JUECES 6 - Dios Rimashcata Quillcashcami

Madianitacuna israelcunata llaquichishcamanta

¹ Israelcuna Mandac Diosta mana allita ruhuashpa piñachishcamantami Mandac Diosca madianitacunapac maquipi canchis huatata churarca.

² Madianitacuna israelcunata yallita llaquichicpimi, paicunaca urcucunapi, machaicunapi, mai pacallacunapi miticurca.

³ Israelcuna imata tarpucpipish, madianitacuna, amalecitacuna inti llucshic ladomanta shamushpami llaquichic carca.

⁴ Paicunata llaquichingapac carpa huasicunata shayachishpami, chai llacta tucui cosechanacunata Gaza pueblocaman tucuchirca. Huagracuna, burrocuna, ovejacuna micunallatapish mana saquishpami tucui tucuchirca.

⁵ Paicunaca huagracunahuan, causana carpa huasicunahuanmi langosta shina shamuc carca. Paicunapish, camellocunapish mana yupaipac shamushpami tucuita indushpa tucuchirca.

⁶ Madianitacunamantami israelcunaca yallita huacchayashpa Mandac Diosta caparishpa mañarca.

⁷ Chashna madianitacuna yallita llaquichicpimi, israelcunaca Mandac Diosta caparishpa mañarca.

⁸ Mandac Diosca shuc huillactami cacharca. Chai huillac rishpaca: «Israelcunata Mandac Diosca: “Ñucami cancunataca Egipto llactapi huatashca shina servishpa causacucta llucchircani.

⁹ Egiptopi causaccunapac maquimantapish, llaquichiccunapac maquimantapish quishpichishpa, paicunata cancunapac ñaupamanta catishpa cachashpami paicunapac allpataca curcani.

¹⁰ Shinallatac: ‘Ñucaca cancunata Mandac Diosmi cani. Cancuna causana llacta amorreocunapac dioscunata ama alli ninguichicchu’ nircani. Shina nicpipish cancunaca mana cazushcanguichicchu” ninmi» nirca.

Gedeón Mandac Diospac angelpac ñaupapi cashcamanta

¹¹ Mandac Diospac ángel rishpaca abiezeritapuramanta Joaspac Ofra pambapi tiyac encina yura ucullapimi tiyarirca. Joaspac churi Gedeonca madianitacunamanta pacangapacmi vinota capina pushtupi trigota huactacurca.

¹² Chaipimi Mandac Dios cachashca ángel ricurishpaca: —¡Sinchita macanacuc runalla, Mandac Diosca canhuanmi!— nirca.

¹³ Shina nicpimi Gedeonca: —¡Ñuca amolla! Mandac Dios ñucanchic-huan cacpica, ¿imamantatac cashna tucunchicyari? ¿Ñucanchic ñaupa taitacuna: “Mandac Diosmi Egiptomanta llucchimurca” nishpa, cai tucui sumacta parlashcaca maipitacyari? Cunanca madianitacunapac maquipimari ñucanchictaca jichushca— nirca.

¹⁴ Mandac Dios paipac ñahuita ricushpa rimashpaca: —Cambac tucui fuerzahuan rishpa, israelcunata madianitacunapac maquimanta quishpichigri. ¿Manachu ñuca cantaca cachani?— nirca.

¹⁵ Shina nicpimi Gedeonca: —Ñuca amitolla, ¿ñucaca ima shinatac israelcunataca quishpichishayari? Ñucaca Manasespac aillupurapica ashalla familiami cani. Chaipac jahuapica ñuca huasi ucupuramantaca ñucami tucuimanta yalli uchilla shina cani— nirca.

¹⁶ Shina nicpimi, Mandac Diosca: —Ñucami canhuanca casha. Canmi madianitacunataca shuclla runata shina atingui— nirca.

¹⁷ Shina nicpimi Gedeonca: —Ñuca cambac ñahuipi alli ricurishca cacpica, canllatac ñucanchic-huan parlacushcata yachangapac shuc señalta ricuchiyari.

¹⁸ Ñuca imallata canman apamushpa, cambac ñaupapi churangacaman caimanta ama ringuichu— nirca. Chashna nicpimi, mandac Diosca: —Shinashpaca can cutingacaman shuyacushallami— nirca.

¹⁹ Shina nicpi, Gedeonca ucuman yaicushpa, shuc malta chivota yanushpa, shuc efa junda harinata japishpa levadura illac tandata ruhuarca. Chashnami aichataca shuc tazapi, caldotaca mangapi churashpa encina yura ladoman apamurca.

²⁰ Shina apamucpimi, Mandac Dios cachashca angelca: —Tandatapish, aichatapish cai rumi jahuapi churashpa caldota talli— nirca. Shina nicpimi, paica chashnami ruhuarca.

²¹ Mandac Diospac angelca pai charicushca taunahuanmi aichapipish, levadura illac tandapipish tupachirca. Shina tupachicpica, nina culun nishpami aichatapish, levadura illac tandatapish tucui rupachirca. Chai quipaca Mandac Diospac angelca paipac ñaupamanta anchurircallami.

