JUECES 4 - Dios Rimashcata Quillcashcami

Deborahuan Barac-huan Sisarata mishashcamanta

¹ Aod huañushca quipaca israelcunaca cutinllatacmi Mandac Diospac ñaupapi mana allita ruhuai callarirca.

² Chaimantami Mandac Diosca Canaán llactata jatun mandac Jabinpac maquipi churarca. Paica Hazor pueblopimi mandacurca. Paipac macanacuc runacunata mandacca Sisarami carca. Paica Haroset-goim pueblopimi causarca.

³ Jatun mandac Jabinca iscun patsac fierro carretatami charirca. Shinallatac ishcai chunga huatatami yallita llaquichirca. Chaimantami israelcunaca Mandac Diosta caparishpa mañarcacuna.

⁴ Chai punzhacunapica Lapidotpac huarmi Deborami israelcunataca mandacurca. Paica Dios ima nishcata huillacmi carca.

⁵ Deboraca paipac palma yura ucupimi tiyac carca. Chai yuraca Efrainpac urcupi cac Ramá, Bet-el pueblocuna tupanacuipimi carca. Chaimanmi israelcunaca imapish llaquita allichichun ric carcacuna.

⁶ Débora Neftalí aillucunapac Cedes pueblopi causac Abinoampac churi Baracta cayac cachashpaca: —Israelcunata Mandac Diosca: “Neftalipac, Zabulonpac aillucunamanta chunga huaranga macanacuc runacunata Tabor urcupi tandachi.

⁷ Ñucaca Cisón huaicumanmi Jabinpac macanacuc runacunata, mandac Sisarata carretacunandi apamushpa, cancunapac maquipi churasha” ninmi— nirca.

⁸ Chaipimi Baracca: —Can ñucahuan risha nicpica, rishami, can mana risha nicpica, ñucapish mana rishachu— nirca.

⁹ Shina nicpimi Deboraca: —Ari, ñucaca rishami. Can rishpa macanacuita atishpapish mana canchu alli nishca cangui, ashtahuanpish Mandac Diosca shuc huarmipac maquipi churashpami Sisarataca tucuchinga— nirca. Shina nishpaca, Deboraca Barac-huanmi Cedesman rirca.

¹⁰ Shina rishpami Baracca Zabulonpac aillumantapish, Neftalipac aillumantapish chunga huaranga macanacuc runacunata Cedespi tandachirca. Deborapish paihuanmi rirca.

¹¹ Ceneocunapuramanta Heberca Moisespac suegro Hobabpac huahua huahuacunaca caishuc ceneocunapuramanta raquirinacushca Cedes pueblo ladopi cac Zaanaim pambapi tiyac encina yura cuchupimi carpa huasita shayachishpa tiyacurca.

Sisarapac soldadocunata mishashcamanta

¹² Sisaraca Habinoampac churi Barac Tabor urcuman rishcatami yacharca.

¹³ Chaimantami Sisaraca paipac iscun patsac fierro carretacunata, tucui paihuan cac gentecunatapish Haroset-goim pueblomanta Cisón yacucaman tandachirca.

¹⁴ Chaimantami Deboraca Baractaca: «¡Jatari, cunan punzhami Mandac Diosca Sisarata cambac maquipi churagrin. Mandac Diosca cambac macanacuc runacunapac ñaupatami ricun!» nirca. Baracca chunga huaranga macanacuc runacunata catichishpami, Tabor urcumanta shamurca.

¹⁵ Chaipica Mandac Diosmi Baracpac ñaupapi Sisarataca carretacunandi, paipac macanacuc runacunandi espadahuan chugrichishpa tucuchirca. Chaipimi Sisaraca carretamanta uricushpa chaquillahuan miticushpa callparca.

¹⁶ Chashna callpacpimi, Baracca Haroset-goimcaman cati rishpa, Sisarapac carretacunatapish, macanacuc runacunatapish shucllatapish mana saquishpa tucui tucuchirca.

Sisarata huañuchishcamanta

¹⁷ Sísara chaquillahuan rishpaca, ceneocunapuramanta Heberpac huarmi Jaelpac carpa huasipimi miticugrirca. Chai punzhapica Hazor pueblota jatun mandac Jabinhuan ceneopuramanta Heberhuanca alli apanacucmi carca. Chaimantami Jaelpac huasipi miticugrirca.

¹⁸ Shina chayacpimi, Heberpac huarmi Jael tupangapac llucshishpaca: —Amito, caita yaicumui, ñucapacman cuchuyai, ama manchaichu— nirca. Chashna Sisarata yaicuchishpami catachishpa samachirca.

¹⁹ Shina ruhuacpimi paica: —Yacunayaihuanmi cani, asha yacuta carai— nirca. Shina nicpimi, cara capachuta pascashpa ashata ubiachishpa, cutinllatac catachirca.

²⁰ Sisaraca: —Canca, cai carpa huasi pungullapi shuyai. Maijan shamushpa: “¿Maijan cai ucupichu?” nicpica: “Pi mana caipichu” ningui— nirca.

²¹ Sísara shaicushca cashcamanta yallita sueñucucpimi, Heberpac huarmi Jaelca carpa huasi shayachina ishtacata apashpa, ringri ladopi churashpa allpacaman pasacta ishtacarca. Chashnami Sisarataca huañuchirca.

²² Barac Sisarata catishpa chayacpica, Jael huarmi llucshishpaca: —Shamui, can mashcacushca runata ricuchisha— nirca. Shina nicpi, Barac paihuan yaicushpaca Sisarataca umapi allpacaman ishtacashca huañushca siricuctami ricurca.

²³ Chashnami Mandac Diosca Canaán llactata jatun mandac Jabintaca israelcunapac ñaupapi llaquichirca.

²⁴ Israelcunaca Canaán llactata jatun mandactaca tucuchingacamanmi ashtahuan ashtahuan llaquichirca.