LEVÍTICO 4 - Dios Rimashcata Quillcashcami

Juchamanta cuna ofrendamanta

¹ Mandac Diosca Moisestaca:

² «Israelcunataca: “Maijanpish mana yachashcamanta Mandac Dios ñuca ama ruhuanguichu nishpa mandashcacunamanta maijan shucta mana pactachishpa, juchallicca caitami ruhuana can:

³ Aceitehuan cahuishca cura juchallishpa, tucui israelcunata juchayucta ruhuashpaca, ima mana tucushca becitami chai juchata pichachun Mandac Diosman cuna can.

⁴ Chai becitaca Dios-huan tupana huasi yaicunapi Mandac Diospac ñaupapimi maquita becipac umapi churashpa huañuchinga.

⁵ Aceitehuan cahuishca curallatacmi chai beci yahuarta japishpa, Dios-huan tupana huasiman apanga.

⁶ Chai yahuarpi dedota satishpami, Diospaclla chicanyachishca ucuta jarcachishca pañopi canchis cutin Mandac Diospac ñaupapi chirapanga.

⁷ Curallatacmi asha yahuarta japishpa, Dios-huan tupana huasi ucupi tiyac mishquilla ashnacuc incienso rupachina altar gachucunapi cahuinga. Puchushca yahuartaca Dios-huan tupana huasi yaicunapi tiyac tucui rupachina altar chaquipi tallinga.

⁸ Juchata pichana becimantaca chunzhulli huiratapish, chaita tapashca huiratapish,

⁹ ishcai riñontapish, chaita tapashca huiratapish, lomopi huiratapish rupachinami can. Chai riñoncunallahuantacmi yana shungupi huiratapish llucchinga.

¹⁰ Dios-huan alli tucungapac huañuchishca becimanta llucchishca shinallatacmi curaca becimanta huirata llucchishpa, tucuita rupachina altar jahuapi rupachinga.

¹¹ Cutin beci caratapish, umatapish, chaquicunatapish, chunzhullitapish, huanutapish,

¹² carpa huasimanta carupi, uchupata shitana chuyanlla pambapimi yanta jahuapi churashpa rupachinga.

¹³ Tandanacushca israelcuna mana yachashcamanta Mandac Dios ama ruhuachun nishcacunata ruhuashpaca, tucui gentecuna mana yachacpipish, juchayucmi tucun.

¹⁴ Chai jucha yacharicpica, shuc becitami Dios-huan tupana huasi yaicunaman apamuna can.

¹⁵ Chaitaca israelcunata pushac yuyaccunami chai becipac umapi maquita churashpa, Mandac Diospac ñaupapi huañuchinga.

¹⁶ Chaimantaca aceitehuan cahuishca curami beci yahuarta ashata japishpa, Dios-huan tupana huasiman apanga.

¹⁷ Chai yahuarpi dedota satishpami, canchis cutincaman Diospaclla ucuta jarcashca pañopi, Mandac Diospac ñaupapi chirapanga.

¹⁸ Chai yahuarllatatacmi Dios-huan tupana huasipi cac Mandac Diospac ñaupapi tiyac altar gachucunapi chirapanga. Cutin puchutaca Dios-huan tupana huasi yaicunapi Diosman cushpa, tucui rupachina altar chaquipimi tallinga.

¹⁹ Becimanta tucui huirata llucchishpami, altar jahuapi rupachinga.

²⁰ Juchamanta cushca becita shinallatacmi chai becitapish rupachinga. Chashna ruhuacpimi, Mandac Diosca paicunapac juchacunataca perdonanga.

²¹ Chai quipaca punta becita rupachishca shinallatacmi carpa huasimanta canzhaman llucchishpa rupachinga. Chaica tandanacushca israelcunapac juchata pichachun cushca ofrendami canga.

²² Israelcunata maijan pushac mana yachashcamanta Dios ama ruhuachun nishpa mandashcacunata ruhuashpaca juchayucmi tucun.

²³ Chashna juchallishcata yachac chayashpaca, ima mana tucushca chivotami cuna can.

²⁴ Chai chivopac umapi maquita churashpami, tucuita rupachina altar jahuapi, Mandac Diospac ñaupapi huañuchinga. Chaica juchamanta cushcami canga.

²⁵ Chai juchamanta cushpa huañuchishca yahuartaca curami maqui dedohuan apashpa, Diosman cushpa, tucuita rupachina altar gachucunapi cahuinga. Chai puchu yahuartaca chai altar chaquipimi tallinga.

²⁶ Curaca Dios-huan alli tucungapac huañuchishca animalpac huirata shinallatacmi juchamanta cushpa animal huiratapish altar jahuapi rupachinga. Chashna ruhuacpimi, juchacunataca Diosca perdonanga.

²⁷ Maijanpish mana yachashcamanta Mandac Dios ama ruhuachun nishpa mandashcacunata ruhuashpaca juchayucmi tucun.

²⁸ Chashna juchallishcata yachac chayashpaca, ima mana tucushca huarmi chivotami Diosman cuna can.

²⁹ Chai chivopac umapi maquita churashpami, tucuita rupachinallapitac huañuchinga.

³⁰ Chaimantaca curami chai yahuarpi dedota satishpa, Diosman cushpa rupachina altar gachucunapi cahuinga. Cutin puchushca yahuartaca chai altar chaquipimi tallinga.

³¹ Dios-huan alli tucungapac cushca animalmanta llucchic shinallatacmi tucui chai animalpac huirata llucchinga. Chai huirataca curami Mandac Diosman mishquilla ashnachun, altar jahuapi rupachinga. Chashna rupachicpimi, Diosca juchacunata perdonanga.

³² Maijanpish juchamanta cungapacca ima mana tucushca malta ovejatami cuna can.

³³ Chai ovejapac umapi maquita churashpami, tucuita rupachina altarpi huañuchinga.

³⁴ Curami chai animalpac yahuarpi dedota satishpa, Diosman cushpa rupachina altar gachucunapi cahuinga. Chai puchushca yahuartaca chai altar chaquipimi tallinga.

³⁵ Chaitapish Dios-huan alli tucungapac cushca animalmanta huirata llucchishca shinallatacmi curaca llucchishpa, rupachina altarpi rupachinga. Chashna rupachicpimi, Mandac Diosca juchataca perdonanga.