LAMENTACIONES 5 - Dios Rimashcata Quillcashcami

Pichcaniqui huacaimanta

¹ Mandac Dioslla, ñucanchic ima tucushcata yuyariyari. Ñucanchicta burlashpa rimacuctaca ricuiyari.

² Ñucanchic allpataca mana ricsishca gentecunami japishca. Huasicunataca shuctac llacta gentecunami charicun.

³ Taita illac huahuacuna shinami canchic. Ñucanchic mamacunapish viudami saquirishca.

⁴ Yacutapish randishpami ubianchic. Yantatapish randishpami charinchic.

⁵ Yugota cungapi churashca shinami llaquita apacunchic. Mana samarishpami shaicushcalla causacunchic.

⁶ Micunata charingapacca Egipto llactapi, Asiria llactacunamanmi maquita chutashpa mañanchic.

⁷ Ñucanchic taitacunaca juchallishpami huañurca. Paicunamantami ñucanchicca llaquita apacunchic.

⁸ Cunanca serviccunacamanmi ñucanchictaca mandashpa llaquichin. Paicunapac maquimanta cacharichicca pi mana tiyanchu.

⁹ Ñucanchic micunataca shitashca pambapi huañuchiccuna chapacucpi, huañunalla shinami apamunchic.

¹⁰ Ñucanchic cuerpoca yallita yarcaimanta rupashpami hornopi rupashca shina yanayarca.

¹¹ Cusayuc huarmicunataca Sionpi carihuan manarac chayarishca solteracunataca Judá llactacunapimi japirishpa llaquichirca.

¹² Mandaccunataca maquipi huatashpami huarcurca. Yuyaccunatapish mana cazurcachu.

¹³ Mosocunataca cutana rumipi cutachunmi churarca. Huambracunaca yalli yantata aparishpami, chai yanta ucullapitac huañushca shina siricurca.

¹⁴ Llacta pungucunapica pushac yuyaccunapish mana ricurinchu. Mosocuna cantashpa tocashcapish ña mana uyarinchu.

¹⁵ Ñucanchic shungupica cushicuica ña mana tiyanchu. Ñucanchic danzaccunaca bailanapac randica, duelopi shinami, llaquilla tucushca.

¹⁶ Ñucanchic umamantaca coronapish urmarcami. ¡Aij, ñucanchiclla, juchallishcamantami cashna llaquipi canchic!

¹⁷ Chaimantami ñucanchic shungupish chiriyashca. Ñucanchic ñahuipish amsayashcami.

¹⁸ Sión urcuca llaquinayaita shitashca urcumi tucushca. Chacal animalcunami puricun.

¹⁹ Mandac Dioslla, ashtahuanpish canca huiñaitami mandangui. Can mandashpa tiyarinaca huahua huahuacamanmi canga.

²⁰ ¿Imamantatac ñucanchictaca huiñaita cungaringui? ¿Imamantatac unaita shitashpa saquingui?

²¹ Mandac Dioslla, ñucanchicta cambacman cutimuchun saquiyari. Can cayacpica, ñucanchicca cutishunllami. Ñaupa huatacunapi ñucanchic causashca shina, cunan punzhacunatapish ruhuaiyari.

²² Chaica, ñucanchictapish cungarishcanguimi. Ñucanchic-huanca yallitami piñarishcangui.