LEVÍTICO 11 - Dios Rimashcata Quillcashcami

Micuna animalcunamantapish, mana micuna animalcunamantapish

¹ Mandac Dios Moisestapish, Aarontapish rimashpaca:

² «Israelcunataca: “Cai pachapi tiyac tucui animalcunamantaca caicunatami micuna canguichic.

³ Pallca shilluyuc, libruc animalcunatami micuna canguichic.

⁴ Pallca shilluyuc, mana cashpaca libruc animalcunamantaca caicunatami mana micuna canguichic. Camelloca libruc cashpapish mana pallca shilluyucchu. Chaimanta ama micunguichicchu.

⁵ Conejoca libruc cashpapish mana pallca shilluyucchu. Chaimanta ama micunguichicchu.

⁶ Liebre animalca libruc cashpapish mana pallca shilluyucchu. Chaimanta ama micunguichicchu.

⁷ Cuchica pallca shilluyuc cashpapish mana librucchu. Chaimanta ama micunguichicchu.

⁸ Chai animaltaca ama micunguichicchu, huañushcapipish ama tuparinguichicchu. Mana micunachu.

⁹ Yacupi causac animalcunamantaca alasyuc animalcunatapish, escamayuc animalcunatapish micui pudinguichicmi. Chaicunataca cuchamanta cacpipish, callpac yacumanta cacpipish, micui pudinguichicmi.

¹⁰ Chaica mana alasyuc, mana escamayuc animalcunataca mama cuchamanta cacpipish, callpacuc yacumanta cacpipish, ama micunguichicchu. Chailaya shuctac animalcunatapish ama micunguichicchu.

¹¹ Chaicunaca millana animalcunami, ama micunguichicchu. Huañushca cacpipish, millanami canguichic.

¹² Yacupi causac tucui mana alasyuc, mana escamayuc animalcunataca millanami canguichic.

¹³ Volac animalcunamantaca caicunallatami millashpa mana micuna canguichic: Angatapish, tulluta paquic angatapish, yacupi causac angatapish,

¹⁴ ullachutapish, chaipuralla milano angatapish,

¹⁵ chaipuralla cuervo angatapish,

¹⁶ avestruztapish, chushictapish, gaviotatapish, chaipuralla gavilantapish,

¹⁷ pucutapish, somormujotapish, ibistapish,

¹⁸ calamontapish, pelicanotapish, condortapish,

¹⁹ cigüeñatapish, chaipuralla garzatapish, abubillatapish, mashutapish ama micunguichicchu.

²⁰ Tucui pambata saltashpa puric chuscu chaquiyuc chuspicunatapish millanami canguichic.

²¹ Ashtahuanpish chuscu chaquihuan pambata saltashpa puric, changata pambapi asentashpa puric animalcunamantaca

²² chaipuralla langostacunatapish, chaipuralla grillocunatapish, chaipuralla chipucunatapish micui pudinguichicmi.

²³ Ashtahuanpish pambata saltashpa puric chuscu chaquiyuc animalcunataca millanami canguichic.

²⁴ Chai animalcunapi tuparishpaca mapayanguichicmi. Maijanpish chai huañushca animalcunapi tuparicca tutayangacamanmi mapa canga.

²⁵ Chai huañushca animalcunata maijanpish apashpaca churanata tacshanami. Shinallatac tutayangacamanmi mapa canga.

²⁶ Tucui pallca shilluyuc, mana libruc animalcunaca mana micuna animalcunami. Chai huañushca animalcunapi tuparicca tutayangacamanmi mapa canga.

²⁷ Tucui chuscu chaquiyuc animalcunamantaca tucui shilluhuan sarushpa puric animalcunatami mana micuna canguichic. Maijanpish chai huañushca animalcunapi tuparicca tutayangacamanmi mapa canga.

