LAMENTACIONES 3 - Dios Rimashcata Quillcashcami

Quimsaniqui huacaimanta Alef

Alef

¹ Ñucami Dios piñarishpa, llaquichishca runaca cani.

² Ñucatami luzmanta caruyachishpa, pura tutapi pusharca.

³ Piñashpami, cutin cutin paipac maquihuan llaquichirca.

Bet

Bet

⁴ Ñuca aichatapish, ñuca caratapish tucuchishpami, ñuca tullucunatapish paquirca.

⁵ Ñuca muyundipi baluarteta ruhuac shinami yallita llaquichirca.

⁶ Ñaupa huatacunapi huañushcacunata shinami pura tutapi causachun saquirca.

Guímel

Guímel

⁷ Ñucapac muyunditami jarcan. Chaimantami mana llucshi pudini. Ñucata huatashca cadenaca llashacmi.

⁸ Ñuca yallita caparishpa mañacpipish, ñuca mañashcata mana uyasha ninchu.

⁹ Ñuca purina ñancunatapish rumicunahuan jarcashpami, quingu ñancunata ruhuarca.

Dálet

Dálet

¹⁰ Mandac Diosca oso chapacuc shina, león pacallapi chapacuc shinami carca.

¹¹ Shuctac ñanta pushashpami, ñutuchishpa saquirca.

¹² Paipac arcota cacharingapacmi ñucataca señalta ruhuarca.

He

He

¹³ Paipac flechacunataca fuerzahuan shitashpami, ñuca shungupitac shitarca.

¹⁴ Llactapi causaccunapac burlashca, punzhanta asishpa mana alli nishcami carcani.

¹⁵ Mandac Diosca jayacta ubiachic shinami, yallita llaquichirca.

Vav

Vav

¹⁶ Pambaman shitashpami, ñuca quirutaca paquirca. Ñucataca uchupapimi sarurca.

¹⁷ Ñuca shunguca cushi causaita mana charinchu. Cushi causaitaca ñami cungarircani.

¹⁸ Ñucaca: «Causaita cuc samaica chiriyarcami. Mandac Diosta yuyarishpa causanapish tucurircami» nishpami yuyarcani.

Zayin

Zayin

¹⁹ Llaquita apashcatapish, ñucata pi mana ayudashcatapish, jayac ajencota ubiashca shina, llaquita apashcatapish yuyarinimi.

²⁰ Chaicunata yuyarishpami, shungupi chiriyashca shina tucuni.

²¹ Chaicunata ashtahuan ñuca shungupi yuyarishpami, Diosta mañashpa shuyacushalla.

Jet

Jet

²² Mandac Dios llaquic cacpimi, mana tucurishcanchic. Paica ñucanchicta llaquicunllami.

²³ Chai cuyaica cada tutamantami mushucyan. ¡Canca tucuita pactachicmi cangui!

²⁴ Chaimantami paipi shunguta churashpa shuyani. Ñucamanca Mandac Diosca tucuimantami yallimi.

Tet

Tet

²⁵ Mandac Diosca paita shuyashpa, tucui almahuan mashcaccunapacca allimi.

²⁶ Mandac Dios quishpichinata upalla shuyanaca allimi.

²⁷ Huambramanta pacha yugota apacca alli runami.

Yod

Yod

²⁸ Mandac Dios mandacpimi, runaca upalla, pailla tiyacunga.

²⁹ Cumurishpa umata pambapi tupachichun. Chaipica quishpiringapishchari.

³⁰ Chugrichic runaman ñahui ladota ricuchichunlla, camishpa rimashcatapish chasquichunlla.

Caf

Caf

³¹ Mandac Diosca mana huiñaita cungarinchu.

³² Llaquichishpapish pai yallita llaquic cashca shinallatacmi llaquin.

³³ Mana pai munashcamantachu aichayuc runacunataca nanachishpa llaquichin.

