LEVÍTICO 26 - Dios Rimashcata Quillcashcami

Diosta cazuccuna bendiciashca canamanta

¹ Ama shuctac dioscunatapish, imaman ricchacunatapish ruhuanguichicchu. Cancunapac llactapica ama rumimanta ruhuashca dioscunatapish, pintashca rumicunatapish ruhuanguichicchu. Ama chaicunapac ñaupapi cumuringuichicchu. Ñucami cancunata Mandac Dios cani.

² Ñucata yuyarishpa samana punzhata huacaichinguichic. Ñucapaclla chicanyachishca huasitapish ama mapayachinguichicchu. Ñucami Mandac Dios cani.

³ Ñuca yachachishca shina causashpa, ñuca mandashcacunatapish cazucpica,

⁴ tamyana punzhacunapimi tamyachisha. Chashna tamyachicpica, allpapica alli granomi pucunga. Yuracunapish sumac micunatami pucunga.

⁵ Trigota trillana manarac tucuricpimi, uvasta pallana punzhacunaca chayamunga. Uvasta manarac tucui pallacpimi, tarpuna punzhacuna chayamunga. Cancunaca mana nicta micushpami, cancunapac llactapica imatapish mana manchashpa causanguichic.

⁶ Chai llactapica cushi causaitami cusha. Ña mana manchailla sueñunguichicchu. Llaquichic sacha animalcunatapish anchuchishami. Macanacunapish mana tiyangachu.

⁷ Cancunata piñaccunataca manchachishpami callpachinguichic. Cancunapac maquipi urmacpimi, espadahuan huañuchinguichic.

⁸ Pichcallami patsac cancunata piñaccunata manchachishpa cachanguichic. Cancunapuramanta patsacca chunga huarangatami atishpa espadahuan huañuchinguichic.

⁹ Ñucaca cancunata ayudangapac cutimushpami achcata mirachishpa, ñuca ari nishcatapish cancunahuan pactachisha.

¹⁰ Cancunaca ñaupa huatacuna huacaichishca granotami micunguichic. Mauca granota llucchishpami mushuc granota huacaichinguichic.

¹¹ Ñucaca cancunapac chaupipimi causasha, cancunata mana millashachu.

¹² Ñucaca cancunapac Diosmi casha. Cancunahuanmi purisha. Cancunaca ñuca acllashcacunami canguichic.

¹³ Ñucaca cancunata Mandac Diosmi cani. Ñucami cancuna ama ashtahuan servishpa catichun, Egipto llactamanta llucchimurcani. Mana manchashpa causachunmi, chai llactapi huatashca shina causaimanta cacharichircani.

Diosta mana cazuccuna llaqui tucunamanta

¹⁴ Cancuna mandashcacunata mana uyashpa, mana pactachicpi,

¹⁵ ñuca yachachishcacunata millanayachishpa, ñuca quillcachishcacunata yangata ruhuacpi, ñucahuan ari nishcata paquicpica,

¹⁶ ñucapish cancunataca jatun manchaita, rupachic ungüita, cuerpota irquiyachic ungüita cachashpami cancunata llaquichisha. Cancunaca yangami allpapi tarpunguichic. Chai pucushca granotaca cancunata piñaccunami micunga.

¹⁷ Ñucaca cancunata piñashami. Shina piñacpimi, cancunata piñaccunaca atishpa chugrichinga. Cancunata mana ricunayachiccunami manchachishpa changa. Manapish pi ima nicucpimi, miticushpa puringuichic.

¹⁸ Chashna llaquichicpipish manallatac cazucpica, canchis cutin yallihuanmi cancunapac juchamantaca llaquichisha.

¹⁹ Jatun tucushca cancunataca yangallatami ruhuasha. Jahua pachatapish fierro shinata ruhuashpami mana tamyachisha. Cancunapac allpaca bronce shina tucushpami mana pucunga.

²⁰ Cancunaca yangami imatapish ruhuanguichic. Allpapica imapish mana pucungachu, yuracunapish mana pucungachu.

²¹ Cancuna ñucata manallatac uyashpa, mana cazushpa caticpica, canchis cutin yallihuanmi llaquichisha.

²² Piña sacha animalcunata cachashpami, cancunapac huahuacunatapish, animalcunatapish tucuchisha. Shina tucuchicpimi, cancuna purina ñancunapish shitashca saquiringa.

²³ Shina llaquichicpipish, manallatac llaquirishpa, ashtahuanpish millaita ruhuashpa caticpica,

²⁴ canchis cutin yallihuanmi cancunapac juchamantaca llaquichisha.

