LEVÍTICO 13 - Dios Rimashcata Quillcashcami

Lepra ungüihuan cacpi, imata ruhuanamanta

¹ Mandac Dios Moisestapish, Aarontapish rimashpaca:

² «Maijanpac cuerpo punguishpa, tucya tucucpi, ñuto grano ricuricpi, yuracyashca ricuricpica, Aarón curapacman, mana cashpaca maijan paipac churi curapacmanmi apana can.

³ Curami chai sisuta ricunga. Chaipi millma yuracyashca, cara ucucaman sisushca cashpaca, lepra ungüimi canga. Chaimantami curaca: “Caica mapa ungüimi” ninga.

⁴ Chai ungushcapac cuerpo yuracyashca cashpapish sisu mana ucucaman cacpi, millmapish mana yuracyashca cacpica, chai ungushca runataca curallatacmi canchis punzhacaman huichcashpa churanga.

⁵ Canchis punzha tucucpica, curallatacmi ima shina cashcata allita ricunga. Chai ungüi chashnallatac cacpica, chai runataca cutin canchis punzhacamanmi huichcashpa churanga.

⁶ Canchis punzha tucucpica, cutinllatacmi chai runataca ricunga. Chai sisushca mana ashtahuan mirarishca, mana yanayashca cacpica, curallatacmi: “Mana mapa ungüichu” ninga. Chai ungushca runaca paipac churanata tacshashpami, mapa illac saquiringa.

⁷ Mapa illac cangapac, curaman ricuchishca quipa cutinllatac chai yanayashpa sisu mirashca cacpica, cutinllatacmi curaman ricuchina can.

⁸ Chai runapi sisu ungüi mirarishcata cura ricushpaca: “Caica mapa ungüimi” ninga. Chaica lepra ungüimi canga.

⁹ Maijan lepra ungüihuan cacpica, curapacmanmi apana can.

¹⁰ Curami chai ungushca runataca ricunga. Cuerpo punguillishca cacpi, chaipi millmapish yuracyashca cacpi, shinallatac ucucaman sisushca cacpica, curallatacmi:

¹¹ “Caica mana jambipac lepra ungüimi” ninga. Paica mapami. Chaimanta ña mana huichcangachu.

¹² Ashtahuanpish chai ungushca runa umamanta chaquicaman caracharishca cacpica, curapish ricui pudingami.

¹³ Chashna cacpica, curallatacmi chai ungushcata allita ricunga. Tucui chai ungüi yuracyashca cacpica curallatacmi: “Mapa illacmi” ninga.

¹⁴ Ashtahuanpish ima punzha chai runapac cuerpopi ucucaman sisu ricuricpica: “Mapami cangui” ninga.

¹⁵ Curami chai llullu aicha cara ucuman sisushcata alli ricushpaca: “Mapa ungüimi” ninga. Llullu aicha ricurishpaca, lepra ungüimi canga.

¹⁶ Ashtahuanpish llullu aicha yuracyashca ricuricpica, chai ungushca runataca curapacmanmi apana can.

¹⁷ Curami paitaca alli ricunga. Chai aicha cutin yuracyashca cacpica, curallatacmi: “Mapa illacmi cangui” ninga. Paica mapa illacmi saquiringa.

¹⁸ Maijanpac cuerpopi sisu ungüi ña alliyashpa,

¹⁹ pungui pushtupi yuracyashca, mana cashpaca yurac puca tucushca ricuricpica, curamanmi ricuchina can.

²⁰ Chaitaca curallatacmi allita ricunga. Shina ricucpica, llullu aichacaman sisu, chai sisupi millma yuracyashca cacpica, curallatacmi: “Mapa ungüimi” ninga. Chai punguica lepra ungüimi.

²¹ Sisu ungüita cura allita ricushpa, chai sisupi mana millma yuracyashca cacpi, llullu aichacaman sisushca cacpi, ashtahuan yanayashpa alliyacucpica, curami canchis punzhacaman huichcashpa churanga.

²² Sisu ungüi cuerpopi mirarishpa caticucpica, curallatacmi: “Caica mapa ungüimi” ninga. Chaica leprami canga.

