JUECES 7 - Dios Rimashcata Quillcashcami

Gedeón madianitacunata atishcamanta

¹ Jerobaal nishca Gedeonca tucui paihuan caccunandimi tutamanta utca jatarishpa Harod tucyac yacu ladopi carpa huasita shayachishpa tiyarigrirca. Cutin madianitacunapac carpa huasicunaca paicunamanta jahua ladoman cac Moré urcu chaqui jatun pambapimi carca.

² Chaipimi Mandac Diosca Gedeontaca: «Madianitacunata cambac maquipi churangapacca canhuanca yallimana gentecunami. Chashna israelcunaca achca cashpaca: “Ñucanchic alli sinchi cashpami macanacuita mishashcanchic” nishpa, ñucata piñachingacunami.

³ Cunanca, tucui israelcunaman: “Maijanpish manchaihuan chucchucushpaca cutichunlla” nishpa huillachun mandai» nirca. Gedeonca chai gentecunapuramanta chunga huaranga gentecunata saquichishpa, ishcai chunga ishcai huaranga gentecunatami cutichishpa cacharca.

⁴ Ashtahuanpish Mandac Diosca Gedeontaca: «Chairac achca gentecunami. Chaimanta yacu ladoman gentecunata apai. Chaipimi ñucaca imata ruhuanata ricuchisha. Chaipica: “Caimi canhuan ringa” nicpica, paica canhuan ringami. Ashtahuanpish: “Caica mana canhuan ringachu” nicpica, paica mana canhuan ringachu» nirca.

⁵ Gedeón gentecunata yacu ladoman chayachicpica Mandac Diosca: «Maijanpish allcu shina yacuta calluhuan ubiacta shuc ladoman chicanyachingui. Cutin maijanpish cungurishpa ubiaccunataca shuctac ladoman chicanyachingui» nirca.

⁶ Yacuta maquihuan apashpa, calluhuan ubiacca quimsa patsac gentecunami carca. Chaimantaca tucuimi cungurishpa ubiarca.

⁷ Chaipimi Mandac Diosca Gedeontaca: «Cai quimsa patsac gentellahuanmi israelcunata quishpichishpa madianitacunataca cambac maquipi churasha. Caishuccunaca paicunapac quiquin huasicunaman cutichunlla» nirca.

⁸ Chai quimsa patsac gentecunata saquichishpami, caishuc gentecunataca quiquin huasiman cutichun trompetacunata, ima minishtishcacunata saquishpa caya minchacaman nishpa cacharca. Madianitacunapac carpa huasicunaca ura lado pambapimi carca.

Gedeonca madianitacunapac carpa huasicunata pacalla ricugrishcamanta

⁹ Chai tutallatacmi Mandac Dios Gedeontaca: «Jatari, madianitacuna tiyacuc carpa huasicunapi macanacungapac urai ri. Cambac maquipimi paicunataca churarcani.

¹⁰ Canlla rinata manchashpaca canta servic Furahuan,

¹¹ paicunapura imata parlanacucta uyagri. Ashtahuan sinchiyashpa macanacunguillami» nirca.

¹² Madianitacunapish, amalecitacunapish, inti llucshina ladomanta gentecunapish, chai pambapica langostacuna shinami achca carca. Shinallatac camellocunapish mama cuchapi tiyac tiyu shina maita mana yupaipacmi carca.

¹³ Gedeón madianitacunapac carpa huasiman chayashpaca, shuc runa pai muscushcata shuc runaman parlacuctami uyarca. Chai runa parlashpaca: —Riqui, shuc cebada tanda singumushpami, madianitacunapac carpa huasicunata huactarca. Chashna shuc carpa huasita huactashpaca tucui huasicunatami jahuamanta uraiman tucui tigrachirca— nirca.

¹⁴ Shina parlacpimi chai runaca: —¡Cai muscuica israelpura Joaspac churi Gedeonpac espadatami nisha nin. Mana ima shuctac nisha ninchu! ¡Diosmi tucui madianitacunata cai carpa huasicunandi paicunapac maquipi churashca!— nirca.

¹⁵ Gedeón muscushcatapish, chai muscushca imata nisha nicushcatapish uyashpaca Mandac Diostami alli nirca. Quipaca israelcunapac carpa huasicunaman cutishpami: —¡Mandac Diosca ñucanchic maquipimi madianitacunapac carpa huasicunataca churashca. Cunanca jatarishpa jacuchic!— nirca.

Madianitacunata Gedeón mishashcamanta

¹⁶ Shina nishpami Gedeonca quimsa patsac runacunataca quimsapi raquishpa, tucui paicunaman cornetacunata, chushaclla puñu ucupi nina japichishcata charichirca.

¹⁷ Shina charichishpami: «Ñucata ricuichic. Ñuca imatami ruhuani, chaita ruhuanguichic. Ñuca carpa huasicunaman chayashpa, imata ruhuacpica, chaillatatac cancunapish ruhuanguichic.

¹⁸ Ñuca, ñucahuan caccunahuan cornetapi tocacpica, tucui cancunapish carpa huasi muyundipi tocashpa: “¡Mandac Diosmantapish, Gedeonmantapishmi macanacugrinchic!” ninguichic» nirca.

¹⁹ Chashnami chaupi tutacaman cuidaccuna llucshicpi, shuctac cuidaccuna yaicucpi, Gedeonca patsac runacunahuan madianitacunapac carpa huasi canzhaman chayarca. Chaipimi cornetacunapi tocashpa, paicuna aisashca puñucunata paquirca.

²⁰ Chashnami quimsapi raquirishca runacunaca puñucunata paquishpa nina mechacunata lluqui maquihuan japishpa, alli maquihuanca cornetapi tocashpaca: —¡Mandac Diosmantapish, Gedeonmantapishmi macanacugrinchic!— nishpa caparircacuna.

²¹ Israelcunaca carpa huasicuna muyundipimi maimanpish mana rishpa shayacurcacuna. Chaita ricushpami, madianitacunaca manchaihuan caparishpa callparcacuna.

²² Chai quimsa patsac israelcuna cornetapi tocacucpica, Mandac Diosca madianitapurallatatacmi carpa huasicunapi macanacuchirca. Chaimantami madianita soldadocunaca Zerera puebloman rina ñanta rishpa Bet-sita pueblocaman, Tabat pueblohuan Abel-mehola pueblohuan tupanacuicaman miticushpa rircacuna.

²³ Israelcunaca Neftalipac, Aserpac shinallatac Manasespac aillucunahuan tandanacushpami madianitacunataca catircacuna.

²⁴ Chaimantami Gedeonca tucui Efrainpac urcu llactapi huillachun cachashpaca: «Madianitacunahuan tupac shamuichic. Paicuna Jordán yacu lado pambacunata Bet-bara pushtucaman manarac chayacpi japichic» nichun cacharca. Chashna tandanacushpami Efraín aillucunaca Jordán yacu lado pambacunataca Bet-bara pushtucaman japirca.

²⁵ Chashnami israelcunaca madianitacunata mandac Orebta shinallatac Zeebta prezu japircacuna. Shina japishpaca Orebtaca Oreb quingraipi, cutin Zeebtaca uvasta cutana Zeeb pambapimi huañuchircacuna. Shina catishpa huañuchishpaca, Orebpac, Zeebpac umatapish apashpami Jordán yacuta chimbashpa Gedeonpaman apamurcacuna.