LEVÍTICO 3 - Dios Rimashcata Quillcashcami

Dios-huan alli tucuna ofrendamanta

¹ Maijanpish Mandac Dios-huan alli tucungapacca, mana ima tucushca huagrata, mana cashpaca vacatami cuna can.

² Chai huagra umapi paipac maquita churashpami, Dios-huan tupana huasi yaicunapi huañuchinga. Chai quipaca Aaronpac churi curacunami yahuartaca altar muyundipi chirapanga.

³ Chai quipami Dios-huan alli tucungapac cushca huagratapish, huagra chunzhulli tapashca huiratapish, huicsapi tiyac huiratapish Diosman cushpa rupachinga.

⁴ Shinallatacmi ishcai riñontapish, chaita tapashca huiratapish, lomo huiratapish, riñoncunapish, yana shungu jahua tapashca huiratapish, chunzhulli huiratapish llucchinga.

⁵ Chaicunataca Aaronpac churi curacunami tucui rupachina ofrendahuan altar jahuapi rupachinga. Chaimi Mandac Diosmanca mishquilla ashnanga.

⁶ Maijanpish Mandac Dios-huan alli tucungapac cari ovejata, mana cashpaca huarmi ovejata cashpaca mana ima tucushca alli animaltami cuna can.

⁷ Cutin pactalla ovejata cushpaca Mandac Diospac ñaupaman apamushpami,

⁸ chai oveja umapi maquita churashpa Dios-huan tupana huasi ladopi huañuchinga. Aaronpac churi curacunami chai yahuartaca altar muyundipi chirapanga.

⁹ Mandac Dios-huan alli tucuna ofrendataca lomo tullu tucurinapi pitishpami chupatapish, chaipi tiyac huiratapish, chunzhulli tapashca huiratapish rupachina can.

¹⁰ Shinallatac ishcai riñontapish, chaipi tiyac huiratapish, lomopi tiyac huiratapish, riñoncunatapish, yana shungu huirapish, chunzhulli huiratapishmi rupachinga.

¹¹ Chashnami curaca altar jahuapi rupachinga. Tucui chaicunaca Mandac Diosman cushpa rupachishcami canga.

¹² Chai ofrenda huarmi chivota cacpica, Mandac Diospac ñaupaman apamushpami

¹³ chai chivopac umapi maquita churashpa, Dios-huan tupana huasi ñaupapi huañuchina can. Chai yahuartaca Aaronpac churi curacunami altar jahua muyundipi chirapanga.

¹⁴ Chaimantami Mandac Dios-huan alli tucungapac cushca animaltaca rupachinga. Chunzhulli tapashca huiratapish, huicsapi tiyac tucui huiratapish,

¹⁵ ishcai riñontapish, chaita tapashca huiratapish rupachinga. Chai riñoncunallahuanmi yana shungu huiratapish, chunzhulli tapashca huiratapish rupachinga.

¹⁶ Chaicunataca curami altar jahuapi rupachinga. Chaicunaca micuna ofrendami canga. Chaicunata rupachishcami Diosmanca mishquilla ashnanga. Tucui chaicunaca Mandac Diosman cushcami canga.

¹⁷ Cai mandashcacunaca huiñaipacmi canga. Maipi cashpapish cai mandashcacunata cazushcamantami huiratapish, yahuartapish mana micuna can” ningui» nirca.