LEVÍTICO 19 - Dios Rimashcata Quillcashcami

Cashcata ruhuashpa, jucha illac causanamanta

¹ Mandac Dios Moisesta rimashpaca:

² «Tandanacushca israelcunataca: “Ñuca cancunata Mandac, jucha illac Diosmi cani. Chaimanta cancunapish jucha illac caichic.

³ Cancunapac taita mamata cazunguichic. Samana punzhatapish huacaichinguichic. Ñucami cancunata Mandac Diosca cani.

⁴ Ama ruhuashcalla dioscunata alli ninguichicchu. Ama fierrota yacuyachishpa dioscunata ruhuanguichicchu. Ñucami cancunata Mandac Diosca cani.

⁵ Mandac Dios ñucahuan alli tucungapac animalta cushpaca, ñuca munashcata cunguichic.

⁶ Ñucaman cushca animal aichataca chai punzha, cayandi punzhami micuna canguichic. Ashtahuanpish quimsa punzha tucucpica, chaica tucui rupachinami canguichic.

⁷ Chai aichata quimsa punzhapi micucca mapami tucunga. Chaica mana chasquishachu.

⁸ Maijanpish chaita micushpa, ñucapaclla chicanyachishcata yangata ruhuac runaca mana alli nishcami canga. Israelcunapuramantapish anchuchishcami canga.

⁹ Granota cosechashpaca, ama tucui pitinguichu. Saquirishca granotapish ama murunguichu.

¹⁰ Uvasta pallashpapish ama tucui pallanguichu. Pambapi urmashcatapish ama murunguichu. Chaicunataca huacchacunapish, caru llactamanta shamushcacunapish tandachun saquingui. Ñucami cancunata Mandac Dios cani.

¹¹ Ama shuhuanguichicchu. Ama llullanguichicchu shinallatac caishuc chaishuc ama umanacunguichicchu.

¹² Manapish pactachingapac ari nishpa, ama cancunata Mandac Diospac shutita yangapi churanguichicchu. Ñucami Mandac Dios cani.

¹³ Shuccunata ama llaquichinguichu, ama shuhuanguichu. Trabajac runaman cunataca ama cayami cusha nishpa charicunguichu.

¹⁴ Ringri mana uyac runata ama llaquichinguichu. Ñahui mana ricuc runa purinapi ama ima mitcarinata churanguichu. Chaipac randica, cambac Diosta manchangui. Ñucami Mandac Dios cani.

¹⁵ Cashcata ruhuashpa allichingui. Huaccha cashcallamantapish ama paiman tucunguichu. Chayuc cashcamantapish ama paiman tucunguichu, ashtahuanpish cashcata ruhuashpa allichingui.

¹⁶ Cambac llactapi ama huashalla parlashpa puringuichu. Pitapish piñashpa, ama huañuchina yuyaihuan puringuichu. Ñucami Mandac Dios cani.

¹⁷ Shuccunata ama cambac shungupi piñanguichu. Ashtahuanpish maipi pandaricushcata ricuchishpa cunangui. Mana cunashpaca juchayucmi tucungui.

¹⁸ Shuccuna llaquichicpica, ama chai shinallatac canpish llaquichinguichu, ama piñashcalla puringuichu. Chaipac randica, can quiquin ima shinami cuyaringui, chashnallatac shuccunatapish cuyangui. Ñucami Mandac Dios cani.

¹⁹ Ñuca mandashcacunata cazungui. Cambac animalcunata ama chican animalhuan chayachinguichu. Cambac allpapipish ama tucuilaya muyucunata chapushpa tarpunguichu. Tucuilaya puchcahuan ahuashca churanatapish ama churaringuichu.

²⁰ Shuc servic soltera cazarangapac ari nishca cashpapish paipac amoman manarac cullquita cushpa cacharichishca cashpa, shuc carihuan chayarinacucpica, ishcaitatacmi llaquichina can. Shina cacpipish, mana huañuchinachu.

²¹ Paipac juchata pichachunca, ñucahuan tupana huasi yaicunapimi shuc cari ovejata cuna can.

²² Chaitaca curami juchata pichachun Mandac Dios ñucapac ñaupapi, ñucahuan alli tucuchun cunga. Chashna cucpimi, chai runapac juchacunaca perdonasha.

²³ Canaán llactaman chayashpa, micunata pucuc tucuilaya yuracunata tarpushpaca, punta pucushcataca saquinguichic. Quimsa huatacaman chai pucushcataca ama micunguichic

²⁴ Chuscu huatapica tucui pucushca granomi Mandac Dios ñucaman cushpa, cushichingapac chicanyachishca canga.

²⁵ Pichca huata tucucpica, chai yuracuna ashtahuan pucuchunca, chai cancunapac granotaca micui pudinguichicmi. Ñucami cancunata Mandac Dios cani.

²⁶ Imatapish ama yahuarndi micunguichu. Brujo canatapish, adivino canatapish ama munanguichicchu.

²⁷ Umatapish ama muyundita rutuchinguichicchu. Barbastapish ama puntata pitichinguichicchu.

²⁸ Maijan huañushcamanta ama cancunapac cuerpota chugringuichicchu, ama cancunapac cuerpopi imapish ricunacunata ruhuanguichicchu. Ñucami Mandac Dios cani.

²⁹ Cambac ushi cullquimanta huainayachunpish ama saquinguichu. Chaica cancunapac llactaca huainayashpa causac, millai jundami tucunga.

³⁰ Samana punzhata huacaichinguichic. Ñucapaclla carpa huasitapish manchanguichic.

³¹ Huañushcapac almacunamanpish, adivinacmanpish ama tapunguichicchu. Chaiman rishpaca mapayanguichicmi. Ñucami cancunata Mandac Dios cani.

³² Yurac uma taitapac ñaupapi paita alli nishpa shayaringuichic. Ñucami Mandac Dios cani.

³³ Shuctac llacta runa shamushpa, cancunahuan causacucpi, ama llaquichinguichicchu.

³⁴ Paicunataca cancunapura cashca shinallatac cancunapac llactapica cuyanguichic. Cancunaca Egipto llactapica pozashpallami causacurcanguichic. Chaimanta cancuna ima shinami cuyaringuichic, chashnallatac paicunatapish cuyanguichic. Ñucami Mandac Dios cani.

³⁵ Ima llaquita allichinapipish, allpa medinapipish, imata pezanapipish, shuctac medinacunapipish ama ima mana allita ruhuanguichicchu.

³⁶ Balanzatapish, pezanatapish, yacu medinatapish, shuctac medinacunatapish allita charinguichic. Ñucami cancunata Egipto llactamanta llucchic Mandac Dios cani.

³⁷ Ñuca quillcachishpa mandashcacunatapish, ñuca yachachishcacunatapish yuyarashpa pactachinguichic. Ñucami Mandac Dios cani” ninmi ningui» nirca.