LEVÍTICO 15 - Dios Rimashcata Quillcashcami

Yurac yacu cachariricuc caricuna imata ruhuanamanta

¹ Mandac Dios Moisestapish, Aarontapish rimashpaca:

² «Israelcunataca: “Maijan cari yurac yacu cacharirishpaca mapami tucunga.

³ Yurac yacu cachariricuc runaca pai charishca aichamanta yurac yacu cacharirishcamanta, mana cashpaca yurac yacu jarcarishcamantapishmi mapa tucun.

⁴ Yurac yacu cachariricuc runa siririshca camapish, imapi pai tiyarishcapish mapami tucun.

⁵ Pai siririshca camapi maijanpish tuparicca armarishpa, churanatapish tacshanami can. Shina ruhuashpapish, tutayangacamanmi mapa canga.

⁶ Chai runa tiyarishcapi maijan tiyaricpish armarishpa, churanata tacshanami can. Shina ruhuashpapish tutayangacamanmi mapa canga.

⁷ Maijanpish yurac yacu cachariricuc runapac cuerpopi tuparicca armarishpa, churanata tacshanami can. Shina ruhuashpapish tutayangacamanmi mapa canga.

⁸ Yurac yacu cachariricuc runa, mapa illac runapi tocacpica, chai runaca armarishpa, churanata tacshanami can. Shina ruhuashpapish tutayangacamanmi mapa canga.

⁹ Yurac yacu cachariricuc runa parejashca animalpi montacpica, parejoca mapami canga

¹⁰ Maijanpish chai runa tiyarishcapi tiyaricca tutayangacamanmi mapa canga. Maijanpish chai runa tiyarinata apacca armarishpa, churanata tacshanami can. Shina ruhuashpapish tutayangacamanmi mapa canga.

¹¹ Yurac yacu cachariricuc runa mana maquita jahuashpa, maijanpi tuparicpica, armarishpa churanata tacshanami can. Shina ruhuashpapish tutayangacamanmi mapa canga.

¹² Yurac yacu cacharirishca runa allpa mangapi tuparicpica, chai mangataca paquinami can. Shinallatac caspi manga cacpica jahuanami can.

¹³ Chai runa yurac yacu cachariricuc runa mapa illac tucushpaca, canchis punzhatami yupana can. Chai quipami callpacuc yacupi armarishpa, churanatapish tacshana can. Chashnami mapa illac tucunga.

¹⁴ Pusac punzhapica ishcai urpita, mana cashpaca ishcai huahua palomatami Dios-huan tupana huasi yaicunaman apamushpa, Mandac Diospac ñaupapi curaman cuna can.

¹⁵ Curami shuctaca juchamanta cushpa, shuctaca tucui rupachinga. Chashnami yurac yacu cachariricuc runataca Mandac Diospac ñaupapi curaca chuyanllata ruhuanga.

¹⁶ Yurac yacu cachariricuc runaca tucui cuerpotami armarina can. Shina armarishpapish tutayangacamanmi mapa canga.

¹⁷ Caripac yurac yacu churanapi, mana cashpaca carpapi urmacpica, tacshanami can. Shina ruhuashpapish tutayangacamanmi mapa canga.

¹⁸ Shuc cari huarmihuan sueñucucpi, caripac yurac yacu cachariricpica, ishcaitami armarina can. Shina armarishpapish tutayangacamanmi mapa canga.

Quilla ungüihuan cac huarmicunata mandashcamanta

¹⁹ Shuc huarmi quilla ungüihuan cashpaca, canchis punzhacamanmi mapa canga. Maijanpish chai huarmipi tuparicca tutayangacamanmi mapa canga.

²⁰ Shinallatac chai huarmi imapi tiyarishpa, mana cashpaca siririshpaca mapatami ruhuanga.

²¹ Maijanpish chai huarmi siririshca camapi tuparicca armarishpa, churanata tacshanami can. Shina ruhuashpapish tutayangacamanmi mapa canga.

²² Maijanpish chai huarmi tiyarishcapi tiyaricca armarishpa, churanata tacshanami can. Shina ruhuashpapish tutayangacamanmi mapa canga.

²³ Chai huarmi sueñushca camapi, mana cashpaca tiyarishcapi tuparicca tutayangacamanmi mapa canga.

²⁴ Maijanpish chai huarmihuan sueñushpaca, canchis punzhacamanmi mapa canga. Paicuna sueñushca camapish mapami canga.

²⁵ Shuc huarmipac quilla ungüi yalli punzhacunata shamucpi, shinallatac yallita yahuar shamucpica, tucui chai punzhacunatami chai unguna cashca punzhacunapi shinallatac mapa canga.

²⁶ Yahuar cachariricuc huarmi sueñushca camaca quilla ungüihuan cashpa sueñushca shinallatacmi mapa canga. Imapi tiyarishcapish mapallatacmi canga.

²⁷ Maijanpish chai camapi, mana cashpaca tiyarinapi tuparicca mapami canga. Chaimanta armarishpa, churanata tacshanami can. Shina ruhuashpapish tutayangacamanmi mapa canga.

²⁸ Yahuar shamuna pararicpica, canchis punzhatami yupana can. Chai quipaca mapa illacmi saquiringa.

²⁹ Pusac punzhapica ishcai urpita, mana cashpaca ishcai huahua palomatami Dios-huan tupana huasi yaicunaman apamushpa, Mandac Diospac ñaupapi curaman cuna can.

³⁰ Chaicunatami curaca shuctaca juchamanta cushpa, cutin shuctaca tucui rupachinga. Mandac Diospac ñaupapi chashna ruhuacpimi, yahuar cacharirishca huarmica mapa illac saquiringa.

³¹ Chai shina ruhuacpimi, israelcunaca paicunapac chaupipi cac ñucahuan tupana huasimanca ima mapa illac shamungacuna. Paicunaca mapamanta chuyayana cashca shina, mana chuyayashpa ñucahuan tupana huasita mapayachishpa, ama huañuchunmi chashna yachachina canguichic” ningui» nirca.

³² Cai mandashcacunaca shuc cari yurac yacu cacharirishpa mapayashcamanta,

³³ shuc huarmi quilla ungüihuan mapayashcamanta, caripish, huarmipish mapayashcamanta, quilla ungüihuan cac huarmihuan cari sueñushpa mapayashcamanta ima shina chuyayanata yachachishcami.