LEVÍTICO 21 - Dios Rimashcata Quillcashcami

Curacuna jucha illac causanamanta

¹ Mandac Diosca Moisestaca: «Aaronpac churi curacunataca: “Cancunapac llactapi huañushcapi tuparishpa ama mapayanguichicchu.

² Chaica, cancunapac familiamanta taita, mama, huauqui, churi, ushi,

³ huasipi tiyac carihuan manarac chayarishca soltera huañucpica tuparinallami.

⁴ Maijan familia huañushcapi tuparishpa mana mapayanachu can.

⁵ Acchatapish mana pitirinachu, barbastapish mana anchuchinachu, mana cuerpota chugririnachu.

⁶ Paicunaca ñucaman cushpa rupachiccunami. Chaimantami ñucapac shutita mana mapayachingapac, ñucapaclla chicanyarishca, jucha illac cana can.

⁷ Paicunaca ñucapaclla curacunami. Chaimanta cullquimanta huainayac huarmihuanpish, cusamanta raquirishca huarmihuanpish, shuc cari chayarishca solterahuanpish mana cazaranachu can.

⁸ Paicunaca ñucaman micunata cuccunami. Chaimanta paicunataca Mandac Dios ñucapaclla cashca, jucha illac cashcata yuyanguichic. Ñucaca jucha illacmi cani. Chaimanta paicunapish jucha illacmi cana can. Ñucami jucha illacta ruhuacpish cani.

⁹ Curapac ushi cullquimanta huainayashpaca, paipac taitatami mapayachin. Chaimantaca paitaca causactami rupachina can.

¹⁰ Cancunapuramanta aceitehuan cahuishca, shinallatac ñucapaclla chicanyachishca churanata churarishca mandac cura cashpaca, mana acchata cacharishcachu purina can. Churanatapish mana lliquirinachu can.

¹¹ Huañushca siricuc ucumanpish mana yaicunachu can. Chai huañushca paipac taita mama cacpipish, mana mapayanachu can.

¹² Aceitehuan cahuishca, ñucapaclla caccunaca ñucapaclla chicanyachishca ucumantaca llucshishpa, mana mapayachinachu can. Ñucami Mandac Dios cani.

¹³ Curaca carihuan manarac chayarishca solterahuan cazarana can.

¹⁴ Viudahuanpish, cusamanta raquirishca huarmihuanpish, maijan japirishca huarmihuanpish, cullquimanta huainayac huarmihuanpish mana cazaranachu, ashtahuanpish quiquin llactamanta cac, carihuan manarac chayarishca solterahuanmi cazarana can.

¹⁵ Chashna cazaracpimi, llactapi causac cancunapac huahua huahuacunaca mana mapayanga. Ñucaca cancunata ñucapacllata ruhuashpa, chicanyachic Mandac Diosmi cani” ningui» nirca.

¹⁶ Mandac Diosca Moisestaca:

¹⁷ «Aarontaca: “Cambac huahua huahuapuramanta maijan lisiado runaca ñucaman ofrendata cungapac mana cuchuyanachu can.

¹⁸ Lisiado runaca manatac cuchuyanchu can. Ñahui mana ricuccunapish, huishtucunapish, ima pitishcacunapish, lisiado huacharishcacunapish ñucapacmanca manatac chayarinachu can.

¹⁹ Chaqui maqui paquishcacunapish,

²⁰ curcucunapish, uchilla runacunapish, ñahuipi yurac tiyarishca runacunapish, shicshi, mana cashpaca lepra ungüihuan cac runacunapish, ruru ungushca runacunapish ñucapacman mana cuchuyanachu can.

²¹ Aaronpac aillupuramanta maijan lisiado runaca ofrendata cushpa, rupachingapac mana ñucapacman mana cuchuyanachu can. Lisiado runaca manatac ñucapacman cuchuyanachu can.

²² Shina cashpapish, ñucapaclla chicanyachishcamanta ashtahuan chicanyachishcataca micui pudinmi.

²³ Ashtahuanpish paica lisiadomi. Chaimanta ñucapaclla chicanyachishca ucuta jarcachishcataca mana pasai pudinchu. Altarmanpish mana cuchuyai pudinchu. Shinami ñucapaclla chicanyachishca ucutaca mana mapayachinga. Ñucaca Mandac Diosmi cani. Ñucami ñucapaclla cachun chicanyachic cani” ningui» nirca.

²⁴ Moisesca chashnami Aaronmanpish, paipac churicunamanpish, israelcunamanpish huillarca.