LAMENTACIONES 1 - Dios Rimashcata Quillcashcami

Sión huacashcamanta Alef

Alef

¹ ¡Achca gentecuna causana Jerusalenca shitashcami saquirishca! Tucui llactamanta yalli jatun llactaca viuda huarmi shinami saquirishca. Sumac soltera shina llactaca impuestota pagacmi tucushca.

Bet

Bet

² Tuta yallita huacacpimi, ñahui quingraita huiqui urmacunlla. Tucui paita cuyaccunamantaca pipish mana cushichinchu. Tucui paipac ricsishcacunaca cunanca piñanmi.

Guímel

Guímel

³ Judá runacunataca sinchita servichingapacmi prezu apashca. Paicunaca llactacunapac chaupipi mana samarishpami causacun. Paicunata llaquichiccunaca yallita llaquichicun.

Dálet

Dálet

⁴ Sión fiestaman pipish mana ricpimi, chaiman rina ñancunapish llaquilla siricun. Pungucunapish shitashcami siricun. Curacunapish, solteracunapish llaquihuanmi yallita huacacun.

He

He

⁵ Jerusalenpi causaccunaca Mandac Diosta mana cazurcachu. Chaimantami yallita llaquichirca. Paicunata piñaccunaca mandaccuna tucushca. Paita piñaccunaca cushillami causacun. Huahuacunatapish piñaccunami prezu apashca.

Vav

Vav

⁶ Sionpi cushicunaca tucurishcami. Mandaccunapish taruga quihuata mana tarishpa puric shinami, paicunata piñaccunapac ñaupapi yallita irquiyashca puricun.

Zayin

Zayin

⁷ Jerusalenpi causaccunata prezu apacucpi mana ayudarcachu. Chaimantami ñaupa punzhacunapi sumacta causacushcata yuyarishpa, llaquilla tucuncuna. Chaita paicunata piñaccuna ricushpaca asircacunami.

Jet

Jet

⁸ Jerusalenpica yallitami juchallishcacuna. Chaimantami mapayashpa millana tucushca. Paita utcapi alli niccunaca lluchulla cashcata shinami, mana ricusha nincuna. Chaimantami paica pingashpa ñahuita mana ricuchin.

Tet

Tet

⁹ Churanatapish mapayachircami. Pai huañunataca mana yuyarircachu. Chaimantami paica cungailla urmarca. Pipish paitaca mana cushichircachu. Shina cashpami paica: “¡Mandac Dioslla, ñuca llaquita ricuiyari! ¡Ñucata piñaccunaca yallita jatun tucushcami!” nicun.

Yod

Yod

¹⁰ Sumac charishcacunataca paita piñaccunami quichu rirca. Shuctac llacta gentecuna Diospac huasiman yaicuctapish ricurcami. Diosca chai tandanacuna huasiman ama yaicuchunmi mandarca.

Caf

Caf

¹¹ Tucui gentecunami huacashpa micunata mashcashpa purincuna. Yarcaihuan mana huañungapacmi paicunapac sumac charishcacunata micunahuan cambiarca. Chaimantami: “¡Mandac Dioslla, ñucanchicta mana ricunayachishpa, llaquichiccunata ricuiyari!” nicun.

Lámed

Lámed

¹² Caita pasac maijancunaca, ¿manachu ñucata llaquinguichic? Mandac Dios nina japiric shina piñarishca punzhapi, ¿ñucata llaquichishca shina, llaquita ricushcanguichicchu?

Mem

Mem

¹³ Mandac Diosca jahua pachamanta ninata cachashpami, ñuca tullucunacaman rupachirca. Ñuca purina ñanpi tucllata churashpami huashaman cutichirca. Tucuita tucuchishpa saquishpami, punzhanta llaquihuan saquirca.

Nun

Nun

¹⁴ Mandac Diosmi paipac maquihuan ñuca juchataca yugota shina, ñucapi huatarca. Yugota ñuca cungapi huatashpami, yallita irquiyachishpa llaquichirca. Ñucataca maita mana ati pudipac gentecunapac maquipimi churarca.

Sámej

Sámej

¹⁵ Mandac Diosmi ñucata cuidac sinchi runacunataca ñuca ñaupamanta anchuchirca. Paica, achca soldadocunata tandachishpami, quipa huiñai mosocunata tucuchirca. Mandac Diosmi Judá llactapi causac carihuan manarac chayarishca solteracunataca uvasta sarushpa ñutuchic shina ruhuarca.

Ayin

Ayin

¹⁶ Chaimantami ñucaca huacacuni. Ñuca shunguta causachic shina, cushichicca pipish mana tiyanchu. Chaimantami ñuca ñahuitaca huiqui tapashcalla. Ñucata piñaccuna, ñucata atishcamantami ñuca huahuacunapish shitashca saquirirca.

Pe

Pe

¹⁷ Ayudachun maquita chutacucpipish, Sionpi causaccunataca pi mana cushichinchu. Mandac Diosmi piñaccuna Jacobota muyunacushpa llaquichichun mandarca. Jerusalenpi causaccunaca yallita mapayashpa tucuipac millanami tucurca.

Tsade

Tsade

¹⁸ Mandac Diosca cashcata ruhuacmi. Ñucami pai mandashcacunataca mana cazurcani. Tucui llactapi causaccuna, ñuca llaquita ricuichicyari. Carihuan manarac charishca solteracunapish, mosocunapish prezu japi tucurcami.

Qof

Qof

¹⁹ Ñuca cuyashcacunata ayudachun cayacpica, paicunaca ñucallatami saquirca. Curacunapish, pushac yuyaccunapish, llactallapitacmi huañurca. Yarcaihuan mana huañungapac micunata mashcacushpapish huañurcami.

Resh

Resh

²⁰ Mandac Dioslla, ñuca yallita llaquirishpa, shunguta nanachicuctaca ricuiyari. Canta mana cazushcata yuyarishpami ñuca shunguca yallita llaquirishpa nanacun. Canzhapica espadami gentecunataca tucuchicun. Ucupica huañuillami tiyan.

Shin

Shin

²¹ Ñuca llaquihuan caparishcata gentecuna uyashpapish, pi mana cushichircachu. Can ñucata llaquichishcata ñucata piñaccuna uyashpaca yallitami cushicurca. ¡Paicunapish ñuca llaquita apacuc shina, llaquita apachun, huillashca shina llaqui punzhacunata cachaiyari!

Tav

Tav

²² Paicuna tucui mana allita ruhuashcacunaca cambac ñaupapi ricurichun. Ñuca canta mana cazushpa llaquichishca shinallatac paicunatapish llaquichiyari. Ñucaca yallitami llaquirini. Ñuca shungutapish nananmi.