JUECES 5 - Dios Rimashcata Quillcashcami

Débora Barac-huan cantashcamanta

¹ Chai punzhami Deboraca Abinoampac churi Barac-huan cantashpaca:

² Israelcunata pushaccuna ñaupashpa rishcamantapish, quiquin munaihuan macanacuiman llucshishcamantapish ¡Mandac Diosta alli nichicyari!

³ Jatun mandaccunapish, quipa mandaccunapish uyaichicyari. Mandac Diostami cantagrini. Israelcunata Mandac Diostami salmocunahuan cantagrini.

⁴ Mandac Dioslla, can Seir urcumanta llucshimucpipish, Edom pambamanta shamucpipish allpaca chucchurcami. Jahua pachamantapish tamya urmarcami. Puyumantapish tamyata shutuchircami.

⁵ Mandac Diospac ñaupapica urcucunapish chucchurcami. Sinaí urcupish israelcunata Mandac Diospac ñaupapica chucchurcami.

⁶ Anatpac churi Samgarpac punzhapi, Jael huarmipac punzhapica, ñanta riccunapish ñanta purinata saquishpami, huishtu ñanta rirca.

⁷ Israelpica uchilla llactacunapish jichushcami saquirirca. Chashnami ñuca Débora jataringacaman jichushca carca. Chashnami ñucaca Débora israelcunapac mama shina jataringacaman chashna carca.

⁸ Israelcuna shuc mushuc dioscunata mashcacucpica, macanacuica pungupi shinami carca. Shina chayamucpica, chuscu chunga huaranga israelcunaca shuc lanzallahuanpish, escudollahuanpish mana carcacunachu.

⁹ ¡Ñucaca tucui shunguhuanmi israelcunata pushaccunata alli nini! Israelcunapuramanta mana manchashpa, macanacungapac llucshiccunatapish alli ninimi. Mandac Diosta allimari cangui ¡nichicyari!

¹⁰ Yurac burropi tiyariccunapish, ñanta puriccunapish, tapices jahuapi tiyariccunapish, ñanta riccunapish yuyarichicyari.

¹¹ Mandac Dios atishcata, huagra ubiana jundu ladopi cantacucta yuyarichicyari. Israel muyundi uchilla llactacunapi causaccunata uyaichicyari. Mandac Diosca israelcunapac pueblo pungumanmi chayamushca.

¹² ¡Deboralla ricchariyari! Riccharishpa sumac cantota Diosman cantaiyari. ¡Abinoampac churi Baraclla, jatarishpa canta piñaccunata prezushpa apaiyari!

¹³ Paicunapac quipataca puchushca gentecunami mandaccunahuan shamunga. Mandac Diospac soldadocunami ñucapacman jatun manchana soldadocunahuan shamurca.

¹⁴ Efraín aillucunamanta amalecitacunahuan causac maijan macanacuc runacunami shamurca. Quipataca can Benjaminmi cambac macanacuc runacunahuan shamurcangui. Maquirmantaca mandaccunami shamurca. Zabulón aillumantaca mandana varata chariccunami urai shamurca.

¹⁵ Cutin Isacar aillu mandaccunami Deborahuanca rirca. Barac shinallatac Isacar aillupish, chaquillahuanmi pambata catirca. Rubén aillupurapica imata ruhuanatami yuyarinacurca.

¹⁶ ¿Ima nishpatac ovejacuna huacacta uyangapac corral ladopi saquircanguichic? ¡Rubenpac aillupurapica imata ruhuanatami yuyarinacurca!

¹⁷ Galaad aillucunaca Jordán yacu chimbapimi causangapac saquirirca. Dan aillucunaca ¿Ima nishpatac barcocuna ladopi saquirirca? Aser aillupish mama cucha ladopimi saquirirca. Barcocuna shayana pueblomantaca mana cuyurishpami chaipi causai callarirca.

¹⁸ Shina cacpipish, Zabulonpac, Neftalipac aillucunaca, huañuita mana manchashpami urcu pambacunaman huichai rirca.

¹⁹ Canaán llactata jatun mandaccunaca Miguido yacu ladopi tiyac Taanac pueblopimi macanacungapac shamurca. Shina macanacushpa atishpapish ima cullquita mana aparcachu.

²⁰ Lucerocunapish jahua cielomanta pachami macanacurca. Paicuna tiyana pushtumantami Sisarahuan macanacurca.

²¹ Cisón huaicu yacumi tucui pichashpa aparca. Ñaupaman tiyac Cisón yacumi aparca. Ñuca almalla, sinchita rilla.

²² Caballocunapac chaquicuna caruman uyarictami callparca. Sinchi soldadocuna chashna callpacpimi cashna uyarirca.

²³ Mandac Diospac angelca: “¡Meroz pueblopi causaccunataca maldiciashca cachun!” nirca. Mandac Dios paipac sinchi runacunata macanacucucpi mana ayudangapac shamushcamanta “sinchita maldiciashca cachun” nirca.

²⁴ Ceneopuramanta Heberpac huarmi Jaelpish tucui huarmicunamanta yalli alli nishca cachun. Carpa huasipi causac huarmipish, tucui huarmicunamanta yalli alli nishca cachun.

²⁵ Sísara yacuta mañacpica, lechetami curca. Jatun mandaccuna ubiana vasopimi leche natasta curca.

²⁶ Lluqui maquihuanca ishtacata alli maquihuanca carpinteropac mazota japishpami Sisarapac umapi ishtacashpa shuc ladoman pasachirca.

²⁷ Jael huarmipac ñaupapimi nanaihuan curparishpa huañushpa chutarircalla.

²⁸ Sisarapac mamaca caspihuan jarcachishca ventanamanta chapashpami: “¿Ima nishpatac paipac carretaca mana shamun? ¿Imamantatac pai macanacuna carretaca quipayan?” nishpami caparishpa tapun.

²⁹ Chaita uyashpami Sisarapac huarmicunamanta maijan alli yachac huarmicunaca:

³⁰ “¿Manachu macanacushpa imata japishca canga? ¿Manachu chaita macanacucpura chaupinacunga? Macanacuc caricunamanmi shuc solterata mana cashpaca ishcaita cada shucman cucunga. Sisaramancarin sumac color churanatami cucunga. Mishaccunamanca tucuilaya shuc shucta, mana cashpaca ishcai ishcaitami bordashca bufanda Sisaramanca cucunga.

³¹ Mandac Dioslla, tucui canta piñaccuna chashna chingarishpa tucurichun. Shinallatac cuyaccunaca inti llucshishpa tucuita achicyachic shina cachun” nishpami cantarca. Chaimanta quipamanca chuscu chunga huatatami israelcunaca cushilla causarca.