SAN LUCAS 1 - Dios Rimashcata Quillcashcami

Teofiloman Lucas quillcashcamanta

¹ Tauca runacunami cai ñucanchic llactapi ima tucushcacunataca, callarimanta allita quillcasha nicurca.

² Callarimanta chaicunata quiquin ñahuihuan ricuccunami huillarca. Paicunaca Diospac shimita huillaccunami carca.

³ Alli nishca Teofilolla, ñucapish tucui chaicunata callarimanta alli tapushpa, yachac chayashpami, canman sumacta quillcashpa yachanata yuyacurcani.

⁴ Chashnami canman yachachishcaca cierto cashcata yachangui.

Bautizac Juan huacharinamanta

⁵ Judea llactata jatun mandac Herodes mandacui punzhacunapimi, Abías curacunapuramanta Zacarías curapish causarca. Paipac huarmica Aarón curapac huahua huahuapuramanta Elisabetmi carca.

⁶ Zacariaspish, Elisabetpish Diospac ñaupapi cashcata ruhuashpami, allita causarca. Paicunaca Dios mandashcacunatapish, yachachishcacunatapish tucuita pactachicmi carca.

⁷ Elisabetca mana huahuata chari pudircachu. Chaimantami huahua illaclla carcacuna. Ña yuyaccunapishmi carca.

⁸ Shuc punzhaca, Zacarías curacunapuramanta Diosta mañana huasipi Diospacta ruhuanami pactarca.

⁹ Suerteta ruhuacpica, curacuna ruhuac cashca shinallatac, Diosta mañana huasipi, Diospaclla chicanyachishca ucuman yaicushpa, inciensota rupachinami Zacariasman urmarca.

¹⁰ Pai inciensota rupachicucpica, tucui gentecunami canzha pambapi Diosta mañacurca.

¹¹ Mandac Dios cachashca angelmi altar alli ladopi shayacuc Zacariasman ricurirca.

¹² Chaita Zacarías ricushpaca, manchaihuan imata mana nishpa, upalla saquirirca.

¹³ Ashtahuanpish angelca: —Zacarías, Diosca can mañashcata uyashcami. Ama mancharichu. Cambac huarmi Elisabetca cari huahuatami charinga. Chai huahuataca Juantami shutichingui.

¹⁴ Yallitami cushicunguimi. Achcacunami pai huacharishcamantaca cushicunga.

¹⁵ Paica Diospac ñaupapica alli nishcami canga. Paica vinotapish, machachic yacutapish mana ubiangachu. Mamapac huicsamanta pachami, Diospac Espíritu junda canga.

¹⁶ Achca israelcunatami, Mandac Diospacman cutichimunga.

¹⁷ Juanca Quishpichicpac ñaupatami ringa. Huillac Elías shinami, Diospac Espirituhuan, poderhuan ringa. Paimi taitacunahuan, huahuacunahuan piñanacushcatapish alli allichinga. Mana cazuccunatapish cashcata ruhuanata yachachishpami, yuyaita cunga. Chashnami Quishpichic shamucpica, alli chasquina yuyaita charinga— nirca.

¹⁸ Zacariasca angelta: —Ñucapish, ñuca huarmipish ña yuyacmi canchic. ¿Ima shinatac can huillashca pactanataca yachasha?— nirca.

¹⁹ Shina nicpimi angelca: —Ñucaca Diospac ñaupapi, paita servic ángel Gabrielmi cani. Paimi canman cai alli huillaita huillachun cacharca.

²⁰ Ñuca huillashcaca pactana punzhami pactanga. Ashtahuanpish canca ñuca huillashcata mana crishcamantaca, cambac huahua huacharingacamanmi upayashpa, imata mana rimai pudingui— nirca.

²¹ Chaicamanca, canzhapimi achca gentecuna shuyacurca. Shinallatac Diospaclla chicanyachishca ucupi Zacarías unaiyashcamantami mancharicurca.

²² Zacarías llucshishpaca, imata mana rimai pudishpami, ima tucushcataca señallahuan huillarca. Chaimantami canzhapi cac gentecunaca “Diospaclla chicanyachishca ucupimi imata ricushca canga” nishpa yuyarca.

²³ Zacariasca Diosta mañana huasipi servina punzhacuna ña tucuricpimi, huasiman rirca.

