LEVÍTICO 10 - Dios Rimashcata Quillcashcami

Nadab, Abiú juchallishcamanta

¹ Aaronpac churi Nadab, Abiú curacunami incienso rupachinapi ninata japichishpa, Mandac Diospac ñaupapi inciensota rupachicurca. Chashnami manapish Mandac Dios mandacpimi, yanga inciensota churashpa rupachicurca.

² Chaimantami Mandac Diospac ñaupamanta nina llucshishpa, paicunataca rupachirca. Chashnami Mandac Diospac ñaupallapitac huañurca.

³ Chaimantami Moisesca Aarontaca: «Cashna tucunata utcapi Mandac Dios huillashpaca: “Ñucapacman cuchuyamucmanmi ñuca jucha illac cashcata ricuchisha. Israelcunamanmi ñuca sumaimana cashcata ricuchisha” nircami» nirca. Chaimantami Aaronca upalla saquirirca.

⁴ Moisés Aaronpac tio Uzielpac churi Misaeltapish, Elzafantapish rimashpaca: «Cancunapac huauquicunata Diospaclla ucumanta llucchishpa, caruman apangapac shamuichic» nirca.

⁵ Paicuna cuchuyashpaca, Moisés mandashca shinallatacmi chai huañushcacunata paicunapac tunicapi apashpa, carpa huasimanta caruman aparca.

⁶ Moisés Aarontapish, paipac churi Eleazartapish, Itamartapish rimashpaca: «Llaquilla tucushpa, achca cacharishca ama puricuichicchu. Llaquilla cashcamanta ama churanata lliquirichicchu. Pacta cancunapish huañunguichicman. Pacta tucui israelcunahuan Mandac Dios piñarinman. Cancunapac huauqui israelcunami Mandac Dios rupachishca runacunamanta huacangacuna.

⁷ Dios-huan tupana huasi pungumantaca ama anchuringuichicchu. Chashna anchurishpaca huañunguichicmi. Cancunaca aceitehuan cahuishpa, Mandac Diospaclla chicanyachishcami canguichic» nirca. Paicunaca Moisés mandashca shinami ruhuarcacuna.

⁸ Mandac Dios Aaronta rimashpaca:

⁹ «Ñucahuan tupana huasiman yaicungapacca canpish, cambac churicunapish vinota, tragota ama ubianguichicchu. Pacta huañunguichicman. Cai mandashcataca cambac huahua huahuacunapish huiñaitami pactachina can.

¹⁰ Chashnami cancunaca ñucapaclla cashcata, mana ñucapaclla cashcata, imacunalla mapa cashcata, chuya cashcata yachac chayanguichic.

¹¹ Ñuca Moisesman huillashcacunataca tucui israelcunaman yachachinguichic» nirca.

¹² Moisés Aaronpac saquirishca churi Eleazartapish, Itamartapish rimashpaca: «Mandac Diosman cushca grano ofrendaca paipaclla chicanyachishcami. Rupachishca puchuta japishpa, altar ladopi levadura illacta micunguichic.

¹³ Diospaclla chicanyachishca pushtupi micunguichic. Mandac Diosman cushpa, rupachishca puchuca huiñaitami cambac, shinallatac cambac churicunapac canga. Cashnami Mandac Diosca ñucataca mandarca.

¹⁴ Alzashpa cushca pecho aichatapish, changa aichatapish chuyanlla pushtupi canpish, cambac churicunapish, ushicunapish micunguichic. Israelcuna Dios-huan alli tucungapac cushca aichaca cambac, cambac huahua huahuacunapacmi canga.

¹⁵ Diosman cuyuchishpa cushca pecho aichatapish, alzashpa Diosman cushca changa aichatapish rupachina huirahuan tandachishpa, Mandac Diospac ñaupaman apamunguichic. Mandac Dios mandashca shinami, canpish, cambac huahua huahuacunapish tucui causaipi pactachina canguichic» nirca.

¹⁶ Moisesca juchata pichachun Diosman cushca cari chivota ima shina cushcatami tapurca. Chai chivoca ñami rupachishca carca. Chaimantami Moisesca Aaronpac churi Eleazarhuan, Itamarhuan yallita piñarishpaca:

¹⁷ —Juchata pichachun Diosman cushca chivotaca, ¿ima nishpatac chicanyachishca pushtupi mana micurcanguichic? Chai aichaca Diospaclla chicanyachishcami. Chai aichaca israelcunapac juchacunata cancunaman apachishpa, Mandac Dios perdonachunmi curca.

¹⁸ Chai animal yahuartaca mana Diospaclla carpa huasi ucuman apashcanguichicchu. Ñuca mandashca shinami Diospaclla chicanyachishca pushtupi micuna carcanguichic— nirca.

¹⁹ Shina nicpimi, Aaronca Moisestaca: —Riqui, paicunapac juchata pichachun cuna animaltapish, tucui rupachina animaltapish Mandac Diospac ñaupapi rupachishpa, mana allita ruhuashpaca ñucatami llaquichishca. Juchamanta rupachishca animal aichata ñuca micushca cacpica, ¿Diosca cushillachu canman carca?— nirca.

²⁰ Moisesca chai nishcata uyashpami, cushilla saquirirca.