LEVÍTICO 5 - Dios Rimashcata Quillcashcami

¹ Maijanpish imata ricushca cashpa, mana cashpaca uyashca cashpa, chaita mana huillashpaca juchayucmi tucun.

² Maijanpish mana yachashcamanta mapami nishcacunapi tuparishpaca mapayanmi. Chaica, sacha animal huañushcapi, charina animal huañushcapi, aisarishpa puric animal huañushcapi tuparishpa mapayashpaca, juchayucmi tucunga.

³ Maijanpish mana yachashcamanta mapami nishcacunapi tuparishpa, quipata yachai yachashpaca juchayucmi tucunga.

⁴ Maijanpish alli cashcata, mana alli cashcata manapish yachashpa, quiquin shimihuan ari nishpa, quipata yachac chayashpaca, juchayucmi tucunga.

⁵ Maijanpish maijan caicunapi juchallishca cashpaca, chai juchata ruhuashcata huillashpami,

⁶ Mandac Diosman shuc malta ovejata, mana cashpaca shuc malta chivota cuna can. Chaitaca curami chai runapac juchamanta Mandac Diosman cunga. Shina cucpimi, chai juchataca Diosca perdonanga.

⁷ Mana malta ovejata, mana cashpaca malta chivota charishpaca, ishcai urpita, mana cashpaca ishcai llulla palomatami cuna can. Chaicunamanta shucca juchata Dios pichachun cungapac, shucca tucui rupachingapacmi canga.

⁸ Chaicunataca curami juchamanta cushcatarac Diosman cunga. Chai animaltaca cungata mana tucui pitishpami, ashata cuchushpa huañuchinga.

⁹ Chai yahuartaca altar quingraipimi chirapanga. Puchu yahuartaca altar chaquipimi tallinga. Chaica juchata pichachun Diosman cushcami canga.

¹⁰ Caishuc animaltaca ima shina ruhuana cashca shinallatacmi tucui rupachinga. Shinami curaca maijanpish mana allita ruhuashpa, juchallishcata pichachun Diosman cunga. Chashna ruhuacpimi, Diosca juchacunata perdonanga.

¹¹ Mana ishcai urpita, mana cashpaca ishcai llullu palomata charishpaca, ishcai kilo yalli alli harinatami cuna can. Chai harinaca juchata pichachun Diosman cushcami. Chaimanmi chai harinapica aceitetapish, inciensotapish mana churana can.

¹² Chai harinataca curamanmi cunga. Paimi chaitaca maqui jundata japishpa, Diosman cushcacunahuan tandachishpa, yuyarina cachun, altar jahuapi rupachinga. Chaica juchata pichachun Diosman cushcami canga.

¹³ Chashnami curaca maijan mana allita ruhuashpa juchacunata ruhuashcata perdonachun canga. Chai puchu harinataca curamanmi cuna can” ningui» nirca.

Juchata pichachun cuna ofrendamanta

¹⁴ Mandac Dios Moisesta rimashpaca:

¹⁵ «Maijanpish mana yachashcamanta Mandac Diosman cuna cashcata mana cushpaca juchallinmi. Chaimantaca paipac manadamantami ima mana tucushca shuc cari ovejatami Mandac Diosman cuna can. Chai ovejaca Diospac carpa huasipi tiyac siclos cullqui valishca shinami canga. Chai cullqui vali cacpimi, curaca juchata pichachun Diosman cunga.

¹⁶ Cutin chai ofrendata mana cushcamantaca pichcahuan yallitami curaman cuna can. Chaitami curaca juchamanta cushca cari ovejahuan Diosman cushpa rupachinga. Chashna cucpimi, Diosca chai juchacunataca perdonanga.

¹⁷ Maijanpish mana yachashcamanta Dios ama ruhuachun nishcacunata ruhuashpa, chaita ruhuashcata mana yachac chayashpapish juchayucmi tucunga. Chaimanta llaquichishcami canga.

¹⁸ Chai juchamantaca oveja manadamantami ima mana tucushca cari ovejata, mashna valishcata ricushpa, curaman cuna can. Curami juchamanta Diosman cunga. Chashna cucpimi, Diosca chai juchacunataca perdonanga.

¹⁹ Chaicunaca juchallishpa, Mandac Diosta llaquichishcamanta cushcami» nirca.