LEVÍTICO 8 - Dios Rimashcata Quillcashcami

Aarontapish, paipac churicunatapish Diospac cachun chicanyachishcamanta

¹ Mandac Dios Moisesta rimashpaca:

² «Aarontapish, paipac churicunatapish pushamui. Shinallatac curacunapac churanatapish, cahuina aceitetapish, becitapish, ishcai cari ovejatapish, uchilla taza levadura illac tandatapish apamui.

³ Chaimantaca tucui israelcunata ñucahuan tupana huasi pungupi tandachi» nirca.

⁴ Moisesca Mandac Dios mandashca shinallatacmi israelcunataca Dios-huan tupana huasi pungupi tandachirca.

⁵ Chaipimi Moisesca israelcunataca: «Mandac Diosca caitami ruhuachun nin» nirca.

⁶ Chai quipami Moisesca Aarontapish, paipac churicunatapish cayashpa, yacuhuan armachishpa,

⁷ curacunapac churanata churachishpa chumbillichirca. Chashnallatac ucuta tunicata, jahuataca efodta churachishpami, efod huatullahuantac huatachirca.

⁸ Chai quipaca pectoralta churachishpami, jahuapica Urimta, Tumimta churachirca.

⁹ Cutin umapica mitrata churachishpami, ñaupamanca Diospaclla cashcata ricuchishpa, curi latapi quillcashpa churarca. Moisesca Mandac Dios mandashca shinallatacmi ruhuarca.

¹⁰ Moisesca Dios-huan tupana huasitapish, chaipi tiyaccunatapish aceitehuan cahuishpami Diospacllata ruhuarca.

¹¹ Chai aceitellahuantacmi altar jahuapi canchis cutin chiraparca. Altarpi tiyaccunatapish, jatun pailatapish, pailata tiyachinatapish aceitehuan cahuishpami Diospacllata ruhuarca.

¹² Moisesca Aaronpac umapi aceiteta tallishpami, Diospaclla curata ruhuarca.

¹³ Moisesca Mandac Dios nishca shinallatacmi Aaronpac churicunata cayashpa, curapac churanata churachishpa, chumbillichishpa, umapica mitrata churachirca.

¹⁴ Moisesca juchata pichana becita apamuchunmi mandarca. Chai becipac umapi Aaronpish, paipac churicunapish maquita churacpimi,

¹⁵ Moisesca chai becita huañuchishpa, yahuarpi dedota satishpa, Diosman cushpa rupachina altar gachucunapi cahuishpa, Diospacllata ruhuarca. Puchu yahuartaca altar chaquipimi tallirca. Shina tallicpimi, chai altarca Dios-huan alli tucungapac rupachina altar saquirirca.

¹⁶ Moisesca animalpac chunzhulli tapashca huiratapish, yana shungu huiratapish, riñón huiratapish llucchishpami altarpi rupachirca.

¹⁷ Mandac Dios nishca shinallatacmi beci caratapish, aichatapish, huanutapish carpa huasimanta canzhaman apashpa rupachirca.

¹⁸ Quipaca tucui huañuchina cari ovejatami apamuchun mandarca. Chai animalpac umapimi Aaronpish, paipac churicunapish maquita churarca.

¹⁹ Chashna churacpimi, Moisesca chai ovejata huañuchishpa, yahuartaca altar jahua muyundipi chiraparca.

²⁰ Moisesca huañuchishpa, pitinacushpami huirandi, umandi rupachirca.

²¹ Chunzhullitapish, changacunatapish yacuhuan jahuashpami tucuita rupachirca. Moisesca Mandac Dios mandashca shinallatacmi paiman mishquilla ashnachun, tucui rupachirca.

²² Chaimantaca Diospacllata tucuna ovejatami apamuchun mandarca. Chai ovejapac uma jahuapimi Aaronpish, paipac churicunapish maquita churarca.

²³ Chai quipami Moisesca chai ovejata huañuchishpa, yahuarta japishpa, Aaronpac alli ringritapish, alli maqui mama dedotapish, alli chaqui mama dedotapish cahuirca.

²⁴ Shinallatac Moisesca Aaronpac churicunata cayachishpami paicunapac alli lado ringripipish, alli maqui mama dedopipish, alli chaqui mama dedopipish yahuarhuan cahuirca. Chai puchushca yahuartaca altar muyundipimi chiraparca.

²⁵ Chaimantaca chupatapish, chunzhulli tapashca huiratapish, yana shungu huiratapish, ishcai riñón tapashca huiratapish, alli lado changatapish japircami.

²⁶ Mandac Diospac ñaupapi tiyacuc tazamanta levadura illac tandatapish, aceitehuan ruhuashca shuc tortatapish, shuc galletatapish chai animalpac alli lado changa jahuapi, huira jahuapi churarca.

²⁷ Chashnami Aaronpac maquipipish, paipac churicunapac maquipipish churarca. Paicunami cuyuchishpa, Mandac Diosman curca.

²⁸ Quipaca paicunapac maquimanta japishpami, Moisesca Diosman cushpa, tucuita rupachina altarpi rupachirca. Chaicunami Aarontapish, paipac churicunatapish Diospaclla cachun chicanyachingapac rupachinaca carca. Chashna rupachicpimi, Diosmanca mishquillata ashnacuc chayarca.

²⁹ Moisesca pecho aichata japishpami, cuyuchishpa Diosman curca. Chaica cuyuchishpa cushca ofrendami carca. Mandac Dios mandashca shinami, Diospaclla tucungapac cushca oveja aichaca Moisés japina carca.

³⁰ Chai quipami Moisesca altarpi tiyac yahuartapish, cahuina aceitetapish japishpa Aaronpipish, paipac churicunapipish, paicunapac churanacunapipish chiraparca. Chashna ruhuacpimi, Aaronpish, churicunapish, churanacunapish Diospaclla saquirirca.

³¹ Moisés Aarontapish, paipac churicunatapish rimashpaca: «Dios-huan tupana huasi yaicunapi aichata yanushpa, Diospaclla cachun chicanyachina tazapi cac tandahuan chaillapitac micuichic. Chaicunataca ñucami: “Aarón, paipac churicunahuanmi micunga” nishpa mandarcani.

³² Chai puchushca aichatapish, tandatapish ninapi rupachinguichic.

³³ Dios-huan tupana huasi pungumantaca canchis punzhacaman ama llucshinguichicchu. Diospaclla chicanyana punzhaca canchis punzhacamanmi canga.

³⁴ Cunan ruhuashca shinallatac ruhuachunmi, Mandac Diosca cancunapac juchamanta cuchun mandarca.

³⁵ Dios-huan tupana huasi pungumantaca canchis punzhacaman ama anchuringuichicchu. Tutapish, punzhapish chaipi canguichic. Cancuna mana huañungapacca, cai mandashcacunatami pactachina canguichic. Mandac Diosca chashnami ñucataca mandarca» nirca.

³⁶ Aaronpish, paipac churicunapish Mandac Dios Moisesta mandashca shinallatacmi ruhuarca.