LAMENTACIONES 4 - Dios Rimashcata Quillcashcami

Chuscuniqui huacaimanta Alef

Alef

¹ ¡Curipish ima shinami yanayashca! ¡Sumac curipish ima shinami mapayashca! Diospac huasi rumicunapish, calle esquinacunapimi shic-huashca siricun.

Bet

Bet

² Sionpi causac runacunaca curitapish yalli sumacmi carca. Shina cashpapish, ¡cunanca allpa mangata ruhuacpac callana shinami tucushca!

Guímel

Guímel

³ Chacal animalcunapish, huahuacunata chuchuchinmi. Ashtahuanpish ñuca llactapi causac huarmicunaca shitashca pambapi causac avestruz shinami, huahuata mana llaquic tucushca.

Dálet

Dálet

⁴ Yallita yacunayaihuanmi chuchucuc huahuapac calluca palancarapi llutarirca. Huahuacuna tandata mañacucpica, pi mana cuc tiyanchu.

He

He

⁵ Sumac micunata micuccunaca callepimi yarcaihuan huañucun. Sumac churanahuan huiñashcacunaca mapapimi siricun.

Vav

Vav

⁶ Ñuca llactapi causaccunaca Sodomapi causaccunamanta yalli juchatami ruhuashca. Chai puebloca manapish pi llaquichicpimi, cungailla chingarirca. Chai pueblotaca pipish mana ayudarcachu.

Zayin

Zayin

⁷ Alli nishca runacunaca rasutapish, lechetapish yalli yuranllami carca. Ñahuica coraltapish yalli pucanllami carca. Cuerpoca zafiro rumi shinami carca.

Jet

Jet

⁸ Cunanca cullintapish yalli yanami tucushca. Ñancunapi tupacpipish, pi mana ricsinchu. Carapish tullupi tucui llutarishpami chaquishca caspi shinami saquirishca.

Tet

Tet

⁹ Grano mana pucucpi, yarcaihuan allimanta huañuna shinaca, allimi jatun macanacuipi huañurca.

Yod

Yod

¹⁰ Llactata tucuchicpica, llaquic huarmicunapish quiquin huahuatami yanushpa micurca.

Caf

Caf

¹¹ Mandac Diosca nina japiric shina yallita piñarishpami yallita llaquichishpa pai munashcata ruhuarca. Sionpi ninata japichishpami, callari rumicunacaman tucuchirca.

Lámed

Lámed

¹² Cai pacha jatun mandaccunapish, cai pachapi causaccunapish Jerusalén pungucunata piñaccuna yaicunata mana yuyarcacunachu.

Mem

Mem

¹³ Paicunaman huillaccuna juchallishcamanta, curacuna mana allita ruhuashpa, cashcata ruhuac runacunata huañuchishpa, Jerusalén chaupipi yahuarta jichashcamantami chashnaca tucurca.

Nun

Nun

¹⁴ Ñahui mana ricuc shinami, ñancunata purirca. Paicunapac churanapish yahuarpi cahuirishcami carca.

Sámej

Sámej

¹⁵ Gentecuna paicunata ricushpaca: «¡Mapayashcacuna anchurichic! ¡Anchurichic, ama tuparichicchu!» nishpami caparirca. Caita, chaita miticushpa ricpi, chai llactapi causaccunaca: «¡Caipica mana causai pudinguichicchu!» nircami.

Pe

Pe

¹⁶ Mandac Diosllatacmi caita, chaita shic-huashpa cacharca. Paicunataca mana ashtahuan tigra ricungachu. Curacunatapish mana mancharcachu. Yuyaccunatapish mana llaquircachu.

Ayin

Ayin

¹⁷ Ñucanchicta ayudacta chapacucllapitacmi ñahuipish amsayan. Mana ayudanata pudic llactatami torre jahuaman huichicushpa chapacushcanchic.

Tsade

Tsade

¹⁸ Ñucanchic quiquin calleta ama purichunmi caillapi, chaillapi chapacun. Ñucanchic huañuna punzhaca chayamushcami. Ñucanchic tucurina horasca pactashcami.

Qof

Qof

¹⁹ Ñucanchicta caticcunaca volac angatapish yalli callpaccunami carca. Urcucunata catishpa rishpami shitashca pambapi chaparca.

Resh

Resh

²⁰ Mandac Dios aceitehuan cahuishca jatun mandactapish prezu apancunami. Paica ñucanchicman causaita cuc shinami carca. Ñucanchicca paimantaca: «Shuctac llactacunapac chaupipica paipac ladopimi causashun» nicmi carcanchic.

Shin

Shin

²¹ Uz llactapi causac Edom runacunalla, cushicushpa asicuichiclla. Cancunapish jayacta ubiashpa musparishpami lluchulla siricunguichic.

Tav

Tav

²² Sionpi causaccunalla, cancunata llaquichinaca tucurishcami. Cancunataca jaicapi mana prezu apangachu. Edom llactapi causaccunalla, cancunallatac millaita ruhuashcamanta llaquichicpimi, cancunapac juchacunaca ricuringa.