²² Gedeón Mandac Diospac ángel cashcata yachac chayashpaca: —¡Taita amitolla! ¡Mandac Diospac angeltami ñahui ñahui ricushcani! ¿Cunanca huañushami?— nirca.

²³ Shina nicpimi, Mandac Diosca: —Mana huañunguichu, ama manchaichu, cushilla cailla— nirca.

²⁴ Chaimantami Gedeonca Mandac Diosman shuc altarta ruhuashpa: “Mandac Diosca cushicuimi” nishpa shutichirca. Chai altarca cunancamanmi abiezeritacunapac Ofra pambapi tiyan.

Gedeón Baal diospac altarta urmachishcamanta

²⁵ Altarta ruhuashca tutallatacmi Mandac Dios Gedeontaca: —Cambac taitapac huagracunamanta shuc huagratapish, quipa shayacuc canchis huatayuc huagratapish apamui. Quipaca cambac taita Baalman ruhuashca altar ladopi tiyac Asera huarmi diosta yuyarina yuratapish tigrachingui.

²⁶ Canta Mandac Diosman chai urcu rumi jahuapi altarta ruhuai. Chaimantaca quipa huagrata apamushpa Asera diosta yuyarina pitishca yura jahuapi churashpa tucui rupachi— nirca.

²⁷ Chaimantami Gedeonca paita serviccunamanta chunga runacunata pushashpa Mandac Dios mandashca shinallatac ruhuarca. Ashtahuanpish paipac taitatapish, chai pueblopi causaccunatapish manchashcamantami tuta chashna ruhuarca.

²⁸ Cayandi tutamanta chai pueblopi cusaccuna jatarishpa ricucpica, Baalpac altarpish, chai ladopi cac Asera huarmi diosta yuyarina yurapish urmachishca shinallatac quipa huagratapish, cunanlla ruhuashca altarpi tucui rupachishcatami ricurca.

²⁹ Chaimantami chai pueblopi causaccuna caishuc chaishuc tapunacushpaca: —¿Pitac caitaca ruhuarcayari?— ninacurca. Chashna tapushpa mashcacushpallatacmi: —Joaspac churi Gedeonmi chaitaca ruhuashca canga— nirca. Chashna ninacushpami pueblopi causaccuna Joastaca:

³⁰ —Cambac churica Baalpac altarta tigrachishcami. Asera huarmi diosta yuyarina yuratapish pitishcami. Chaimanta paita canzhaman llucchi. Paica huañunami can— nirca.

³¹ Chaimantami Joasca paipac ñaupapi caccunataca: —¿Cancunachu Baalmanta shayarishpa misashun ninguichic? Maijanpish Baal diosmanta shayarishpa misacca cunan tutamantallatac huañuchun. Baal ciertotac dios cashpaca paillatac paipac altarta misachun— nirca.

³² Chai punzhallatacmi Gedeontaca Jerobaal nishpa shutichirca. Chaica: “Baal-llatac paipac altarta tigrachishcamanta misachun” nisha ninmi.

Gedeonca Mandac Dios paihuan cashcata yachasha nishcamanta

³³ Chai quipaca tucui madianitacunapish, amalecitacunapish inti llucshina ladopi causaccunapish tandanacushpami Jordán yacuta pasashpa Jezreel pambacunapi carpata shayachishpa tiyarirca.

³⁴ Chaipimi Gedeonta Diospac Espíritu japirca. Trompetapi pai tocacpica, Abiezer aillupuramantami paihuan ringapac shamurca.

³⁵ Shinallatac Manasés aillucunaman huillachun cachacpica, paicunapish shamurcami. Shinallatac Aser, Zabulón, Neftalí aillucunaman huillachun cachacpica, paicunapish tupangapac shamurcami.

³⁶ Shina cacpipish Gedeonca Diostaca: —Can nishca shina israelcunata ñuca maquihuan quishpichigricushcata yachangapacca,

³⁷ trillana pambapimi shuc millmasapa carata tendigrini. Chai carallapi shulla urmashpa jucuchishca, cutin muyundi pambaca chaquishca cacpica, ñuca maquihuan israelcunata quishpichigricushcata yachashami— nirca.

³⁸ Chaica chashnatacmi tucurca. Cayandi tutamanta utca jatarishpa millmasapa carata capishpaca, vaso jundatami shulla yacutaca llucchirca.

³⁹ Shina cacpipish Gedeonca Mandac Diostaca: —Ama ñucahuan piñarichu. Caillahuanmi mañagrini. Caillahuanmi ricugrini. Millmasapa caraca chaquishca cachun, cutin muyundi pambaca shullahuan jucushca cachunmi munani— nirca.

⁴⁰ Chai tutaca Mandac Diosca chashnami ruhuarca. Cayandi tutamanta ricucpica, millmasapa caraca chaquishcami carca. Shina cacpipish, muyundi pambaca jucushcami carca.