LEVÍTICO 1 - Dios Rimashcata Quillcashcami

Diosman cushpa tucui rupachinamanta

¹ Mandac Dios paihuan tupana huasi ucumanta Moisesta rimashpaca:

² «Israelcunataca: “Cancunapuramanta maijanpish Mandac Diosman animalta cushpaca huagrata, mana cashpaca ovejatami cuna can.

³ Tucui rupachina beci cacpica, imapish mana tucushca cari becitami Mandac Dios-huan tupana huasi yaicunapi rupachina can. Chaipimi Mandac Diosca chashquinga.

⁴ Chai animalpac umapi maquita churashpami huañuchina can. Chashna ruhuacpimi, Mandac Diosca juchacunata pichanga.

⁵ Chai becitaca Mandac Diospac ñaupapimi huañuchina can. Chai beci yahuartaca Aaronpac churi curacunami Dios-huan tupana huasi yaicunapi cac altar jahua muyundipi chirapanga.

⁶ Chai quipaca tucuita rupachina animaltaca huañuchishpami aichataca pitinacuna can.

⁷ Shina ruhuacpica, Aaronpac churi curacunami altarpi ninata japichishpa, yantata churanga.

⁸ Chaimantaca paicunallatacmi chai pitinacushca aichatapish, umatapish, chunzhulli huiratapish altar nina rupacuc jahuapi churanga.

⁹ Chai chunzhullitapish, changa aichatapish yacuhuan jahuashpami, Diosman cushpa tucui rupachina can. Chashna rupachicpimi, Mandac Diosmanca mishquilla ashnanga.

¹⁰ Tucuita rupachingapac ovejata, mana cashpaca chivota apamushpaca, ima mana tucushca cari animaltami apamuna can.

¹¹ Chai animaltaca altar jahua ladopimi Mandac Diospac ñaupapi huañuchina can. Chai yahuartaca Aaronpac churi curacunami altar muyundipi chirapanga.

¹² Chai animal aichataca chai curallatacmi pitinacushpa umatapish, chunzhullitapish, huiratapish, nina rupacuc altar jahuapi churanga.

¹³ Curallatacmi chunzhullitapish, changa aichatapish yacuhuan jahuanga. Chashnami tucuita tandachishpa, altar jahuapi churashpa rupachinga. Chashna tucui rupachicpimi, Mandac Diosmanca mishquilla ashnanga.

¹⁴ Volac animalcunamanta Mandac Diosman cushpa, tucui rupachingapac apamushpaca urpita, mana cashpaca llullu palomatami apamuna can.

¹⁵ Chaitaca curami umata anchuchishpa, altar rupachinga. Yahuartaca altar quingraipimi shutuchinga.

¹⁶ Buchitapish, plumatapish altarmanta inti llucshina ladopi, uchupa shitanapimi shitana can.

¹⁷ Curami alascunata ishcaipi pitinga. Shina pitishpapish mana tucui pitishpami altar jahuapi churashpa rupachinga. Chaimi Mandac Diosmanca mishquilla ashnanga.