LEVÍTICO 14 - Dios Rimashcata Quillcashcami

¹ Mandac Dios Moisesta rimashpaca:

² «Lepra ungüi alliyashca quipa, mapa illac saquiringapacca caitami ruhuana can: Chai alliyashca runataca curapacmanmi pushana.

³ Chaipimi curaca carpa huasimanta canzhaman pushashpa, allita ricunga. Chai lepra ungüi ña alliyacushcata curallatac ricushpaca,

⁴ chuyanlla saquirichunmi, ishcai uchilla micuna zhutata, cedro caspita, puca pañota, hisopo sacha ramata apamuchun mandanga.

⁵ Allpa mangapi callpacuc yacuta churashpami, chaipica ishcai zhutacunamantaca shucta huañuchichun mandanga.

⁶ Chai quipaca chai causacuc zhutata, cedro caspita, puca pañota, hisopo ramata japishpa, chai yacu jahuapi huañuchishca zhuta yahuarpi causac zhutata satinga.

⁷ Chashnami lepra ungüihuan cacpac jahuapi canchis cutincaman chirapashpaca: “Mapa illacmi cangui” ninga. Chai quipaca causacuc zhutataca cacharishpami cachanga.

⁸ Chai quipami churanata chuyayac runaca paipac churanata tacshashpa, acchatapish, tucui ñuto millmacaman ruturishpa, armarishpa, ña chuya saquiringa. Chai quipaca carpa huasicunaman shamushpami, mana ucuman yaicushpa, canchis punzhacaman canzhallapi causanga.

⁹ Canchisniqui punzhapica acchatapish rutushpa, cuerpopi tiyac millmatapish, ñahui quingrai millmatapish rutushpa, churanatapish tacshashpa, paipish armarishpami, mapa illac saquiringa.

¹⁰ Pusacniqui punzhapica ima mana tucushca ishcai maltón ovejatapish, shuc huatayuc ima mana tucushca huarmi ovejatapish, sucta kilo chaupi ashtahuan alli harinatapish, aceitehuan masashcata, shuc litromanta quimsapi chaupishca shuc parte aceiteta apamuna can.

¹¹ Chaicunata apamucpimi, lepramanta chuyayachic curaca Dios-huan tupana huasipi, Diospac ñaupapi cungapac apamushcacunandi churashpa rupachinga.

¹² Pandarishcamantaca curami shuc ovejata japishpa, litro aceiteta quimsapi chaupishca aceitehuan cuyuchishpa, Mandac Diospac ñaupapi cunga.

¹³ Chai quipami maltón ovejataca juchamanta cushcata, tucui rupachinata rupachinallapitac huañuchinga. Pandarishcamanta Diosman cushcapish, juchamanta cushcapish Diospaclla chicanyachishcami can. Chaimantami animal aichataca cura japina can.

¹⁴ Cura chai pandarishcamanta cushpa huañuchishca animalpac yahuarta japishpaca, chai chuyayac runapac alli lado ringri puntapi, alli lado maqui mama dedo puntapi, alli lado chaqui mama dedopimi cahuinga.

¹⁵ Curaca chai litromanta quimsapi chaupishca aceitetapish japishpa, lluqui maqui shungupi tallinga.

¹⁶ Shina tallishpami curaca paipac lluqui maquipi charicushca aceitepi, paipac alli maqui dedota jucuchishpa, canchis cutincaman Mandac Diospac ñaupapi chirapanga.

¹⁷ Paipac maquipi charicushca aceite puchutaca chai chuyayac runapac alli lado ringri puntapi, alli lado maqui mama dedopi, alli lado chaqui mama dedopi, pandarishcamanta cushca animalpac yahuarhuan cahuishca jahuapi cahuinga.

¹⁸ Paipac maquipi puchushca aceitetaca chuyayacpac uma jahuapimi cahuinga. Cura chashna ruhuacpimi, Mandac Diosca chai runapac juchata perdonanga.

¹⁹ Chai quipami curaca juchamanta Diosman cuna animalta huañuchishpa, chai chuyayac runapac juchamanta cunga. Shina ruhuacpimi, chai runaca mapa illac saquiringa. Chai quipaca tucui rupachingapac cushca animaltapish huañuchingami.

²⁰ Chashnami tucui rupachina animaltapish, grano ofrendatapish altar jahuapi rupachinga. Shina ruhuashpami, mapa illac saquiringa.

²¹ Chai leprahuan ungushca runa huaccha cashcamanta chaicunata mana cui pudicpica, chai pandarishcamantaca shuc maltón ovejallatami apamuna can. Chaitaca curallatacmi cuyuchishpa Diosman cunga. Chaihuan cungapacca ishcai kilo yalli alli harinata, litromanta quimsapi chaupishca aceitetami apamuna can.

²² Ishcai urpita, mana cashpaca ishcai huahua palomatami, imata cashpapish pai cui pudishcallata apamunga. Chaicunataca shuctaca juchata pichachun, shuctaca tucui rupachingapacmi apamunga.

²³ Pusacniqui punzhapimi tucui caicunataca mapa illac saquiringapac curaman cuna can. Chaitaca Dios-huan tupana huasi yaicunapimi Mandac Diospac ñaupapi cunga.

²⁴ Chaipimi curaca juchata pichachun apamushca maltón ovejatapish, litromanta quimsapi chaupishca aceitetapish cuyuchishpa, Mandac Diosman cunga.

²⁵ Pandarishcamanta cuna maltón ovejata huañuchishpami, chai yahuarta japishpa, lepra ungüimanta chuyayac runapac alli lado ringripi, alli lado maqui mama dedopi, alli lado chaqui mama dedopi cahuinga.

