LEVÍTICO 27 - Dios Rimashcata Quillcashcami

Diosman cushcacunaca paipaclla cashcamanta

¹ Mandac Diosca Moisesta rimashpaca:

² «Mandac Diosca israelcunataca: “Ñucata servingapac ari nishca runataca shuc runa mashna valic cashcata pagashpami cacharichina can.

³ Chaica, ñucapac carpa huasipi tiyac siclos cullqui valishca shinami pagana can. Ishcai chunga huatamanta sucta chunga huatata charic runamantaca pichca chunga siclos cullquitami pagana can.

⁴ Huarmimantaca quimsa chunga cullquitami pagana can.

⁵ Pichca huatamanta ishcai chunga huatata chariccamanca ishcai chunga siclos cullquita pagana can. Huarmimantaca chunga siclos cullquitami pagana.

⁶ Cutin shuc quillamanta pichca huatata charic huahuamantaca pichca siclos cullquitami pagana can. Huarmimantaca quimsa siclos cullquitami pagana can.

⁷ Sucta chunga huatata charicmanta huichaimanca chunga pichca siclos cullquitami pagana can. Huarmimantaca chunga siclos cullquitami pagana can.

⁸ Ashtahuanpish huaccha cashcamanta mana pagai pudicpica, curapacmanmi apana can. Chaipimi curaca mashnata pagai pudishcata pagachinga.

⁹ Mandac Dios ñucaman shuc animalta cusha nishcaca ñucapaclla chicanyachishcami saquiringa.

¹⁰ Chai animaltaca mana alli animalhuanca mana cambianachu. Alli animalpac randi, mana alli animaltapish mana cunachu. Chashna cambiacpica, ishcaitacmi Diospaclla saquiringa.

¹¹ Mana micuna animal cashcamanta Mandac Dios ñucaman mana cuipaclla cacpica, curapacmanmi apana can.

¹² Curami alli cacta, mana alli cacta ricushpa, mashna valishcata huillanga. Mashna valishcata huillacpica, chai huillashca shinallatacmi saquiringa.

¹³ Chai animalmanta cullquita cusha nishpaca, chai animal mashna valishca cada chunga cullquimanta ishcai cullqui yallihuanmi pagana can.

¹⁴ Maijan cashpapish Mandac Dios ñucaman shuc huasita cucpica, chai huasica ñucapaclla chicanyachishcami saquiringa. Chai huasitaca curami alli cacta, mana alli cacta ricushpa, mashna valishcata huillanga. Mashna valishcata huillacpica, chai huillashca shinallatacmi saquiringa.

¹⁵ Shina cacpipish, chai huasita cucllatac saquichisha nishpaca, chai huasi mashna valishca cada chungamanta ishcai cullqui yallihuanmi pagana can. Chashna ruhuacpica, chai huasica paipacllatacmi saquiringa.

¹⁶ Maijanpish paipac allpamanta asha allpata Mandac Dios ñucapaclla cachun cucpica, chai allpa chunga almud cebada muyu yaicuipac cacpica, pichca chunga siclos cullquimi valin ningami.

¹⁷ Allpata cacharina huatapi Mandac Dios ñucaman chicanyachishpa cucpica, chai valillatacmi saquiringa.

¹⁸ Allpata cacharina huatapi mana cushpa, quipa huatapi cucpica, curami cacharina huatacaman mashna huata tiyacta yupashpa, chai huatacunallamanta mashna valishcata huillanga.

¹⁹ Allpayucllatac saquichisha nishpaca, chai allpa valishca cada chunga cullquimanta ishcai cullqui yallihuanmi pagana can.

²⁰ Maijanpish chai allpamanta mana pagai pudicpi, shucman catucpica, ña mana ashtahuan chai allpataca cutichi pudingachu.

²¹ Allpata cacharina huatapi mana pi japicpica, chai allpaca Diospacllami tucunga. Chaitaca curami japinga.

²² Maijanpish mana herencia allpata, ashtahuanpish randishca allpata Mandac Dios ñucaman cucpica,

²³ curami cacharina huatacaman mashna valina cashcata paihuan parlanacushpa huillanga. Chai allpaca Mandac Dios ñucapaclla cashcamantaca chai punzhallatacmi pagana can

²⁴ Allpata cacharina huatapica chai allpaca punta catucllamantacmi cutina can.

²⁵ Tucui imatapish ñucahuan tupana huasipi tiyac cullqui mashna valishcapimi valichina can. (Chai cullquica ishcai chunga gerasmi valin).

²⁶ Tucui punta huacharishcaca Mandac Dios ñucapacmi. Chaimantami huagrapish, ovejapish ñucapaclla cachun mana chicanyachi pudinga.

²⁷ Ashtahuanpish punta huacharishca animal mana alli cacpica, mashna valina cashcataca ricushpami, preciota churanga. Chaipac jahuapica cada chunga cullquimanta ishcai cullqui yallihuanmi pagana can. Chai animal mashnata valishcata mana pagai pudishpaca, mashna valina cashcallapitac catuchunlla.

²⁸ Maijanpish imata Mandac Dios ñucapac cachun chicanyachishcataca mana catui pudinchu. Shinallatac cullquita cushpapish mana chaihuan saquiri pudinchu. Chashnami gentetapish, animaltapish, allpatapish, ima charishcatapish mana catui pudin. Ñucapaclla chicanyachishcaca ñucapacmi can.

²⁹ Ñucaman cusha nishca runataca cullquita cushpa mana cacharichi pudinchu. Ashtahuanpish paica huañunatacmi can.

³⁰ Chagrapi pucushca granopish, yurapi pucushcapish chungamanta shucca Mandac Dios ñucapacmi. Chaica ñucapaclla chicanyachishcami can.

³¹ Maijanpish chungamanta shucta mana cushpa saquichisha nishpaca, mashna valishca cada chungamanta ishcai cullqui yallihuanmi pagana can.

³² Huagrapish, ovejapish chungamanta shucca Mandac Dios ñucapac taunahuan ricuchishpa yupashcaca ñucapacmi can.

³³ Chaicunataca alli cashcatapish, mana alli cashcatapish mana ricunachu. Allihuan, mana allihuan mana cambianachu. Chashna cambiacpica, ishcaitacmi Mandac Dios ñucapaclla saquiringa. Chai animaltaca pagashpapish mana saquichi pudinchu” ninmi ningui» nirca.

³⁴ Diosca tucui cai mandashcacunatami israelcunaman yachachichun, Sinaí urcupi Moisesman huillarca.