JUECES 8 - Dios Rimashcata Quillcashcami

Madianitacunata mandaccunata huañuchishcamanta

¹ Efraín aillucuna Gedeonta rimarishpaca: —¿Ima nishpatac madianitacunahuan macanacungapac rishpaca ñucanchicman mana huillac cacharcangui?— nirca. Shina nishpami sinchita rimarirca.

² Chaimantami Gedeonca: —¿Ñuca ruhuashcaca cancuna ruhuashcahuan ricucpica, imatacyari? ¿Manachu Abiezer uvasta pallashca quipa Efraín cutin mashcashpa pallacpi, ashtahuan alli pallaringa?

³ Diosmi madianitacunata mandac Orebtapish, Zeebtapish cancunapac maquipi churashca. ¿Shina cacpica, cancuna ruhuashcahuan ricucpica, ñucaca imatac ruhuashcaniyari?— nirca. Chaita nishca quipami paicunaca Gedeonhuan piñarinataca saquirca.

⁴ Gedeonpish, quimsa patsac gentecunapish, madianitacunata catishpami, Jordán yacuta pasangapac shaicushca chayarca.

⁵ Shina chayashpami, Sucot pueblopi causaccunataca: —Ñucahuan cac gentecunaca shaicushcami. Chaimanta asha tandata caraichic. Ñucanchicca madianitacunata mandac Zeba, Zalmunatami caticunchic— nirca.

⁶ Shina nicpimi, chai pueblopi mandaccunaca: —¿Ñucanchic cambac gentecunaman carangapacca mandac Zebapish, Zalmunapish ñachu cancunapac maquipi?— nirca.

⁷ Shina nicpimi Gedeonca: —Shinaca allimi, Mandac Dios Zebatapish, Zalmunatapish ñuca maquipi churacpica, cancunataca shitashca pambacunapi tiyac cashahuan, cardos-huanmi cuerpota chugrichishpa macasha— nirca.

⁸ Chaimantaca Peniel pueblomanmi huichai rirca. Chaiman chayashpapish, Sucot pueblopi nishca shinallatacmi nirca. Shina nicpica, Penielpi causaccunaca Sucot pueblopi causaccuna nishca shinallatacmi nirca.

⁹ Shina nicpimi, Gedeonca chaipi causaccunataca: —Ñuca macanacuita atishpa cutishpaca, cai torretami tigrachisha— nirca.

Madianitacunapac soldadocunata Gedeón prezushcamanta

¹⁰ Mandac Zebapish, Zalmunapish Carcor pambapimi paicunapac chunga pichca huaranga soldadocunahuan carca. Chai soldadocunallami inti llucshina ladomanta shamuc soldadocunamanta puchurca. Ashtahuanpish patsac ishcai chunga huaranga soldadocunami huañushca carca.

¹¹ Gedeón chaimanta rishpaca, Noba pueblomanta, Jogbeha pueblomanta inti llucshina ladota huichai rishpami, paicuna tiyacuc carpa huasicunaman cungailla yaicushpa macarca. Chai horasca mana paicunapac soldadocunaca cuidacurcachu.

¹² Zebapish, Zalmunapish miticushpami callparca. Shina callpacpipish, cati rishpami madianitacunata mandac Zebatapish, Zalmunatapish japishpa tucui madianitacunapac carpacunapi mai manchaita churarca.

Socottapish, Penieltapish llaquichishcamanta

¹³ Joaspac churi Gedeón macanacushpaca Heres huichaitami cutirca.

¹⁴ Shina cuticushpami, Sucot pueblomanta shuc mosota japishpa, tucuita tapurca. Paimi chai pueblopi mandaccunapac pushac yuyaccunapac shuticunata quillcashpa curca. Chai quillcashcapica canchis chunga canchis caricunami carca.

¹⁵ Chai quipaca Sucot pueblopi causaccunapacman rishpaca: «Riquichic, Zebapish, Zalmunapish caipimi. Paicunamantami ñucanchic-huanca: “¿Ñucanchic cambac shaicushca gentecunaman tandata carangapacca ñachu mandac Zebapish, Zalmunapish cancunapac maquipi?” nishpami burlarcanguichic» nirca.

¹⁶ Shina nishpami, chai pueblota pushac yuyaccunatapish, Sucot pueblopi causaccunatapish shitashca pambapi tiyac cashahuan, cardos-huan macashpa chugrichirca.