²³ Ashtahuanpish chai sisu yuracyashpa, mana mirarishca cacpica, curallatacmi: “Mapa illacmi cangui” ninga.

²⁴ Maijan ninapi rupashpa, chai pushtupi yurac puca tucushca ricuricpica,

²⁵ curallatacmi alli ricunga. Sisushca pushtupi millmapish yuracyashca, carapish ucuman sisushca cacpica, lepra ungüimi canga. Lepra ungüita charishcamantami curallatac: “Mapa ungüimi” ninga.

²⁶ Ashtahuanpish cura allita ricushpa, rupashca pushtupi alli tucushca, millmapish mana yuracyashca cacpi, carapish mana ucuman sumirishca cacpica, canchis punzhacamanmi curaca huichcashpa churanga.

²⁷ Canchis punzha tucucpica, curami cutinllatac alli ricunga. Sisu ashtahuan mirarishca cacpica, curallatacmi: “Caica mapa ungüimi” ninga. Chaica lepra ungüimi canga.

²⁸ Sisu ungüi mana mirarishpa, alli tucushpa, carapish yuracyashpa caticushpaca rupashcami canga. Chaica alli tucungami. Shina cacpica, curami paitaca: “Mapa illacmi cangui” ninga. Chaica, rupashca alliyashca señal-llami saquiringa.

Acchapi, barbaspi sisu ungüi ricuricpi, imata ruhuanamanta

²⁹ Caripac, mana cashpaca huarmipac umapi, mana cashpaca barbaspi sisu ungüi llucshicpica,

³⁰ curallatacmi allita ricunga. Chai ungüi llullu aichacaman cacpi, chaipi tiyac millmapish quilluyashpa ñañuyashca cacpica, curallatacmi: “Mapa ungüimi” ninga. Chai ungüica umapi cashpa, barbaspi cashpa, shicshi lepra ungüimi canga.

³¹ Chai ungüita cura allita ricushpa, chai sisu mana ucucaman cacpi, quilluyashca accha mana ricuricpica, chai unguctaca canchis punzhacamanmi huichcashpa churanga.

³² Canchis punzha tucucpica, curami unguctaca alli ricunga. Chashna ricucpica, sisu ungüi mana mirashpa, acchapish mana quilluyashca ricuricpi, chai ungüi mana ucucaman cacpica,

³³ chai pushtuta mana pitishpami, ladocunata pitichinga. Shina ruhuashpaca shicshi ungüihuan cashcamantami canchis punzhacaman huichcashpa churanga.

³⁴ Canchis punzha tucucpica, chai ungüitaca curami alli ricunga. Sisu mana mirarishpa, ucucaman mana cacpica, chai runataca “mapa illacmi cangui” ninga. Chai ungushcaca churanata tacshashpami, mapa illac saquiringa.

³⁵ Mapa illac tucushca quipa, chai shicshi ungüi cuerpopi mirarishca cacpica,

³⁶ curami cutinllatac alli ricunga. Chai ungüi cuerpopi mirarishca cacpica, quilluyashca acchataca ña mana mashcanachu, ashtahuanpish paica mapami canga.

³⁷ Ashtahuanpish shicshi ungüi mana mirarishpa, chai pushtupi yana accha huiñashca cacpica, chai shicshi ungüica alliyashcami canga. Chaimanta mapa illacmi canga. Paitaca curami: “Mapa illacmi cangui” ninga.

³⁸ Maijan caripac, huarmipac cuerpopi yuracyashca sisu ricuricpica,

³⁹ curami alli ricunga. Paipac cuerpopi yuracyashca pushtucunapi asha yanayashca ricuricpica, pucalla granocunallami llucshishca canga. Chai ungushcaca mapa illacmi canga.

⁴⁰ Maijanpac huasha lado accha urmacpica, lluchu umami saquiringa. Shina cashpapish mapa illacmi canga.

⁴¹ Mana cashpaca frente ladomanta urmacpica, lluchu frentemi saquiringa. Shina cashpapish mapa illacmi canga.