²⁸ Maijanpish chai huañushca animalta apashpaca, paipac churanata tacshanami. Shinallatac tutayangacamanmi mapa canga. Chai animalcunataca mapa cashcata yuyanguichic.

²⁹ Pambata aisarishpa puric animalcunamantaca caicunatami mana micuna canguichic: Chucurillutapish, ucuchatapish, chaipuralla sapotapish,

³⁰ huagurtapish, cocodrilotapish, lagartotapish, palutapish, camaleontapishmi mana micuna canguichic.

³¹ Pambata aisarishpa puric animalcunamantaca tucui chaicunami mana micuna animalcuna. Maijanpish chai huañushca animalcunapi tuparicca tutayangacamanmi mapa canga.

³² Chai huañushca animal imapi tuparishpaca mapayachinmi. Chaica, caspimanta ruhuashca cashpapish, churana cashpapish, caramanta cashpapish, cushtal cashpapish, trabajana herramienta cashpapish mapayangami. Chaicunataca yacupimi satina canguichic. Shinallatac tutayangacamanmi mapa canga. Chai quipami chuya saquiringa.

³³ Chai huañushca animal aicha allpa mangapi urmashpaca chai ucupi tiyactapish mapayachingami. Chaimantami chai mangataca paquina canguichic.

³⁴ Chai mangapi tiyac yacu ima micunapi tallirishpaca mapayachingami. Shinallatac ima ubiana chai mangapi tiyacpish mapayangami.

³⁵ Chai huañushca animal imapi urmashpaca mapayachinmi. Chashnami jatun hornotapish, uchilla hornotapish mapayachinga. Chaimanta chaicunataca paquishpa ñutuchinami canguichic. Tucui chaicunaca mapami, shinallatac mapami canga.

³⁶ Callpac yacupi, mana cashpaca jundu yacupi urmashpaca mana mapayachinchu. Shina cashpapish, chai huañushca animalpi imapish tuparishpaca mapayangami.

³⁷ Chai huañushca animal ña tarpunalla muyupi urmashpaca, mana mapayachinchu.

³⁸ Ashtahuanpish huañushca animal nuyuchishca muyupi urmashpaca mapayachunmi.

³⁹ Micuna animal huañushcapi, maijan tuparicca tutayangacamanmi mapa canga.

⁴⁰ Maijanpish huañushca animalta micucca paipac churanata tacshanami. Shinallatac tutayangacamanmi mapa canga. Maijanpish huañushca animalta aparishpaca, paipac churanata tacshanami. Shina ruhuashpapish tutayangacamanmi mapa canga.

⁴¹ Pambata aisarishpa puric animalcunataca millanami canguichic. Ama micunguichicchu.

⁴² Pambata aisarishpa, mana cashpaca chuscu chaquihuan, mana cashpaca tauca chaquihuan puric animalcunataca ama micunguichicchu. Pambata aisarishpa, mana cashpaca llucashpa puric animalcunaca mapami.

⁴³ Pambata aisarishpa puric maijan animalpi tuparishpa ama mapayanguichicchu. Chaicunata micushpa, pacta millana tucunguichicman.

⁴⁴ Ñucaca cancunata Mandac, jucha illac Diosmi cani. Chaimanta cancunapish jucha illac caichic. Pambata aisarishpa puric animalcunata micushpa ama mapayanguichicchu.

⁴⁵ Ñucaca cancunata Mandac Diosmi cani. Cancunapac Dios cangapacmi Egipto llactamanta huichai llucchimurcani. Chaimantami cancunapish jucha illac cana canguichic” ningui.

⁴⁶ Tucui cai mandashcacunaca cai pachapi causac animalcunamantapish, volac animalcunamantapish, pamba animalcunamantapish, pambata aisarishpa purin animalcunamantapish,

⁴⁷ maijanlla mapa cashcata, maijanlla mana mapa cashcata, maijanllata micuna cashcata, maijancunata mana micuna cashcata yachachunmi cashca» nirca.