LAMENTACIONES 2 - Dios Rimashcata Quillcashcami

Ishcainiqui huacaimanta Alef

Alef

¹ ¡Mandac Dios yallita piñarishpami Siontaca amsayachirca! Sumac israelcunataca jahua pachamantami cai pachaman urmachirca. Pai piñarishca punzhapica paipac chaqui saruna Siontaca mana yuyarircachu.

Bet

Bet

² Mandac Diosca mana llaquishpami Jacobopac carpa huasicunata urmachirca. Yallita piñarishpami Judá llacta sinchi torrecunatapish urmachirca. Jatun mandactapish, shuctac mandaccunatapish, yangallata ruhuashpami pingaichirca.

Guímel

Guímel

³ Nina japiric shina piñarishpami, israelcunapac fuerzata chingachirca. Piñaccunapac ñaupapipish mana ayudarcachu. Nina japirishpa, muyundita rupachic shinami, Jacobopac aillucunata tucuchirca.

Dálet

Dálet

⁴ Piñac runa shinami, paipac arcocunata cacharirca. Sumac tiyashcacunataca paipac alli maquihuanmi mana ricunayachic runa shina tucuchirca. Nina japiric shina piñarishpami, Sionpi tiyac carpa huasicunataca llaquichirca.

He

He

⁵ Mandac Diosca piñac runa shinami, israelcunataca tucuchirca. Mandashpa tiyana huasicunatapish, macanacuna pircatapish urmachishpami, Judá llactapi causaccunataca yallita llaquichirca.

Vav

Vav

⁶ Paipaclla carpa huasitapish huerta chaupipi cac chucllata shinami tucuchishpami, tandanacuna huasitapish tucuchirca. Mandac Diosllatacmi Sionpac jatun fiestacunatapish, samana punzhacunatapish cungachirca. Nina japiric shina piñarishpami jatun mandactapish, curatapish llucchishpa cacharca.

Zayin

Zayin

⁷ Mandac Diosca paipac altarta shitashpami paipaclla huasitapish millanayachirca. Mandashpa tiyana huasitapish, jatun pircacunatapish urmachichunmi piñaccunapac maquipi churarca. Mandac Diospac huasipica fiesta punzhacunapi shinami, caparinacushca uyarirca.

Jet

Jet

⁸ Mandac Diosca Sión muyundi pircata urmachinata yuyarishpami cordelhuan medishpa, tucui tucurincaman chingachirca. Canzha pircacunatapish, ucu pircacunatapish llaquinayaitami tucuchirca.

Tet

Tet

⁹ Llacta pungucunatapish tigrachishpami, aldabacunatapish polvorca. Jatun mandaccunapish, shuctac mandaccunapish shuctac llactapimi prezu causacun. ¡Mandac Dios mandashcapish mana tiyanchu! Dios ima nishcata huillaccunapish Mandac Dios muscuipi shina ricuchishcata mana huillanchu.

Yod

Yod

¹⁰ Sionpi causaccunata pushac yuyaccunaca pambapi tiyarishpami upalla saquirirca. Llaquirishpa umapi uchupata churashpami, sharpa churanata churarirca. Jerusalenpi causac solteracunapish allpacamanmi cumurirca.

Caf

Caf

¹¹ Ñuca llactapi causac huahuacunapish, chuchucuc huahuacunapish pambacunapi yarcaihuan huañuna shina siricucpimi, yallita huacani. Chashna huacacucllapitacmi huiquipish mana tiyan. Ñuca shungupish cuyurishpa, pambaman urmanalla shina tucun.

Lámed

Lámed

¹² Huahuacunaca mamacunataca: «¿Tandapish, vinopish maipitacyari?» nishpami chugrishca shina, mamapac rigrapi huañucun. Callecunapish siricunmi.

Mem

Mem

¹³ Jerusalenpi causaccunalla, ¿canmantaca imatatac nishayari? ¿Pihuantac cancunataca chimbapurashayari? Carihuan manarac chayarishca soltera shina, Sionpi causaccunalla, cancunata cushichingapacca, ¿imatatac ruhuashayari? Llaquica mama cucha shina jatunmi. Chaitaca, ¿pitac allichingayari?

Nun

Nun

¹⁴ Huillaccunaca llullashpami, muscuipi shina ricushcata huillarca. Ama prezu apachunmi, juchata ruhuashcataca mana huillarca. Chaipac randica llullashpami, muscuipi shina ricunchic nishpa huillarca.

Sámej

Sámej

¹⁵ Ñanta pasaccuna ricushpaca maquita huactashpami burlarca. Jerusalenta ricushpaca, silbashpa umata cuyuchishpami: «¿Cai llactatachu sumacta niccuna carca? ¿Cai llactatachu cai pachapi causaccuna cushicuna llacta niccuna carca?» nirca.

Pe

Pe

¹⁶ Tucui piñaccunami canta mana alli nishpa rimarca. Silbashpa, quirucuna canirishpaca: «¡Paitaca millpuc shinami tucuchircanchic! Ñucanchic munashca punzhaca chayamushcatacmi. Caitaca ricushcanchictacmi» ninacurca.

Ayin

Ayin

¹⁷ Mandac Diosca pai ruhuasha nishcataca pactachishcami. Ñaupa huatacunapi pai huillashca shinami, mana llaquishpa tucui tucuchirca. Piñaccunaca canta ricushpa, burlashpami jatun tucurca.

Tsade

Tsade

¹⁸ Sionpi causaccunalla, shungupi Mandac Diosta caparishpa mañaichicyari. Cancunapac ñahuicunamanta yacu callpacuc shina, huiquita jichashpa, tutapish, punzhapish mana samarishpa huacaichicyari.

Qof

Qof

¹⁹ Jatarishpa tuta cuidangapac yaicuna horaspish caparichicyari. Mandac Diospac ñaupapi yacunayaihuan shina, tucui shunguhuan mañaichicyari. Huahuacunaca yarcaihuanmi ñancunapi huañuna shina siricun. Chaimanta paicunaman causaita cuchun, maquita huichaiman chutashpa, Mandac Diosta mañaichicyari.

Resh

Resh

²⁰ Mandac Dioslla, ricuiyari. ¿Pitatac cashna ruhuashcangui? Huarmicunaca, ¿paicunapac huicsapi huiñashca huahuacunata micungachu? ¿Curapish, can ima nishcata huillacpish, can Mandac Diospac huasillapitacchu huañunga?

Shin

Shin

²¹ Huahuacunapish, yuyaccunapish ñancunapimi huañucun. Solteracunapish, mosocunapish espadahuan chugrichishcami huañurca. Can piñarishca punzhapica mana llaquishpami huañuchircangui.

Tav

Tav

²² Fiestaman cayac shinami, tucui ladomanta llaquichiccunataca apamurcangui. Mandac Dios can piñarishca punzhapica pipish mana causacca saquirircachu. Ñuca cuidashpa huiñachishca huahuacunataca ñucata piñaccunami huañuchirca.