²⁴ Chai quipami, paipac huarmi Elisabetca huicsayuc tucushpa, pichca quillacunata mana maiman llucshishpa huasillapi carca. Paica:

²⁵ «Ñuca mana huahuayuc cashcamanta pipacpish ama pingaichishca cachunmi, Diosca ñucata chashna ruhuashca» nishpami yuyacurca.

Ángel Jesús huacharinata huillashcamanta

²⁶ Elisabet ña sucta quillata huicsayuc cacpimi, Diosca ángel Gabrielta Galilea llacta, Nazaret puebloman cacharca.

²⁷ Davidpac huahua huahuapuramanta Josehuan cazarangapac ari nishca, María solteramanmi huillangapac rirca.

²⁸ María maipi cashcaman ángel yaicushpaca: —María, Dios canhuan cashcamanta cushicui. Canca tucui huarmicunamanta yalli, alli nishcami cangui— nirca.

²⁹ María angelta ricushpa mancharircami. Paipac shungupica, “¿cai rimashcacunaca imatatac nisha nin?” nishpami yuyacurca.

³⁰ Chashna yuyacucpimi angelca: —María, ama mancharichu. Cantaca Diosmi cuyashpa acllashca.

³¹ Canca huicsayuc tucushpami, shuc cari huahuata charingui. Chai huahuataca JESUSTAMI shutichingui.

³² Paica mai alli nishcami canga. Jahua pachapi causac Diospac Churi nishcapishmi canga. Mandac Diosca paitaca ñaupa taita Davidpac mandanapimi churanga.

³³ Taita Jacobopac huahua huahua israelcunatami huiñaita mandanga. Pai mandanaca manatac tucuringachu— nirca.

³⁴ Ángel shina nicpimi Mariaca: —¿Ima shinatac chashna cangayari? Manarac pi carillahuanpish canichu— nirca.

³⁵ Chashna nicpimi angelca: —Diospac Espiritumi shamunga. Jahua pacha Diospac podermi cantaca llandunga. Chaimantami jucha illac huahua huacharinga. Diospac Churi nishcapishmi canga.

³⁶ Mana huahuayuc cambac familia Elisabetca, yuyac cashpapish ña sucta quillatami cari huahuata huicsayuc tucushca.

³⁷ Diosmanca imapish ruhuaipacllami— nirca.

³⁸ Chashna nicpimi Mariaca: —Can nishca shina ñucataca ruhuachunlla. Ñucaca Mandac Diosta servicmi cani— nirca. Shina nicpica, angelca paipac ñaupamanta rircallami.

Elisabetta María ricugrishcamanta

³⁹ Chai punzhacunapica Mariaca, Judea llacta urcucuna chaupipi tiyac shuc pueblomanmi utca rirca.

⁴⁰ Zacariaspac huasiman yaicushpami Elisabettaca: —¿Allillachu cangui?— nirca.

⁴¹ María rimashca uyarincami Elisabetpac huicsapica huahua cuyurirca. Diospac Espiritupish Elisabetpacman shamurcami.

⁴² Chaimantami sinchita caparishpaca: —Canca tucui huarmicunamanta yalli, Dios alli nishcami cangui. Cambac huicsapi cac huahuapish, alli nishcami.

⁴³ ¿Ima shinatac ñucata Mandacpac mamaca ricuc shamunguiyari?

⁴⁴ Can ‘allillachu cangui’ nincami, ñuca huicsapi cac huahuaca cuyurirca.

⁴⁵ Canca Dios nishca pactanatami crishcangui. Chaimanta cushicui— nirca.

⁴⁶ Chaimantami Mariaca: «Ñuca yuyaimi Diostaca ‘allimari cangui’ nicun.

⁴⁷ Ñuca almapish ñucata Quishpichic Diosmantami cushicun.

⁴⁸ Diosca huaccha servic huarmitami acllashca. Cunanmanta pachami huahua huahuacuna ñucataca ‘allimari cangui’ nicunga.

⁴⁹ Imatapish ruhuaclla Diosca mancharinacunatami ruhuashca. Paica jucha illacmi.

⁵⁰ Diosca paita manchaccunataca huahua huahuacaman llaquicungallami.

⁵¹ Paipac maquihuanmi mancharinacunata ruhuashca. Jatun tucushcacunapac yuyaitapish chingachishcami.

