LEVÍTICO 6 - Dios Rimashcata Quillcashcami

¹ Mandac Dios Moisesta rimashpaca:

² «Maijanpish shuc runapac imata cuidacushpa, mana cashpaca mingai tucushpa charicushcata mana cutichishpa, shuhuashpaca Mandac Diospac ñaupapimi juchayuc tucun.

³ Imata tarishpa, mana cutichishpapish, llullashpa ari nishpapish, maijan juchayuc runa shinallatacmi juchayuc tucun.

⁴ Chaimanta imata mingashcatapish, mañashcatapish, mingai tucushcatapish, imata tarishcatapish,

⁵ llullashpa ari nishpa mana cutichishcatapish cutichinami can. Chaicunataca juchata pichachun animalta Diosman cuna punzhapimi pichcahuan yallita cutichina can.

⁶ Chai juchataca pichachunca, ima mana tucushca cari ovejatami Mandac Dios ñucaman cuna can. Curami chai oveja mashna valishcata ricushpa, juchata pichachun ñucaman cunga.

⁷ Curami chai runapac juchata pichachun Mandac Dios ñucaman cushpa, ñucapac ñaupapi rupachinga. Chashnami chai juchaca perdonashca canga» nirca.

Animalcunata ima shina rupachinamanta

⁸ Mandac Dios Moisesta rimashpaca:

⁹ «Aaronmanpish, paipac churicunamanpish ima shina tucui rupachinata huillai. Tucuita rupachina animalca pacaringacamanmi tucui tuta altar jahuapi rupana can. Ninapish tucui tutami rupashpa, pacarina can.

¹⁰ Chai quipami curaca lino churanata churarishpa, ucutaca calzoncillota churarina can. Chashnami tucui rupashca quipaca uchupata altar jahuamanta anchuchishpa, altar ladopi churanga.

¹¹ Chai quipaca churanata llucchishpa, shuctac churanata churarishpami, uchupataca carpa huasimanta caruman apashpa, chuyanlla pambapi shitanga.

¹² Ninaca altar jahuapica manatac huañunachu can. Cada tutamantami curaca yantata churashpa catinga. Chaimi tucuita rupachina animaltaca rupachinga. Chaipimi ñucahuan alli tucungapac cushca animal huiratapish rupachinga.

¹³ Ninaca altar jahuapica mana huañushpami japiricungalla.

Grano ofrendata cunamanta

¹⁴ Grano ofrendataca cashnami cuna can. Cai ofrendataca Aaronpac churicunami altar ñaupaman apashpa, Mandac Diospac ñaupapi cunga.

¹⁵ Curami chai ofrendamanta asha harinata maquipi japishpa, aceitehuan, inciensohuan altar jahuapi churashpa, yuyarina cachun rupachinga. Chaimi Mandac Diosmanca mishquilla ashnanga.

¹⁶ Chai puchuca Aaronmi paipac churicunandi micunga. Chaitaca levadura illactami Dios-huan tupana huasi canzha pambaman rishpa, Diospaclla chicanyachishca pushtupi micunga.

¹⁷ Chaicunataca mana levadurahuan chapushpa cusanachu. Pandarishpa, juchallishcamanta Mandac Diosman cushcacunaca Diospaclla chicanyachishcami. Paicunallami chaicunataca micuna can.

¹⁸ Shinallatac chaicunataca Aaronpac churicunami micuna can. Diosman cushpa rupachishcataca Aaronpac huahua huahuacuna huiñaita micuchun mandashcami. Shinallatac chaicunapi tuparicca Diospacllami tucunga» nirca.

Curacuna cuna grano ofrendamanta

¹⁹ Mandac Dios Moisesta rimashpaca:

²⁰ «Aaronpish, paipac churicunapish paicunata aceitehuan cahuishca punzhapica, ishcai kilo alli harinatami chaupitaca tutamanta, chaupitaca chishita cuna can. Chaitaca huiñaitami cuna can.

²¹ Chaitaca aceitehuanmi sartenpi cusashpa, chaupishpa cuna can. Chaimi Mandac Dios ñucamanca mishquilla ashnanga.

²² Aaronpac randi aceitehuan cahuishca curami chai ofrendataca tucui rupachinga. Caitaca huiñai huiñaita ruhuachun mandashcami.

²³ Cura cushca ofrendataca tucuimi rupachina. Chaitaca mana micunachu» nirca.

²⁴ Mandac Dios Moisesta rimashpaca:

²⁵ «Aaronmanpish, paipac churicunamanpish juchata pichachun ima shina ofrendata cuna cashcata huillai. Tucuita rupachina altarllapitacmi juchata pichachun cushca ofrendatapish Mandac Dios ñucapac ñaupapi huañuchina can. Chaica Diospaclla chicanyachishcami.

²⁶ Chaitaca juchamanta Diosman cushpa, rupachic curallatacmi Dios-huan tupana huasi canzha pambapi, Diospaclla chicanyachishca pushtupi micunga.

²⁷ Imapish chaipi tuparicca Diospacllami tucunga. Shinallatac churanapi yahuar cahuiricpica, Diospaclla chicanyachishca pushtupimi tacshana can.

²⁸ Chai ofrenda aichata allpa mangapi yanushpaca, chai mangata paquinami can. Cutin bronce mangapi yanushca cashpaca, chai mangataca alli cacushpami jahuana can.

²⁹ Chai ofrendacunaca Diospaclla chicanyachishcami. Chaimantami chai aichataca tucui curacunalla micunga.

³⁰ Juchamanta Dios-huan tupana huasi ucupi tiyac altarman apashca yahuartaca mana micunachu. Chaitaca tucuimi rupachina can.