⁶ Chai huasipi maijan cushi causaita munac tiyacpica, cancuna nishcaca pactangami. Paicuna mana chasquicpica, cancuna nishcaca mana pactangachu.

⁷ Trabajac runaca pagota japinami can. Chaimanta mai huasipi alli chasquicpica, chaipi imata cushcata micushpa, ubiashpa canguichic.

⁸ Mai pueblopi alli chasquicpica, imalla carashcata micunguichic.

⁹ Chai pueblopi ungushcacuna tiyacpica alliyachinguichic. Paicunataca: “Diosca ñami mandagrin” ninguichic.

¹⁰ Mai puebloman yaicucpi mana chasquishun nicpica, ñanman llucshishpa:

¹¹ “¡Ñucanchic chaquipi catirishca allpatapish, cancuna mana chasquisha nishcata ricuchingapacmi, caillapitac chaspishpa rinchic! Ashtahuanpish Diosca ñami cancunata mandagrin. Chaitaca allita yuyarinami canguichic” ninguichic.

¹² Ñucaca: Taripana punzhapica, Sodoma pueblopi causaccunata yallimi chai pueblopi causaccunaca llaquita apanga.

Jesús huillashcata mana cazuccunamanta

¹³ ¡Aij, Corazín pueblolla! ¡Betsaida pueblolla, imachari tucunguichic! Cai pueblocunapi ruhuashca milagrocunata Tiro pueblopi, Sidón pueblopi ñuca ruhuashca cacpica, paicunaca sharpa churanata churarishpa, uchupapi tiyarishpa, llaquirishpa Diosman cutirinmanmi carca.

¹⁴ Taripana punzhapica Tiro pueblopi, Sidón pueblopi causaccunamanta yallimi llaquita apanguichic, ninimi.

¹⁵ Capernaúm pueblopi causac, cancunaca jahua pachamantami yuyacunguichic, ashtahuanpish ucu pachamanmi shitashca canguichic» nirca.

¹⁶ Jesusca paipac yachacuccunataca: «Cancuna ima nishcata uyacca, ñucatami uyan. Cancunata piñacca, ñucatami piñan. Ñucata piñacca, ñucata cachac Taitatami piñan» nirca.

Jesús cachashca canchis chungacuna cutimushcamanta

¹⁷ Canchis chungacuna cushicuihuan cutimushpaca: —Apunchic Jesús, cambac shutipi nicpica, supaicunapish cazunmi— nirca.

¹⁸ Chashna nicpimi Jesusca: —Ari, Satanastaca relampa shina jahuamanta urmactami ricurcani.

¹⁹ Cancunamanmi culebracunatapish, alacrancunatapish saruchun poderta cuni. Ima millaitapish atinguichicmi. Cancunataca mana imata ruhuangachu.

²⁰ Shina cacpipish, ama supaicuna cazushcallamanta cushicuichicchu, ashtahuanpish cancunapac shuticuna jahua pacha libropi quillcashca cashcamanta cushicuichic— nirca.

Jesús cushicushcamanta

²¹ Chai ratollatacmi, Jesusca Diospac Espíritu cushichicpi, yallita cushicushpaca: «Jahua pachatapish, cai pachatapish Mandac ñuca Taitalla, cantaca alli ninimi. Canca cai yachanacunataca alli yuyaiyuc, alli yachaccunamanta pacashpami, huahuacuna shinaman ricuchishcangui. Ari, Taitito, chaitami ruhuasha nishcangui.

²² Ñuca Taitaca tucuitami ñucaman curca. Ñuca pipac Churi cashcataca pi mana yachanchu, ñuca Taitallami yachan. Ñuca Taita pi cashcatapish pi mana yachanchu, ñucallami yachani. Pipish ñuca yuyaita cucllapimi, ñuca Taita pi cashcataca yachancuna» nirca.

²³ Jesús yachacuccunallata cayashpaca: —Cunan ricucushcata ricuccuna cushicuichic.

