LEVÍTICO 18 - Dios Rimashcata Quillcashcami

Maijanllahuan mana chayarinamanta

¹ Mandac Dios Moisesta rimashpaca:

² «Israelcunataca: “Ñucami cancunata Mandac Dios cani.

³ Cancuna causashca Egiptopi causaccuna shina, shinallatac cancuna causagricushca Canaán llactapi causaccuna shina, ama ruhuanguichicchu. Ama paicunapac mandashcacunata catinguichicchu.

⁴ Ñuca mandashcacunata, ñuca yachachishcacunata cazushpa, pactachishpa causanguichic. Ñucami cancunata Mandac Diosca cani.

⁵ Ñuca yachachishcacunata, mandashcacunata pactachinguichic. Tucui caicunata pactachishcamantami causanguichic. Ñucami Mandac Diosca cani.

⁶ Maijan caripish quiquin familia huarmihuanca ama chayarichun. Ñucami Mandac Diosca cani.

⁷ Cambac mamahuan chayarishpa, ama cambac taitata pingaichinguichu, paica cambac quiquin mamami, chaimanta ama chayaringuichu.

⁸ Ama taitapac quipa huarmihuan chayarishpa, taitata pingaichinguichu.

⁹ Ama taitapac, mana cashpaca cambac mamapac huahuahuan chayaringuichu. Quiquin huasipi huacharishca cacpipish, shuctac huasipi huacharishca cacpipish, ama chayaringuichu.

¹⁰ Ama churipac ushihuan, ushipac huahuahuan chayaringuichu. Cambac yahuarpurami.

¹¹ Ama taitapac quipa huarmipac ushihuan chayaringuichu. Paica cambac lapani shinallatacmi.

¹² Ama taitapac panihuan chayaringuichu. Paica taitapac familiami.

¹³ Ama mamapac ñañahuan chayaringuichu. Paica mamapac familiami.

¹⁴ Ama taitapac huauquipac huarmihuan chayaringuichu. Paica cambac tiami.

¹⁵ Ama churipac huarmihuan chayaringuichu. Paica cambac nuerami.

¹⁶ Ama huauquipac huarmihuan chayaringuichu. Shina ruhuashpaca, cambac huauquitami pingaichingui. Paica cambac cuñadami.

¹⁷ Mamahuanpish, paipac huarmi huahuahuanpish, shinallatac paipac nietahuanpish ama chayaringuichu. Chashna quiquinpura chayarinacushpaca, yalli llaquitami ruhuangui.

¹⁸ Huarmi manarac huañucpi, paipac ñañahuanca ama chayaringuichu. Shina chayarishpaca piñanacunguichicmi.

¹⁹ Ama quilla ungüihuan cac huarmihuan chayaringuichu.

²⁰ Ama shucpac huarmihuan chayaringuichu. Paihuan chayarishpaca mapayanguimi.

²¹ Ama cambac cari huahuataca Moloc shuti ruhuashcalla diosman cushpa rupachinguichu. Chashna ruhuashpaca, cambac Diostami yangapi churangui. Ñucami Mandac Diosca cani.

²² Huarmihuan chayaric shina, ama caripura chayaringuichicchu. Shina ruhuashpaca, yalli millaitami ruhuangui.

²³ Ama animalcunahuan chayaringuichu. Huarmipish ama imapish cari animalhuan chayaringuichu. Shina ruhuashpaca, yalli millaitami ruhuangui.

²⁴ Caicunata ruhuashpa, imapipish ama mapayanguichu. Cancunapac ñaupamanta llucchishpa cachashca gentecunaca caicunata ruhuashpami, llactata mapayachirca.

²⁵ Paicuna causacuc llactapish yallitami mapa tucurca. Chaimantami ñuca chai llactata llaquichingapac shamucpica, allpapish arcadac shina llucchishpa shitarca.

²⁶ Cancunaca ñuca mandashcacunata, ñuca yachachishcacunatami pactachina canguichic. Israelcunapish, shuctac llactamanta shamushpa cancunahuan causaccunapish cai gentecuna shina, millaitaca ama ruhuanguichicchu.

²⁷ Cancuna manarac cai llactaman yaicucpi, caipi causaccunaca yalli millaitami causarca. Chaimantami cai llactaca mapayarca.

²⁸ Pacta cancunatapish punta cai llactapi causaccunata arcadashpa shitac shina, millaita ruhuashcamantaca shitanman.

²⁹ Cancunapuramanta maijan cai tucui millaicunata ruhuacpica, israelcunapuramanta anchuchishcami canga.

³⁰ Cancunaca ñuca nishcata yuyarirashpa pactachinguichic. Pacta cancuna manarac cai llactaman shamucpi, causaccuna shina millaita ruhuashpa mapayanguichicman. Ñucami cancunata Mandac Diosca cani” ninmi ningui» nirca.