²⁵ Ñucahuan ari nishcata mana cazushcamantaca ñucapish chashnallatacmi cancunataca espadahuan llaquichiccunata cachashpa llaquichisha. Chai llaquimanta cancunapac llactapi miticugricpipish, jatun ungüita cachashpami, cancunata piñaccunapac maquipi churasha.

²⁶ Cancunapac micunata ñuca chingachicpica, chunga huarmimi shuc hornollapi tandata cusanga. Shina cusashpaca, cancunamanca pezashpami raquinga. Shina raquicpica, cancuna micushpapish mana micushca shinallatacmi saquiringuichic.

²⁷ Chashna tucucpipish, manallatac cazushpa, millaita ruhuashpa caticpica,

²⁸ ñucapish piñarishpami canchis cutin yallihuan cancunapac juchamantaca llaquichisha.

²⁹ Shina ruhuacpica, cancunapac churicunata, ushicunatami micunguichic.

³⁰ Loma jahuapi tiyac altarcunatapish, ruhuashcalla dioscunatapish ñutuchishpa tucuchishami. Cancunataca huañuchishpami cancunapac huañushca dioscunapac jahuapi shitasha. Cancunataca millashami.

³¹ Cancuna causana llactacunataca shitashcatami saquisha. Cancunapac altarcunatapish chingachishami. Cancunapac mishquilla ashnacuc inciensotapish mana chasquishachu.

³² Llactatapish chushacllatami saquisha. Cancunata piñaccuna causangapac shamushpaca, mancharishpami saquiringa.

³³ Cancunataca espadahuan llaquichishpami caita chaita catishpa cachasha. Cancunapac causana llactaca shitashcami saquiringa. Cancunapac causana pueblocunapish llaquinayaitami tucuchishca saquiringa.

³⁴ Cancunata piñaccunapac llactapi cancuna causacucpica, cancunapac allpaca sumactami samaringa. Chashnami allpaca pai samana cashca punzhapi samarishpa cushicunga.

³⁵ Cancuna causacushca huatacunapi mana samarishca cashpami tucui chai shitashca huatacunataca samaringa.

³⁶ Cancunapuramanta saquiriccunaca piñaccunapac llactapimi causanga. Paicunapac shungupi ñuca manchaita churacpimi, shuc yurapi panga huairahuan cuyuricllapipish manchaihuan callpanga. Espadahuan huañuchingapac caticucpi shinami, manapish pi caticucpi, callpashpa urmanga.

³⁷ Manapish pi caticucpimi, espadahuan caticucpi shina, callpashpa caishuc chaishuc huactarishpa urmangacuna. Cancunata piñaccunahuanca mana cariyai pudinguichicchu.

³⁸ Cancunapura macanacushpami tucuringuichic. Cancunata piñac llactacunami cancunataca tucuchinga.

³⁹ Cancunapuramanta mana huañushpa saquiriccunaca piñaccunapac llactapimi paicunapac mana allita ruhuashcamanta, shinallatac paicunapac taitacunapac juchamanta huañungacuna.

⁴⁰ Paicunapac, shinallatac paicunapac taitacunapac mana allita ruhuashcata, ñucata mana cazushpa paicuna munashcata ruhuashcata huillangacuna.

⁴¹ Paicunahuan piñarishpa paicunata piñaccunapac llactaman cachashcata yuyarishpa, llaquirishpa juchata shungumanta ñucaman huillacpica,

⁴² ñucapish Jacobohuan, Isaac-huan, Abrahamhuan ari nishcatapish, allpata cushami nishcatapish yuyarisha.

⁴³ Ashtahuanpish paicuna llucshishpa rishcamantaca allpaca shitashcami saquiringa. Chashna paicuna ricpimi, allpaca samarishpa cushicunga. Cutin paicunaca mana allita ruhuashpa, ñuca mandashcacunata, ñuca yachachishcacunata mana cazushcamantami llaquita apanga.

⁴⁴ Paicuna piñaccunapac llactapi cacpipish, mana saquishachu. Mana jichushachu, mana chingachishachu. Paicunapac taitacunahuan ari nishcatapish mana yangata ruhuashachu. Ñucaca cancunata Mandac Diosmi cani.

⁴⁵ Chaipac randica paicunapac taitacunaman cusha nishcatami yuyarisha. Ñucaca paicunapac Dios cangapacmi tucui llactapi causaccunapac ricuipi Egipto llactamanta llucchimurcani. Ñucami Mandac Dios cani” ninmi ningui» nirca.

⁴⁶ Mandac Diosca tucui pai quillcachishcacunatapish, mandashcacunatapish, yachachishcacunatapish, Moisespish, israelcunapish pactachina cashcata huillachunmi Sinaí urcupi Moisesman curca.