Lámed

Lámed

³⁴ Jahua pacha Mandac Diosca tucui llactapi prezucunata sarushpa ñutuchichunpish,

³⁵ paipac ñaupapi runa japinata anchuchichunpish,

³⁶ manapish juchallishca runata llaquichichunpish mana munanchu.

Mem

Mem

³⁷ Mandac Dios mana mandacpica, ¿pitac imata huillanga?

³⁸ ¿Manachu allipish, mana allipish jahua pacha Diosmanta shamunga?

³⁹ Juchamanta llaquichishca runaca, ¿imamantatac llaquirin?

Nun

Nun

⁴⁰ Ñucanchic ima shina causacushcata allita yuyarishpa, Mandac Diospacman cutirishunchic.

⁴¹ Jahua pacha Diosta tucui shunguhuan mañashpa:

⁴² “Ñucanchicca mana cazushpami canta llaquichircanchic. Chaimantami ñucanchic juchataca mana perdonarcangui.

Sámej

Sámej

⁴³ Yallita piñarishpami, ñucanchictaca catircangui. Mana llaquishpami huañuchircangui.

⁴⁴ Ñucanchic mañashcata mana uyangapacmi puyuhuan taparircangui.

⁴⁵ Llactacunapac chaupipica ñucanchictaca mapata shinami ruhuarcangui.

Pe

Pe

⁴⁶ Tucui piñaccunami ñucanchicta mana alli nishpa riman.

⁴⁷ Ñucanchicca manchaihuan cashpami umashcanchic. Jatun llaquihuan tucuchishcami canchic” nichicyari.

⁴⁸ Ñuca llactapi causaccuna yallita llaqui tucushcamantami ñuca ñahuimantaca yacu shina, huiquica urmacun.

Ayin

Ayin

⁴⁹ Pipish mana cushichic tiyacpimi, ñucaca upalla huacacunilla.

⁵⁰ Mandac Dios jahua pachamanta ricungacamanmi huacacushalla.

⁵¹ Cai llactapi causaccunapac ushicuna llaquita apacushcata ricushpami shungu nanacta huacacunilla.

Tsade

Tsade

⁵² Ñucata piñaccunaca manapish juchayuc cacpimi, zhutata shina japinata munarca.

⁵³ Manarac huañucpimi, ñucataca jatun jutcupi shitashpa rumihuan ñitirca.

⁵⁴ Yacu ñuca umata tapacpica: «¡Cunanca huañunimi!» nishpami yuyarcani.

Qof

Qof

⁵⁵ Mandac Dioslla, jatun jutcu ucumantami cambac shutita mañarcani.

⁵⁶ Ñuca mañashcataca uyarcanguimi. Ñuca caparishpa mañashcata uyaiyari.

⁵⁷ Canta ñuca mañacuc punzhaca ñucapacman cuchuyashpami: «¡Ama manchaichu!» nircangui.

Resh

Resh

⁵⁸ Mandac Dioslla, ñuca llaquiricpica, ayudashpa, quishpichircanguimi.

⁵⁹ Mandac Dioslla, ñuca llaquitaca ricushcanguimi. Cashcata ruhuashpa ayudaiyari.

⁶⁰ Ñucata llaquichisha niccuna piñarishpa imata yuyaricuctapish tucuitami ricurcangui.

Shin

Shin

⁶¹ Mandac Dioslla, ñucata rimacushcatapish, ñucata llaquichinata yuyaricuctapish uyarcanguimi.

⁶² Ñucata camishpa rimactapish, punzhanta llaquichinata yuyaricuctapish uyarcanguimi.

⁶³ Paicuna tiyarictapish, jatarictapish ricuiyari. Ñucataca mana alli nishpami burlan.

Tav

Tav

⁶⁴ Mandac Dioslla, paicuna ima mana allita ruhuashca shinallatac llaquichiyari.

⁶⁵ Paicunapac shunguta rumiyachiyari. Paicunata llaquichiyari.

⁶⁶ Mandac Dioslla, catishpa llaquichiyari. ¡Cai pachamanta chingachiyari!