⁵² Jatun mandaccunata mandanamanta anchuchishcami. Huacchacunatami jahuaman churashca.

⁵³ Yarcaihuan caccunamanca, allicunatami achcata carashca. Chayuccunataca, chushac maquitami cachashca.

⁵⁴ Paita servic israelcunata llaquinata mana cungarishcachu. Chaimantami ayudashca.

⁵⁵ Chashna llaquingapacmi taita Abrahamhuanpish, paipac huahua huahuacunahuanpish huiñaicaman ari nishca» nirca.

⁵⁶ Mariaca Elisabethuan quimsa quilla shinata cashpami, paipac huasiman cutirca.

Bautizac Juan huacharishcamanta

⁵⁷ Elisabetca sajuarina punzha pactacpica, cari huahuatami charirca.

⁵⁸ Chaita uyashpaca, Dios cuyac cashcata yachashpami, vecinocunapish, paipac familiacunapish Elisabethuan cushicungapac rirca.

⁵⁹ Ña pusac punzhapimi chai huahuata circuncisionta ruhuachingapac rircacuna. Chashnami taitapac shuti Zacariasta shutichishun nirca.

⁶⁰ Shina nicucpimi Elisabetca: —¡Mana! Juan shutimi canga— nirca.

⁶¹ Chashna nicpica: —¿Imamantatac chaita shutichisha ningui? Cancunapurapica, Juan shutica mana tiyanchu— nirca.

⁶² Chaimantami taitata señallapi huahua ima shuti canamanta tapurca.

⁶³ Shina tapucpimi, taita Zacariasca uchilla tablata mañashpa: “Juan shutimi canga” nishpa quillcarca. Chaimantami tucui gentecuna mancharirca.

⁶⁴ Chai ratomi callu huatarishca cachariricpi, Zacariasca Diosta: «allimari cangui» nirca.

⁶⁵ Chashna tucucpica, tucui vecinocunami yallita mancharirca. Chaica tucui Judea llacta urcucunapimi yacharirca.

⁶⁶ Tucui chaita uyaccunaca: «Cai huahua jatunyashpaca, ¿imalayashi canga?» nishpami, shungullapi yuyacurca. Mandac Diosmi chai huahuahuan carca.

Chai huahua ima shina canata Zacarías huillashcamanta

⁶⁷ Juanpac taita Zacariasca Diospac Espíritu yuyaita cucpi, ima shina canamanta huillashpaca:

⁶⁸ «Israelcunata Mandac Diosca alli nishca cachun. Paimi pai acllashcacunata quishpichingapac shamushca.

⁶⁹ Diosta servic Davidpac huahua huahuapuramanta, imatapish ruhuaclla Quishpichicta cachashca.

⁷⁰ Pai ima nishcata huillac, jucha illac huillaccunamanmi, utcaman huillachishca carca.

⁷¹ Paicuna huillashca shinami, ñucanchicta piñashpa mana ricunayachiccunapac maquimanta quishpichinga.

⁷² Ñaupa taitacunata llaquishpa, paipac sumac ari nishcata mana cungarishpa pactachicungami.

⁷³ Diosmi ñucanchic taita Abrahamhuan ari nishcataca pactachishca.

⁷⁴ Ñucanchic imata mana manchashpa, paipacta ruhuac cachunmi, piñaccunapac maquimanta cacharichinga.

⁷⁵ Tucui ñucanchic causaipi paipac ñaupapi allillata ruhuashpa, causachunmi, chashna cacharichinga.

⁷⁶ Ñuca huahualla, canca jahua Dios ima nishcata huillacmi cangui. Canmi Quishpichic purina ñanta allichishpa ñaupangui.

⁷⁷ Pai acllashcacunapac juchacunata perdonashca cachunmi, quishpirinamanta yachachingui.

⁷⁸ Ñucanchic Diosca, pai cuyashcamantami, tutamanta inti achicyamucuc shina, quishpirinata jahua pachamanta cachanga.

⁷⁹ Amsapi causaccunatapish, purapi huañunalla causaccunatapish achicyachishpami, ñucanchicta sumac causai ñanta pushangami» nirca.

⁸⁰ Chai huahuaca huiñashpami Diosmanta ashtahuan yachacushpa, israelcunaman huillana punzha pactangacaman shitashca pambapi causarca.