LEVÍTICO 25 - Dios Rimashcata Quillcashcami

Allpata samachina huatamanta

¹ Mandac Dios Sinaí urcupi Moisesta rimashpaca:

² «Israelcunataca: “Ñuca cusha nishca llactaman cancuna yaicushpaca, Mandac Dios ñucata alli ningapacmi allpataca samachina canguichic.

³ Sucta huatatami tarpuna canguichic. Sucta huatatami uvas ramatapish pitina, shinallatac uvasta pallana canguichic.

⁴ Ashtahuanpish canchisniqui huatapica, Mandac Dios ñucata alli ningapacmi imata mana tarpushpa, uvas chagratapish mana allichishpa, allpata samachina canguichic.

⁵ Shinallatac cosechashca quipa iñal chagratapish, ama cosechanguichicchu. Paillatac huiñashca uvas chagratapish ama allichinguichicchu, ama cosechanguichicchu. Chai huataca allpata samachina huatami can.

⁶ Allpaca samana huatacunapish canman, canta servic caricunamanpish, servic huarmicunamanpish, cullquimanta trabajaccunamanpish, caru llacta cancunahuan causac runacunamanpish pucungami.

⁷ Cambac animalcunamanpish, cai allpapi tiyac sacha animalcunamanpish micuna tiyangami.

⁸ Canchis cutin canchis huatata yupanguichic. Shina canchis cutin canchista yupacpica, chuscu chunga canchis huatami tucunga.

⁹ Juchata pichana canchis quilla, chunga punzhapi tucui llactapi trompetapi tocashpa uyachinguichic.

¹⁰ Pichca chunga huata tucucpica, ñucapaclla cachun chicanyachinguichic. Chai huataca huatashca shinamanta cacharina huatami canga. Chaimanta tucui Israel llactapi huillanguichic. Chai huatapica tucuimi quiquin allpaman, shinallatac quiquin familiacunapacman cutinga.

¹¹ Pichca chunga huataca huatashca shinamanta cacharirina huatami. Chai huatapica ama tarpunguichicchu, iñal huiñashca trigotapish ama cosechanguichicchu. Iñal huiñashca uvastapish ama pallanguichicchu.

¹² Ashtahuanpish chai huataca huatashca shina causacushcamanta llucchina huata cashcamanta ñucapaclla chicanyachishcami canga. Chaimanta allpapi paillatac pucushca granollatami micuna canguichic.

¹³ Huatashca shina causacushcamanta llucchina huatapica tucui cancunami quiquin allpaman cutina canguichic.

¹⁴ Cancunapac ricsishcaman allpata catushpa, mana cashpaca randishpaca ama umanguichicchu.

¹⁵ Cacharirishpa cushicuna huatamanta mashna huata cashcata yupashpa paganguichic. Shinallatac catucpish, mashna huatahuan tarpuna cashcata yupashpami catuna can.

¹⁶ Achca huata tarpuna siricpica, achcallatatacmi pagana can. Ashalla huatacuna tarpuna siricpica, ashallatatacmi pagana can. Mashna huatata cosechana cashcata ricushpami catuna can.

¹⁷ Cancunapuramanta maijan cashpapish ama umanguichicchu. Chaipac randica, Mandac Dios ñucata manchaichic. Ñucaca cancunata Mandac Diosmi cani.

¹⁸ Ñuca mandashcacunata cazushpa, ñuca nishcacunata pactachinguichic. Chaita ruhuashpaca, imata mana manchashpami, chai llactapica causanguichic.

¹⁹ Chai llactapica allpapish sumaimana granotami pucunga. Shina pucucpica, huicsa pacta micushpami, mana manchashpa causanguichic.

²⁰ Canchis huata tucucpi, imata mana tarpushpa, imata mana cosechashpaca: ‘¿Imatatac micushunyari’ ninguichicchari?

²¹ Ñucaca suctaniqui huatapi tarpushca chagratami ashtahuan alli pucuchisha. Chaimantami quimsa huatapac micunata charinguichic.

²² Pusacniqui huatapi granota tarpucushpapish iscunniqui huatapi cosechangacamanmi chai granota micunguichic.

²³ Allpaca ñucapacmi. Chaimanta ama tucui causaipac catunguichicchu. Cancunaca shuctac llactamanta shamushpa pozac shinallami canguichic.

²⁴ Chaimanta maijanpac allpata randishpaca chai catucllatac randichunmi saquina canguichic.

²⁵ Cancunapuramanta maijan huaccha cashcamanta allpata catucpica, paipac cuchulla familiami randicman cullquita cutichishpa, chai allpataca saquichina can.

²⁶ Chai catuc runapac cuchulla familia cullquita mana charicpica, paillatacmi cullquita tandashpa, allpata saquichina can.

²⁷ Chai allpata catushca huatamanta yupashpa, tarpuna mashna huatacuna sirishcata yupashpami cutichina can. Shina cutichishpami, cutinllatac chai allpataca saquichinga.

²⁸ Ashtahuanpish allpata cutichingapac mashna valishcata cungapac mana charicpica, chai allpaca huatashca shinamanta cacharirina huatacamanmi chai randicpacllatac canga. Chai huata pactacpimi, chai allpaca paillamantac cutinga.

²⁹ Maijanpish muyundita pircashca llactapi tiyac huasita catushpaca, catushca manarac huata tucucpimi, chai huasita randicman cullquita cutichishpa, huasita saquichina can.