⁴² Ashtahuanpish huasha ladomanta cashpa, frentemanta accha urmashca pushtupi yuracyashpa, pucayashpa sisu ricurishpaca lepra ungüimi canga.

⁴³ Shina cacpica, paitaca curallatacmi alli ricunga. Huashaman cashpa, frenteman cashpa, uma carapi lepra ungüilayalla yurac puca sisu punguishca cashpaca,

⁴⁴ lepra ungüihuanmi canga. Chaimanta paica mapami canga. Umapi lepra ungüita charishcamantaca curallatacmi: “Mapa ungüi” ninga.

⁴⁵ Lepra ungüihuan cashpaca, churanapish lliqui, umatapish mana taparishpa shimillata taparishpami: “Mapami cani, mapami cani” nishpa, caparishpa puringa.

⁴⁶ Ungüihuan cashca punzhacunaca sisu mapami canga. Shina mapa cashcamantami carpa huasimanta llucshishpa, pailla carupi causanga.

⁴⁷ Millmamanta ruhuashca, mana cashpaca linomanta ruhuashca churanapi lepra ungüi mapayashca ricuricpi,

⁴⁸ mana cashpaca lino puchca aullishcapi, millma puchca ahuashcapi, carapi, mana cashpaca caramanta ruhuashcapi chai ungüi ricuricpi,

⁴⁹ shinallatac tucui chai ruhuashcacunapi chai verdiyashca, pucayashca ricuricpica, lepra ungüimi canga. Chaitaca curapacmanmi ricuchina can.

⁵⁰ Curami alli ricushpa, chai ungüihuan mapayashcataca canchis punzhacaman huichcashpa churanga.

⁵¹ Canchis punzha tucucpica, chai mapayashcataca curallatacmi alli ricunga. Chai ungüi ima churanapi, lino puchca aullishcapi, millma puchca ahuashcapi, mana cashpaca carapi, mana cashpaca imapish caramanta ruhuashcacunapi ashtahuan mirarishca cacpica, chaica lepra ungüimi canga. Chaicunaca mapami canga.

⁵² Ima churanapi, lino puchca aullishcapi, mana cashpaca millma puchca ahuashcapi, mana cashpaca caramanta ruhuashcacunapi mapa lepra ungüi cashcamantaca tucuimi ninapi rupachina can.

⁵³ Shina cacpipish, cura alli ricucpi, chai mapa ungüi ima churanapi, ahuashca puchcapi, aullishcapi, imapish caramanta ruhuashcacunapi mana mirarishca cacpica,

⁵⁴ chai mapayashcata tacshashpami, canchis punzhata cutin huichcashpa churanga.

⁵⁵ Chai mapa ungüi tiyashcacunata tacshashpa huichcashcataca canchis punzhapimi curallatac alli ricunga. Mapa ungüi mana ashtahuan mirarishca cacpi, mana shuctaclaya tucushpa, chashnallatac cacpica, ninapimi rupachina. Imapish charishcacuna ucu ladoman cashpa, jahua ladoman cashpa tiñirishca cacpica, ismuchic mapami canga.

⁵⁶ Ima charishcacunata tacshashca quipa cura cutin ricushpa, chai ungüi yanayashpa mapayashca ricuricpica, chai churanata, mana cashpaca carata, lino puchca aullishcata, mana cashpaca millma puchca ahuashcata, maipi yanayashca pushtullatami pitina can.

⁵⁷ Churanapi, ahuashcapi, mana cashpaca imapish caramanta ruhuashcapi, chai ungüi mirarishpa ricuricpica, tucuitami rupachina can.

⁵⁸ Ashtahuanpish churanapi, mana cashpaca ahuashcapi, mana cashpaca imapish caramanta ruhuashcapi cac mapa ungüi tacshacpi, tucui anchuricpica, cutinmi tacshana can. Chai quipaca mapamanta chuyayashcami saquiringa» nirca.

⁵⁹ Caicunaca lepra ungüi millma puchcamanta, lino puchcamanta ruhuashca churanapi, aullishcapi, ahuashcapi, caramanta ruhuashca churanapi ricuricpi, chaicunata alli ricushpa, mapa illac cacta, mana mapa illac cacta huillachun mandashcacunami.