²⁶ Chai quipaca chai aceiteta ashata japishpami, paipac lluqui maqui shungupi churanga.

²⁷ Chaimanta alli maqui dedohuan japishpami canchis cutincaman Mandac Diospac ñaupapi chirapanga.

²⁸ Chai charicushca aceitellahuan chuyayac runapac alli lado ringripi, alli lado maqui mama dedopi, alli lado chaqui mama dedopi juchata pichachun cushca animal yahuarhuan cahuishcallapitac cahuinga.

²⁹ Chai puchu aceitetaca chai chuyayac runapac umapimi cahuinga. Shina ruhuacpimi, Mandac Diosca juchata perdonanga.

³⁰ Chai quipaca curallatacmi urpita cashpa, huahua palomata cashpa imatapish cui pudishcallata apamushcata Diosman cunga.

³¹ Chai ishcai animalcunataca shuctaca juchata pichachun, shuctaca tucui rupachingapac apamuna can. Caicunataca harina chaputa cushca jahuapimi cunga. Shina cucpimi, Mandac Diosca paipac juchacunata perdonanga» nirca.

³² Caicunami lepra ungüihuan cashpa, Diosman mana cui pudiccunaman yachachishca can.

Huasipi lepra ungüi tiyacpi, imata ruhuanamanta

³³ Mandac Dios Moisestapish, Aarontapish rimashpaca:

³⁴ «Cancuna ña Canaán llactaman chayashpa, ñuca cushca llactapi causacucpi, maijanpac huasipi lepra ungüita ñuca churacpi, chai ungüi ricuricpica,

³⁵ chai huasiyucca curapacman rishpami: “Ñuca huasi pirca quingraipica mapa lepra ungüimi ricuric yuyachin” ringa.

³⁶ Shina huillacpimi, curaca chai huasita ricungapac chayashpaca, manarac ucuman ricungapac yaicushpa, ungüi ama mirarishpa catichun, chaipi imalla tiyaccunata canzhaman llucchichun mandanga. Tucui llucchicpica, chai ungüi cashcata, mana chai ungüi cashcatami ricungapac yaicunga.

³⁷ Chai huasi pirca quingraipi verdiyashca, pucayashca mapa ungüi pirca ucucaman cacpica,

³⁸ curaca huasimanta canzhaman llucshishpami, canchis punzhacaman chai huasita huichcashpa saquinga.

³⁹ Canchis punzha tucucpi, cura cutimushpami chai huasi pirca quingraipi ungüi mirarishcata ricushpaca,

⁴⁰ ungüilla cac rumicunata anchuchishpa, llactamanta llucchishpa, mapa shitanapi shitachun mandanga.

⁴¹ Huasi ucu pirca quingraitapish jahuallata aspichishpami, chai allpataca llacta chaupimanta llucchishpa, mapa shitanapi shitachinga.

⁴² Rumicunata llucchishpaca, shuctac rumicunatami churanga. Pirca quingraita aspishcataca turuhuan llutanga.

⁴³ Chai rumita llucchishca huasha, aspishpa mushuc turuhuan llutashca quipapish cutinllatac ungüi ricuricpica,

⁴⁴ curallatacmi cutinllatac ungüi mirarishcata ricungapac yaicunga. Pai yaicucpi, chai ungüi mirarishcallatac cacpica, chai huasica lepra ungüilla, mapa huasimi canga.

⁴⁵ Chai huasipi lepra ungüi cashcamantaca chai huasitaca tucuimi urmachinga. Chai huasi urmachishca rumicunatapish, caspicunatapish, allpatapish llacta chaupimanta llucchishpami, mapa shitanapi shitanga.

⁴⁶ Cura huichcachishca quipa chai huasiman maijanpish yaicucca tutayangacamanmi mapa canga.

⁴⁷ Maijanpish chai huasipi sueñushpa, shinallatac micushpaca paipac churanata tacshachun.

⁴⁸ Lepra ungüilla cac huasita turuhuan llutashca quipa cura ricugricpi, chai ungüi ña mana ashtahuan mirarishca cacpica curaca: “Cai huasica ña mana mapachu” ninga.

⁴⁹ Shina nishpami, huasita chuyayachingapacca ishcai uchilla zhutata, cedro caspita, puca telata, hisopo ramata japinga.

⁵⁰ Ishcai zhutacunamanta shuctaca allpa mangapi callpac yacuta churashpami, chaipi huañuchinga.

⁵¹ Chaimantaca causacuc zhutata, cedro caspita, hisopo ramata, puca pañota, yacu jahuapi huañuchishca zhutapac yahuarpi satishpa, chai huasitaca canchis cutincaman chirapanga.

⁵² Chai ungüilla huasitaca zhuta yahuarhuan, callpac yacuhuan, causac zhutahuan, cedro caspihuan, hisopo ramahuanmi mapa illacta ruhuanga.

⁵³ Quipaca causac zhutata llactamanta canzhaman llucchishpami cacharinga. Shina ruhuacpimi, chai huasica mapa illac saquiringa» nirca.

⁵⁴ Caicunami shicshi ungüimanta, lepra ungüimanta imata ruhuana mandashcaca.

⁵⁵ Huasi quingraipi cacpi, churanapi cacpi,

⁵⁶ maijanpac cuerpopi pungui ricuricpi, caracharishpa yuracyashca ricuricpica,

⁵⁷ chai ungüi mapa cacta, mana mapa cacta yachangapacca, tucui cai mandashcacunatami ruhuana can. Caicunami lepra ungüihuan cacpi, imata ruhuana mandashcaca.