LEVÍTICO 22 - Dios Rimashcata Quillcashcami

Acllashca ofrendacunamanta

¹ Mandac Diosca Moisestaca:

² «Aaronta, paipac churicunataca: “Israelcuna ñucapaclla chicanyachishcataca ama mapayachinguichicchu. Ñucapaclla chicanyachishcata mapayachishpaca ñuca shutitami yangapi churanguichic. Ñucaca Mandac Diosmi cani” ningui.

³ Shinallatac: “Cancunapac huahua huahuacunamanta maijanpish mapa cashpa, israelcuna Mandac Dios ñucaman chicanyachishcaman cuchuyacca ñuca ñaupamanta anchuchishcami canga. Ñucaca Mandac Diosmi cani.

⁴ Aaronpac huahua huahuapuramanta maijanpish lepra ungüihuan, mana cashpaca yurac yacu cacharirishca cashpa, manarac chuyayashpaca ñucapaclla chicanyachishcataca mana micui pudinchu. Huañushcapi, ima shuctac mapapi, yurac yacu cacharirishca runapi,

⁵ aisarishpa puric animalpi tuparishpaca mapami saquirin. Mapayashca runapi tuparicpish, mapami saquirin.

⁶ Cura chaicunapi tuparishpaca chishicamanmi mapa canga. Cuerpota yacuhuan manarac armarishpaca ñucapaclla chicanyachishcataca mana micunachu can.

⁷ Inti tigrashca quipami chuyanlla saquiringa. Chai quipaca ñucapaclla chicanyachishcata micui pudinmi. Chaica paipacmi.

⁸ Huañushca animaltapish, sacha animal polvoshca animaltapish mana micunachu. Chaita micushpaca, mapami tucunga. Ñucaca Mandac Diosmi cani.

⁹ Curacunaca cai ñuca nishcacunata cazuichic. Ñuca mandashcacunata mana pactachishpa, cai mandashcacunata yangapi churashpaca huañunguichicmi. Ñucaca ñucapaclla cachun, chicanyachic Mandac Diosmi cani.

¹⁰ Ñucapaclla chicanyachishca micunataca maijan mana ricsishca runaca mana micui pudinchu. Curapac huasipi pozashpa causacpish, huasipi servicpish, mana micui pudinchu.

¹¹ Cura cullquihuan randishca runapish, curapac huasipi huacharishca runapish micui pudinmi.

¹² Curapac ushi mana ricsishcahuan cazarashca cashpaca, ñucapaclla chicanyachishpa, alzashpa cushca ofrendata mana micui pudinchu.

¹³ Chai curapac ushi viuda, mana cashpaca cusamanta raquirishca mana huahuayuc cashpa, taitapac huasipi causacushpaca, taita micunata micui pudinmi. Maijan mana ricsishcaca mana micui pudinchu.

¹⁴ Maijan mana yachashcamanta Diospaclla chicanyachishcata micushpaca, chai micushcamanta pichcahuan yallitami curaman cutichina can.

¹⁵ Ñucapaclla chicanyachishcata ama mapayachinguichicchu. Chaicunaca israelcuna Mandac Dios ñucapaclla chicanyachishcami.

¹⁶ Ñucapaclla chicanyachishcata pipish micuchun saquishpaca, cancunami juchayuc tucunguichic. Ñucami cancunata jucha illacta ruhuac Mandac Dios cani” ningui» nirca.

Alli animalcunallata Diosman cunamanta

¹⁷ Mandac Diosca Moisestaca:

¹⁸ «Aarontapish, paipac churicunatapish, tucui israelcunatapish rimashpaca: “Maijan israelcuna, mana cashpaca shuctac llacta runa Israelpi causaccuna animalta ñucaman cushpaca, ima mana tucushcatami cuna can. Cushami nishca animalta, mana cashpaca quiquin munaimanta cushca animaltaca

¹⁹ Ñuca chasquichunca, huagrata cashpa, ovejata cashpa, chivota cashpa ima mana tucushcatami cuna can.

²⁰ Mana alli animaltaca ama cunguichicchu. Chaitaca mana chasquishachu.

²¹ Maijanpish Mandac Dios ñucahuan alli tucungapac, mana cashpaca cushami nishcamanta, mana cashpaca quiquin munaimanta cushpaca, ima mana tucushca huagrata, ovejatami cuna can. Chashna cucpimi chasquisha.

²² Mandac Dios ñucamanca ñahui mana ricuc, imapish paquirishca, chugrishca, chaqui maqui illac, sisushca animaltaca ama cunguichicchu. Chaicunataca Mandac Dios ñucaman cushpa, rupachina altarpi ama churanguichicchu.

²³ Quiquin munaimanta cushpaca, mana alli huagrata, mana cashpaca cari ovejata cui pudinguichicmi. Shina cacpipish, cushami nishcamanta chashna animaltaca mana cui pudinguichicchu. Chaitaca mana chasquishachu.

²⁴ Ruru ungushca, mana cashpaca ruru pitishca animaltaca ama Mandac Dios ñucaman cunguichicchu. Cancunapac llactapica ama chashna ruhuanguichicchu.

²⁵ Shuctac llacta runa chaicunata Mandac Diosman ñucaman cusha nicpipish ama chasquinguichicchu. Chaicunaca mana alli animalchu. Chaitaca ñucaca mana chasquishachu” ningui» nirca.

Ima animalcunallata Diosman cunamanta

²⁶ Mandac Diosca Moisestaca:

²⁷ «Llullu becipish, llullu ovejapish, llullu chivopish canchis punzhatami mamahuan cana can. Pusac punzha tucucpica, Mandac Dios ñucaman cushpa rupachinguichic.

²⁸ Vacatapish, ovejatapish ama chai punzhallatac huahuandi huañuchinguichicchu.

²⁹ Mandac Dios ñucata pagui nishpa cushpaca, ñuca chasquinallata cunguichic.

³⁰ Chai cushca animaltaca chai punzhallatac tucui micunguichic. Cayandipacca ama huacaichinguichicchu. Ñucaca Mandac Diosmi cani.

³¹ Ñuca mandashcacunataca tucuita pactachinguichic. Ñucaca Mandac Diosmi cani.

³² Jucha illac Mandac Dios ñucapac shutitaca ama yangapi churanguichicchu. Israelcunapac chaupipica ñucaca jucha illac cashcatami ricuchina canguichic. Ñucami cancunataca jucha illacta ruhuac Mandac Dios cani.

³³ Ñucami cancunapac Dios cangapac Egipto llactamanta llucchircani. Ñucaca Mandac Diosmi cani» nirca.