LEVÍTICO 9 - Dios Rimashcata Quillcashcami

Aarón Diosta servi callarishcamanta

¹ Pusac punzhapimi Moisesca Aarontapish, paipac churicunatapish, israelcunata pushac yuyaccunatapish

² cayashpami, Moisesca Aarontaca: «Juchata pichachun Diosman cungapacca shuc becita, tucuita rupachingapacca ima mana tucushca cari ovejata apamungui. Chaicunataca Diospac ñaupaman apamushpa cungui.

³ Cutin israelcunataca: “Juchata pichachun Diosman cungapacca shuc cari chivota, tucui rupachingapacca shuc huatayuc becita, cari ovejata apamuichic.

⁴ Dios-huan alli tucungapacca shuc huagrata, shuc cari ovejata apamushpa, paipac ñaupapi huañuchichic. Grano ofrendataca aceitehuan chapushpa apamuichic. Mandac Diosca cunanmi cancunamanca ricurigrin” ningui» nirca.

⁵ Moisés mandashca shinami, Mandac Dios-huan tupana huasi ñaupaman apamurca. Tucui israelcuna Mandac Diospac ñaupapi tandanacushpa shayacucpimi,

⁶ Moisesca: «Caita apamuchunca, Mandac Diosmi mandarca. Mandac Dios sumaimana achic nicucta ricurichunca chashnami ruhuana canguichic» nirca.

⁷ Shinallatac Moisesca Aarontaca: «Mandac Dios mandashca shina altarman cuchuyai. Juchata pichachun Diosman cushcatapish, tucui rupachina animaltapish rupachi. Cambac juchacunatapish, israelcunapac juchacunatapish Dios perdonachu cui. Mandac Dios mandashca shina, israelcuna Diosman cushcatapish rupachi» nirca.

⁸ Aaronca altarman cuchuyashpami, paipac juchacunamanta Diosman cushpa, becita huañuchirca.

⁹ Aaronpac churicunaca chai yahuarta apashpa, dedota yahuarpi satishpami altar gachucunapi cahuirca. Cutin puchu yahuartaca altar chaquipimi tallirca.

¹⁰ Mandac Dios Moisesta mandashca shinallatacmi juchata pichachun cushca animal huiratapish, riñoncunatapish, yana shungu huiratapish altarpi rupachirca.

¹¹ Ashtahuanpish aichataca carandimi carpa huasimanta caruman apashpa rupachirca.

¹² Aarón tucui rupachina animalta huañuchicpimi paipac churicunaca yahuartaca Aaronman curca. Paica altar muyundipimi chiraparca.

¹³ Chai quipaca Aaronca chai huañushca animalta pitinacushpami umandi Diosman cushpa, tucuita altarpi rupachirca.

¹⁴ Chunzhullitapish, changacunatapish jahuashpami, tucuita rupachina altarpi rupachirca.

¹⁵ Chai quipaca Aaronca israelcuna cushca ofrendatapish curcami. Ñaupaman ruhuashca shinallatacmi israelcuna paicunapac juchacunamanta Mandac Diosman cushca chivota huañuchishpa curca.

¹⁶ Ima shina Diosman cushpa tucui rupachina cashca shinallatacmi rupachirca.

¹⁷ Chai quipaca tutamanta Diosman cushpa, tucuita rupachishca jahuami maqui junda grano ofrendata japishpa, altarpi rupachirca.

¹⁸ Shinallatac israelcuna Dios-huan alli tucungapac apamushca huagratapish, cari ovejatapish huañuchishpami, Diosman curca. Chai yahuartaca paipac churicuna apamucpipimi, paica altar muyundipi chiraparca.

¹⁹ Chashnami huagra huiratapish, cari oveja huiratapish, chupatapish, chunzhulli tapashca huiratapish, riñón huiratapish, yana shungu huiratapish curcami.

²⁰ Chaicunataca chai animalpac pecho aicha jahuapimi churarca. Shinami chai huiraca altarpi ruparca.

²¹ Mandac Dios Moisesta mandashca shinallatacmi Aaronca chai pecho aichatapish, alli lado changatapish cuyuchishpa Diosman curca.

²² Israelcuna paicunapac juchacunamanta Diosman cushcatapish, tucui rupachina animaltapish, Dios-huan alli tucungapac cushca animaltapish Diosman cushca quipami maquita alzashpa, israelcunata bendiciashpa, altar cuchumanta anchurirca.

²³ Chai quipaca Dios-huan tupana huasi ucumanmi Moisespish, Aaronpish yaicurca. Chaimanta llucshishpa, israelcunata bendiciacpimi, Mandac Diospac sumaimana achiclla ricurirca.

²⁴ Mandac Diospac ñaupamanta nina llucshimushpami, tucui rupachina animal aichatapish, altar jahuapi churashca huiratapish tucui rupachirca. Caita ricushpaca, tucui israelcunami cushicushpa, pambacaman cumurishpa, Mandac Diostaca allimari cangui nirca.