LEVÍTICO 7 - Dios Rimashcata Quillcashcami

¹ Pandarishcamantaca cashnami Diosmanca ofrendata cuna can. Chai ofrendaca Diospaclla chicanyachishcami.

² Tucui rupachina animalta huañuchinallapitacmi pandarishcamanta cushca animaltapish huañuchina can. Chai yahuartaca altar jahua muyundipimi chirapana can.

³ Chai animalpac huiratapish, chupatapish, chunzhulli tapashca huiratapish,

⁴ ishcai riñonta tapashca huiratapish, lomopi tiyac huiratapishmi, yana shungu tapashca huirahuan rupachinga.

⁵ Chaitaca curami Mandac Diosman cushpa, altarpi rupachinga. Caimi pandarishcamanta Diosman cunaca.

⁶ Chai ofrendaca Diospaclla chicanyachishcami. Chaimantami curacunalla Diospaclla chicanyachishca pushtupi micuna can.

⁷ Juchamanta animalta cushpa rupachic shinallatacmi pandarishcamantapish ruhuana can. Chaicunata ruhuangapacca shuclla mandashcami tiyan. Chai ofrendataca rupachic curami japinga.

⁸ Maijan rupachichun cushca animal carataca rupachic curami japinga.

⁹ Grano ofrendaca hornopi cusashcapish, sartenpi, mana cashpaca callanapi cusashcapish rupachic curapacllatacmi canga.

¹⁰ Grano ofrendataca aceitehuan chapushca cacpipish, mana cashpaca chaquishca cacpipish, Aaronpac churicunami pacta pacta japinga.

¹¹ Mandac Dios-huan alli tucungapacca cashnami ofrendata cuna:

¹² Mandac Diosta pagui nishpa, ofrendata cushpaca, aceitehuan masashca levadura illac tortatapish, aceitepi satishca levadura illac galletatapish harinahuan aceitehuan chapushpami cuna can.

¹³ Diosta pagui ningapacpish, paihuan alli tucungapacpish levadurahuan ruhuashca tortahuanmi cuna can.

¹⁴ Mandac Diosman cushca tucui ofrendacunamantami ashata chicanyachina can. Chaitaca Dios-huan alli tucungapac chirapac curami japinga.

¹⁵ Dios-huan alli tucungapac cushca aichataca cayandi punzhapac mana puchuchishpami, chai cushca punzhallatac micuna can.

¹⁶ Cushami nishcamanta, mana cashpaca quiquin munaimanta cushcatapish chai punzhami micuna can. Shina cacpipish, puchutaca cayandi punzhapish micunallami.

¹⁷ Shina cashpapish, quimsa punzha tucucpica, rupachinami can.

¹⁸ Dios-huan alli tucungapac cushca animal aichata quimsa punzhacaman huacaichishpa micucpica, pai cushcataca Diosca mana chasquingachu, mana yuyaringachu. Chai aichataca mana micunachu, chaita micucca juchayucmi tucun.

¹⁹ Chai aicha tuparishcataca mana micushpa, tucui rupachinami can. Diosman cushca aichataca mana mapayashcacunallami micuna can.

²⁰ Dios-huan alli tucungapac cushca ofrendaca Mandac Diospaclla chicanyachishcami. Chai aichata maijanpish mapayashca cashpapish micucca israelcunapuramanta anchuchishcami canga.

²¹ Maijanpish mapa animalpi, mana cashpaca ima shuctac mapapi tuparishpa, mapayashca runa Mandac Dios-huan alli tucungapac cushca animal aichata micucca israelcunapuramanta anchuchishcami canga» nirca.

²² Mandac Diosca Moisestaca:

²³ «Israelcunataca: “Huagra huiratapish, cari oveja huiratapish, chivo huiratapish ama micunguichicchu.

²⁴ Huañushca animalpac huirata, sacha animal polvoshca animal huirataca imapish shuctac ruhuangapacmi japina canguichic. Ashtahuanpish mana micunachu canguichic.

²⁵ Maijanpish Mandac Diosman cushca animalpac huirata micucca israelcunapuramanta anchuchishcami canga.

²⁶ Chaimanta cancuna maipi causashpapish volac animal yahuarta, sacha animal yahuartaca ama micunguichicchu.

²⁷ Maijanpish animal yahuarta micucca israelcunapuramanta anchuchishcami canga” ninmi ningui» nirca.

Curacuna japina micunamanta

²⁸ Mandac Diosca Moisestaca:

²⁹ «Israelcunataca: “Mandac Dios ñucahuan alli tucungapac animalta rupachishpa cungapacca Mandac Diospac ñaupamanmi apamuna can.

³⁰ Chaitaca quiquin maquihuanmi Mandac Diosman cushpa, rupachingapac apamunga. Chashnami cuyuchishpa cuchun pecho aichatapish, chaipi tiyac huiratapish Diospac ñaupaman apamunga.

³¹ Chai huirataca curami altar jahuapi rupachinga. Cutin pecho aichataca Aaronpac churicunami japinga.

³² Dios-huan alli tucungapac cushca animalpac alli lado changa aichataca curami japinga.

³³ Alli lado changa aichataca Dios-huan alli tucungapac animal huirata, yahuarta cuc curami japinga.

³⁴ Israelcuna ñucahuan alli tucungapac cushca animal pecho aichatapish, alzashpa cushca animalpac changa aichatapish ñucami chasquini. Chaitami Aaronmanpish, paipac churicunamanpish curcani. Cai mandashcacunaca israelcuna huiñaita pactachichun cushcami” ninmi ningui» nirca.

³⁵ Mandac Diosman cushpa, rupachishcataca caicunatami Aaronpish, paipac churicunapish japina can. Caitaca Mandac Diospac cura cangapac chicanyachishca punzhamanta pachami japina carca.

³⁶ Israelcuna Diosman cushca aichataca Mandac Diospac cura cachunmi, aceitehuan cahuishca punzhamanta pacha paicunaman cuchun mandarca. Paicunapac huahua huahuacunapish chashnallatac ruhuachunmi mandarca.

³⁷ Cai mandashcacunami Mandac Diosman animalta cushpa, tucui rupachina, grano ofrendata cuna, juchamanta animalta cushpa huañuchina, pandarishcamanta animalta cushpa huañuchina, Diospaclla chicanyachishca cangapac cuna, shinallatac Dios-huan alli tucungapac cushcacunata ima shina ruhuanacuna can.

³⁸ Tucui cai mandashcacunataca Sinaí urcupimi Mandac Diosca Moisesman huillarca. Israelcuna shitashca pambapi Diosman cuchunmi chashna mandarca.