LEVÍTICO 24 - Dios Rimashcata Quillcashcami

Lamparacunata japichinamanta

¹ Mandac Diosca Moisestaca:

² «Tutapish, punzhapish achicyachichun lamparacunapi churangapac olivosllamanta ruhuashca alli aceiteta apamuchun israelcunata mandai.

³ Chaitaca ñucahuan tandanacuna huasi ucupi cac ñucapaclla jarcachishca pushtupi ñucapac ñaupapi tutapish, punzhapish japirichunca, Aaronmi allichinga. Cai mandashcacunaca cancunapac huahua huahuacuna maipi causashpapish huiñaita pactachichun mandashcami can.

⁴ Mandac Dios ñucapac ñaupapi punzhanta achicyachichunca, alli curi candelerocunatami filapi churana can.

Mandac Diospac ñaupapi churana tandacunamanta

⁵ Alli harinamanta chunga ishcai tandata ruhuangui. Cada tandami chuscu kilo chaupi harinata charina can.

⁶ Mandac Dios ñucapac ñaupapi cac curi miza jahuapi ishcai filata ruhuashpa, suctata cada filapi churangui.

⁷ Chai filacunapica imahuan mana chapushca alli inciensota churangui. Chai tandacunami yuyaringapac ñucaman cushpa, rupachishca canga.

⁸ Chai tandacunataca tucui samana punzhami israelcunapac shutipi, ñucahuan ari nishcata pactachingapac churanga.

⁹ Mandac Dios ñucaman cushpa tandacunaca ñucapaclla chicanyachishcami. Chaimantami Aaronpish, paipac churicunapish ñucapaclla chicanyachishca pushtupi micunga. Cai mandashcaca huiñaita pactachichun mandashcami can» nirca.

Diosta camiccunata llaquichinamanta

¹⁰ Chai punzhapica Israel huarmimanta huacharishca Egipto runapac churimi israelcunapurapi causacurca. Paimi shuc punzhaca carpa huasi cuchupi shuc Israel runahuan piñanacurca.

¹¹ Chai Israel huarmipac cari huahuami Diospac shutita rimashpa nirca. Chaimantami Moisespacman aparca. Paipac mamaca Dan aillumanta Dibripac ushi Selomitmi carca.

¹² Paita japishpaca, Mandac Dios imata ningacamanmi carcelpi churarca.

¹³ Chaimantami Mandac Diosca Moisestaca:

¹⁴ «Tucui camishpa rimashcata uyaccuna paipac uma jahuapi maquita churachun, chai runata carpa huasimanta canzhaman llucchi. Chai quipaca tucui israelcuna tandanacushpa, rumihuan shitashpa huañuchichun.

¹⁵ Cutin israelcunataca: “Maijanpish Diospac shutita camishpa rimacca chashna llaquillatatacmi apanga.

¹⁶ Maijanpish Diospac shutita mana alli nishpa rimactaca Israel cacpipish, mana Israel cacpipish rumihuan shitashpa huañuchinami can.

¹⁷ Maijanpish huañuchictaca paitapish huañuchishca cachun.

¹⁸ Maijanpish shucpac animalta huañuchishpaca animalyucman chashnallatatac cutichichun.

¹⁹ Maijanta lisiachictaca paitapish lisiachichun.

²⁰ Macashpa imata paquictaca paitapish chashnallatac ruhuachun. Ñahuita surcuctaca paitapish ñahuita surcuchun, quiruta surcuctaca paitapish quiruta surcuchun. Maijanpish ima shina llaquichictaca chashnallatac llaquichichun.

²¹ Maijanpish shuc animalta huañuchishpaca, animal-llatatac cutichichun. Maijanpish genteta huañuchictaca paitapish huañuchichun.

²² Chai mandashcallatacmi israelcunapacpish, shuctac llacta gentecunapacpish canga. Ñucami cancunata Mandac Dios cani” ningui» nirca.

²³ Moisés tucui caicunata israelcunaman huillacpica, Diospac shutita mana alli nishpa rimactaca carpa huasimanta canzhaman llucchishpami, rumihuan shitashpa huañuchirca. Israelcunaca Mandac Dios ima shinami Moisesman nishca shinallatacmi ruhuarca.