²⁴ Cai cancuna ricushcataca tauca Diosmanta ñaupa huillaccunapish, jatun mandaccunapish ricunata munarcami. Chashna munashpapish manatac ricurcacunachu. Cancuna uyacushcata uyanata munacushpapish, manatac uyarcacunachu— nirca.

Samaria llacta alli runamanta

²⁵ Mandashcacunata shuc yachachic shayarishpa, Jesusta pandachisha nishpa tapushpaca: —Yachachic, huiñai causaita charingapacca, ¿imatatac ruhuana cani?— nirca.

²⁶ Chashna nicpimi Jesusca: —Dios quillcachishpa mandashcacunapica, ¿imata ruhuachun nishcatatac ricungui?— nirca.

²⁷ Shina nicpimi, chai yachachicca: —Chaipica: “Tucui shunguhuan, tucui almahuan, tucui yuyaihuan, tucui munaihuan canta Mandac Diosta cuyangui. Can quiquinta shina, shuccunatapish cuyangui” ninmi— nirca.

²⁸ Shina nicpimi Jesusca: —Allitami ningui. Caicunata pactachishpaca, huiñai causaita charinguimi— nirca.

²⁹ Chashna nicpipish, chai yachachicca mana upalla saquirircachu. Chaimantami: —¿Pi shuctatac cuyana cani?— nirca.

³⁰ Chashna nicpimi Jesusca: —Shuc runa Jerusalenmanta Jericó puebloman shamucucpimi, shuhuaccuna imalla charishcacunata quichushpa, macashpa huañunallata saqui rirca.

³¹ Chashna huañunalla siricucpipish, shuc cura chai ñanta shamushpaca, caru caruta pasarcallami.

³² Shuc Levita runapish chai ñanta shamushpa, chai siricuc runata ricushpaca pasarcallami.

³³ Ashtahuanpish Samaria llacta shuc runa chai ñanta shamushpa, chai siricuc runata ricushpaca, yallita llaquirircami.

³⁴ Chaimantami runapacman cuchuyashpa, chugrita aceitehuan, vinohuan jambishpa, pañohuan pilluchirca. Chashna ruhuashpaca, paipac burropi tiyachishpami, pozana huasiman apashpa cuidarca.

³⁵ Cayandi punzha rishpaca, ishcai denario cullquita chai huasiyucman cushpami: “Cai runata cuidangui. Cai cullqui faltacpica, ñuca cutimushpaca cutichishallami” nirca.

³⁶ Cambac yuyaipica, chai quimsa runamantaca, ¿maijantac chai shuhuaccuna macashca runataca quiquinta shina cuyashca?— nishpa tapurca.

³⁷ Chashna tapucpimi paica: —Chai huañunalla runata llaquic runayari— nirca. Shina nicpimi Jesusca: —Canpish chashnallatac cuyashpa causagri— nirca.

Jesús ñañandi Martapac, Mariapac huasiman rishcamanta

³⁸ Jesús ricushpami, uchilla llactaman chayarca. Chaipimi Marta shuti huarmi paipac huasipi Jesusta chasquirca.

³⁹ Martaca María shuti ñañatami charirca. Mariaca Jesuspac ñaupapimi yachachishcata uyashpa tiyacurca.

⁴⁰ Martaca caita chaita ruhuana yuyaillami ucupica carca. Chaimantami Jesuspacman cuchuyashpaca: —Apunchic Jesús, ñuca ñaña cai tucui ruhuanacunata ñucallaman saquishcataca, ¿manachu ricungui? Ñucata ayudachun cachaiyari— nirca.

⁴¹ Ashtahuanpish Jesusca: —Marta, Marta, canca ucupi imata ruhuanacunallapimi yuyacungui.

⁴² Tucuimanta yallica, shucllatami ruhuana cangui. Mariaca allitami yuyarishca. Pai chashna uyasha nictaca, pi mana jarcangachu— nirca.