¹⁷ Shinallatac Peniel pueblopica jatun torreta urmachishpami, chai pueblopi causaccunatapish huañuchirca.

¹⁸ Chai quipaca Zebatapish, Zalmunatapish tapushpaca: —¿Cancuna Tabor urcupi, huañuchishca runacunaca, imalayatac carca?— nirca. Shina tapucpi paicunaca: —Paicunaca can shinami carca. Shinallatac tucui paicunami jatun mandacpac churicuna shina carca— nirca.

¹⁹ Shina nicpimi Gedeonca: —¡Paicunaca ñuca mamamanta huauquicunami! ¡Mandac Diospac shutipimi nini: Paicunata mana huañuchishca cacpica, ñucapish mana huañuchimanchu!— nirca.

²⁰ Shina nishpa paipac punta churi Jeterta cayashpaca: —Jatari, cai runacunata huañuchi— nirca. Shina nicpipish Jeterca mana huañuchircachu. Chaica huambrarac cashcamantami mancharca.

²¹ Chaimantami Zebapish, Zalmunapish rimashpaca: —Canllatac jatarishpa, huañuchilla. Sinchi runa cashcataca huañuchicpimi, sinchi cashcata yachanchic— nirca. Shina nicpimi, Gedeón jatarishpa espadahuan Zebatapish, Zalmunatapish huañuchishpa, camellocunapac cungapi tiyac sumac lunetacunatapish japirca.

Israelcuna pandarishcamanta

²² Israelcuna Gedeonta rimashpaca: —Can, ñucanchicta madianitacunapac maquimanta quishpichishcamantaca canllatac ñucanchicta mandac tucui. Quipamanca cambac churicuna, cambac nietocuna mandac cachun— nircacuna.

²³ Shina nicpipish Gedeonca: —Ñucapish, ñuca churipish mana mandashunchu. Ashtahuanpish Mandac Diosllami mandanga— nirca.

²⁴ Cutin Gedeón rimashpaca: —Cancunamanca caillatami mañagrini: Tucui mashna macanacuipi japishca zarcillocunata ñucaman cuichic— nirca. (Paicunaca ismaelitacuna cashpami curi zarcillocunahuan carca).

²⁵ Chaimantami paicunaca: —Ari, chaitaca cushicushpa cushunllami— nirca. Shinami pañota tendishpa caishuc chaishuc macanacuipi japishca zarcillocunata shitarca.

²⁶ Chai tucui zarcillocunata tandachicpica, huaranga canchis patsac siclos llashacmi carca. Chaica sumac churanacunata, lunetacunata, sortejascunata, madianitacunata pushaccunapac churanacunata, camellocunapac cungapi apashca sumaccunata cushca jahuami chaita curca.

²⁷ Chai tandashcahuanca Gedeonca shuc efodta ruhuashpami paipac causana Ofra pueblopi churarca. Chai puebloman rishpa, chai Ofra diosta mañashpami israelcunaca huainayarcacuna. Shinami Gedeontapish, paipac familiatapish tucllapi urmachic shina pandachirca.

Gedeón huañushcamanta

²⁸ Shinami madianitacunaca israelcunapac maquipi urmashpa mana ashtahuan jatarirca. Shina cacpimi chai llactapica chuscu chunga huatata Gedeón causacui punzhacunapi cushi causai tiyarca.

²⁹ Joaspac churi Jerobaal nishca Gedeonca paipac huasiman rishpami causarca.

³⁰ Gedeonca achca huarmicunata charishcamantami canchis chunga churicunata charirca.

³¹ Shinallatac Siquem pueblopi causac caishuc huarmipipish huahuata charircami. Chai huahuataca Abimelectami shutichirca.

³² Joaspac churi Gedeonca sumacta yuyacyashpa huañucpimi, abiezeritacunapac pueblopi taita Joás enterrashcapi enterrarca.

³³ Gedeón huañushca quipapish israelcunaca cutinllatacmi Baal dioscunata adorashpa, huainayarcacuna. Chashnami Baal-birit diosta paicunapac dios cachun acllarca.

³⁴ Israelcunaca paicunapac muyundipi causac piñac gentecunapac maquimanta Mandac Dios quishpichishcataca mana yuyarircacunachu.

³⁵ Gerobaal nishca Gedeontapish huasi ucupura causaccunatapish, cai tucui allicunata ruhuashcamantapish mana pagui nircacunachu.