³⁰ Ashtahuanpish huatacaman huasita catuc runa randic runaman cullquita mana cutichi pudicpica, chai huasica randicpac, shinallatac paipac huahua huahuacunapacmi huiñaipac saquiringa. Cacharirina huata pactacpipish, chai huasitaca mana cutinachu can.

³¹ Ashtahuanpish muyundita mana pircashca uchilla llacta huasita catushcaca allpata catushca shinallami. Chai huasitaca cullquita cutichishpa japinata pudinmi. Shinallatac cacharirina huatapipish chai huasitaca japinata pudinmi.

³² Levitacunaca paicunapac llactapi catushca huasitaca ima horaspish cullquita cutichishpa saquichi pudinmi.

³³ Israelcunapurapica levitacunaca huasita charinmi. Chaimanta maijan levitacuna paicunapac huasita randishpaca, cacharina huatapimi catucllamantac cutichishpa, chai huasimanta llucshina can.

³⁴ Ashtahuanpish levitacuna causana llacta muyundi michina allpaca huiñaipacmi paicunapac canga. Chaimantami chai allpataca mana catuna can.

³⁵ Cancunapuramanta maijanpish huaccha tucushpa, mana causai pudishpa, canman mañacpica, paita ayudangui. Paica shuctac llactamanta shamushca shinami canhuanca causan.

³⁶ Imata mañachishpaca, interestapish, interesmanta yallitapish ama cobranguichu. Chaipac randica, cancunapac Dios ñucata manchangui. Shinallatac chai runatapish canhuan causachun saquingui.

³⁷ Cullquita mañachishpapish ama interesta cobranguichu. Ima micunata catushpapish ama yallipi catunguichu.

³⁸ Ñucaca cancunata Mandac Diosmi cani. Canaán llactata cungapac, shinallatac cancunata Dios cangapacmi cancunataca Egipto llactamanta llucchircani.

³⁹ Cancunapuramanta maijanpish cancunahuan causacushpa, huaccha tucushpa, canman caturicpica, ama randishca servicta shina trabajachinguichu.

⁴⁰ Paica shuc trabajac runa shina, shinallatac shuctac llactamanta shamushca runa shinami canhuanca causana can. Paica cacharirina huatacamanmi chashna servinga.

⁴¹ Chai huata pactashca quipaca cambac huasita saquishpami, huahuacunata pushashpa, paipac familiapacman rishpa, paipac taitacunapac allpapi causanga.

⁴² Paicunaca ñucata serviccunami. Ñucaca Egipto llactamantami paicunataca llucchimurcani. Chaimantami huatashca shina causachunca, mana catushca cana can.

⁴³ Chaimanta paicunataca ama sinchita mandashpa charinguichu, ashtahuanpish cambac Dios ñucata manchangui.

⁴⁴ Cancuna servic carita, servic huarmita charishun nishpaca, cuchulla llactacunapi randinguichic.

⁴⁵ Shuctac llactamanta shamushpa cancunahuan causaccunapac huahuacunata, chashnallatac paicunapac familia cancunapurapi huacharishca huahuacunatami randina canguichic. Paicunatami cancunapac cachun randi pudinguichic.

⁴⁶ Cancuna huañushpaca paicunataca herencia shinata huahuacunaman saqui pudinguichicmi. Chashnami paicunaca huahuacunata huiñaita servishpa causanga. Shina cacpipish, israelcunapuramanta cancunata servicpica, ama sinchita mandashpa llaquichinguichicchu.

⁴⁷ Caru llactamanta shamushpa, cambac llactapi causac runa chayuc tucucpi, cutin paipac cuchullapi causac israelcuna huaccha tucushpa, pai caru llactamanta cac runaman, mana cashpaca maijanpish paipac familiacunaman caturicpica,

⁴⁸ randic runaman cullquita cutichishpa, cacharichi pudinguichicmi. Caitaca maijanpish paipac huauquillatacmi cacharichi pudin.

⁴⁹ Mana cashpaca paipac tio, primo, chashnallatac maijanpish paipac cuchulla familiacunami cacharichi pudin. Mana cashpaca paillatac cullquita cutichi pudishpaca, paillatacmi cacharirina can.

⁵⁰ Randic runahuanmi caturishca huatamanta cacharirina huatacaman mashna huata tiyashcata yupana can. Mashnapi caturishcatapish, caturishca punzhamanta mashna huata servishcatapish yupashpami, shuc runa trabajashcamanta mashnata japic cashcata ricushpa cutichina can.

⁵¹ Achca huatacuna servina tiyacpica, tucui chai huatacunamantami catushca cullquillatatac cutichina can.

⁵² Ashtahuanpish cacharirina huatapac ashalla huatacuna siricpica, paihuan yupashpa, chai huatacunallamanta mashnata cutichina cashcata cutichina can.

⁵³ Paitaca ama sinchita mandashpa charinguichu, ashtahuanpish cullquimanta trabajac runa shinata charingui.

⁵⁴ Chai huatacunapi cullquita mana cutichi pudishpa, mana llucshishpaca cacharirina huatapimi paipac huahuacunandi llucchina can.

⁵⁵ Israelcunaca ñucata serviccunami. Paicunataca ñucallatac servichunmi Egipto llactamanta llucchimurcani. Ñucaca cancunata Mandac Diosmi cani.