LEVÍTICO 16 - Dios Rimashcata Quillcashcami

Juchacunata perdonana punzhamanta

¹ Aaronpac ishcai churicuna paipac ñaupaman yallita cuchuyashpa, huañushca quipami Mandac Diosca Moisestaca:

² «Cambac huauqui Aarontaca ama ima horaspish pañohuan jarcashca huashapi cac mandashcacunata huacaichina Arcata catashca, ñucapaclla ucuman yaicuchun ningui. Chaiman ima horaspish yaicushpaca huañungami. Ñucaca chai catashca jahuapimi puyupi ricurisha.

³ Aaronca ñucapaclla chicanyachishca ucumanca juchata pichachun cungapacca shuc becita, tucui rupachingapacca shuc cari ovejatami apashca yaicuna can.

⁴ Ñucapaclla chicanyachishca lino tunicataca churashca, lino chumbihuan huatallishca, lino turbanteta churarishcami chai ucumanca yaicuna can. Cai churanacunami ñucapaclla chicanyachishca churanaca. Chai churanataca armarishpami churaringa.

⁵ Aaronca tandanacushca israelcunamantami ishcai chivotaca, juchata pichachun cungapac, cutin shuc cari ovejataca tucui rupachingapac apamuna can.

⁶ Quipaca Aaronca paipac juchata, paipac familiapac juchata pichachun cungapacmi shuc becita apamunga.

⁷ Chai quipaca ishcai chivotami ñucahuan tupana huasi yaicunapi ñucapac ñaupapi cungapac apamuna can.

⁸ Aaronca chai ishcai chivotaca shuctaca ñucaman cungapac, shuctaca Azazelman cungapacmi suerteta ruhuanga.

⁹ Chai ishcai chivomanta maijanta ñucaman cuna tucucpica, Aaronca israelcunapac juchata pichachunmi ñucaman cuna can.

¹⁰ Cutin Azazelman cuna tucucpica, causactami Mandac Dios ñucapac ñaupaman apamunga. Chashna apamushpami juchata perdonachun, chai chivopi juchata apachishpa, Azazelman cushpa, shitashca pambapi cacharishpa cachanga.

¹¹ Aaronca paipac juchamantapish, paipac familiapac juchamantapish Diosman cungapacmi becita apamuna can. Chashnami becitaca juchata pichachun huañuchinga.

¹² Chai quipaca ñucapac ñaupapi cac altarmantami nina junda incienso rupachinata, ishcai puñado mishquilla ashnacuc ñuto inciensota apashpa, lienzohuan jarcachishca ñucapaclla chicanyachishca ucuman yaicunga.

¹³ Chaipimi Aaronca Mandac Dios ñucapac ñaupapi cac ninapi inciensota rupachinga. Chashna rupachicpimi, mandashcata huacaichishca Arca tapa jahuata cushnica tapanga. Chashna tapacpimi, Aaronca mana huañunga.

¹⁴ Chai quipaca Aaronca paipac dedota beci yahuarpi satishpami, Arca tapa jahuapi inti llucshic ladopi, chai tapa ñaupa ladopi canchis cutin chirapanga.

¹⁵ Chai quipaca israelcuna juchata pichachun cushca ovejata huañuchishca yahuartaca cari becipac yahuarhuan ruhuashca shinallatacmi pañohuan jarcachishca ñucapaclla chicanyachishca ucuman apamushpa, tapa jahuapipish, ñaupa ladopipish chirapanga.

¹⁶ Chashnami ñucapaclla chicanyachishca ucuta israelcuna ñucata mana cazushpa, juchallishpa mapayachishcata pichanga. Chashnallatacmi Aaronca paicunapac chaupipi cac carpa huasitapish israelcuna juchallishpa mapayachishcata pichanga.

¹⁷ Aarón ñucapaclla chicanyachishca ucuman yaicushpa, paipac, paipac familiapac, tucui israelcunapac juchacunata pichachun cucucpica, pipish ñucahuan tupana huasiman ama yaicunachu can.

¹⁸ Chai ucumanta llucshishpaca, Mandac Dios ñucapac ñaupapi cac altarta mapa illacta ruhuangapacmi Aaronca chai altar gachucunatapish, altar muyunditapish cari becipac, chivopac yahuarta japishpa cahuinga.

¹⁹ Dedota yahuarpi satishpami, chai altar jahuapi canchis cutin chirapanga. Shina ruhuashpami, israelcunapac juchacunata pichashpa, ñucapacllata ruhuanga.

²⁰ Aaronca ñucapaclla chicanyachishca ucutapish, ñucahuan tupana huasitapish, altartapish ñucapacllata ruhuashca quipami causac chivota apachun cachanga.

²¹ Chai chivopac uma jahuapi maquita churashpami, tucui israelcuna juchallishcatapish, millaita ruhuashcapish huillanga. Chashnami chivopac uma jahuapi juchacunata churashpa, shitashca pambapi cacharichun, chaipac acllashca runata cachanga.

²² Israelcunapac juchata apachishpami, pi mana causana shitashca pambaman apanga. Chai pambapimi chivotaca cacharinga.

²³ Chai quipami Aaronca ñucahuan tupana huasiman shamushpa, ñucapaclla chicanyachishca lino churanata llucchishpa, chaipi saquinga.

²⁴ Ñucahuan tupana huasi ucullapitac armarishpami, paipac churanata churarishpa, canzhaman llucshishpa, paimantapish, tucui israelcunamantapish animalta tucui rupachinga. Chashnami, paipac juchatapish, israelcunapac juchatapish pichachun,

²⁵ cushca animalpac huirataca altarpi rupachinga.

²⁶ Chivota Azazelman cungapac apac runapish armarishpa, churanata tacshanami can. Chaita ruhuashca quipami carpa huasiman yaicunga.

²⁷ Juchata pichachun ñucaman cushca becitapish, chivotapish ñucahuan tupana huasimanta canzhaman apashpa, carandi, huanundi rupachinga. Chai yahuarca ñucapaclla ucupi juchata pichachun cushcami carca.

²⁸ Chaicunata rupachicpish armarishpa, churanata tacshanami can. Shina ruhuashpami carpa huasiman yaicunga.

²⁹ Caicunaca huiñaita ruhuachun mandashcami canga. Canchis quilla chunga punzhapica cancunapish, shuctac cancunahuan causaccunapish imata mana ruhuashpami llaquirishpa samarina canguichic.

³⁰ Cai punzhaca juchata pichachun Mandac Dios ñucaman animalta cushpa huañuchina punzhami canga. Chai punzhapimari ñucapac ñaupapi cancunaca jucha illac saquiringuichic.

³¹ Chai punzhaca samarishpa, tucui shunguhuan llaquirina punzhami canga. Cai mandashcacunaca huiñaita chashnatac ruhuana mandashcami.

³² Taitapac randi aceitehuan cahuishca, ñucapaclla chicanyachishca curami juchata pichachun ñucaman animalta cunga. Chai curaca ñucapacta ruhuangapac churarina lino churanatami churaringa.

³³ Chashna churarishpami ñucapaclla chicanyachishca ucutapish, ñucahuan tupana huasitapish, altartapish mapa illacta ruhuanga. Curacunapac juchatapish, tucui israelcunapac juchatapish pichachun animalta ñucaman cushpa huañuchinga.

³⁴ Caicunaca huatanta shuc cutin israelcunapac juchata pichachun animalta cuchun mandashcami. Caitaca huiñaitami ruhuana can» nirca. Moisesca Mandac Dios mandashca shinallatacmi ruhuarca.