JUECES 3 - Dios Rimashcata Quillcashcami

Canaán llactapi gentecuna saquirishcamanta

¹ Macanacunata manarac yachac Canaanpi causac israelcuna Diosta yuyaricta, mana yuyaricta ricungapac Mandac Diosca saquishca llactacunaca caicunami:

² Manarac macanacuita yachac israelcuna yachacuchun, shinallatac huahua huahuacunaman macanacunata yachachichunmi saquirca.

³ Chai llactacunaca caicunami: Filisteocunamantaca pichca pushaccuna, tucui cananeocuna, Líbano urcu llactapi causac sidoniocunapish, heveocunapish cancuna. Paicunapac llactaca Baal-hermón urcumantaca Hamat pueblocamanmi carca.

⁴ Chai llactacunataca israelcunapac taitacunaman Mandac Dios Moisesta huillachishca mandashcacunata pactachicta, mana pactachicta ricungapacmi saquirca.

⁵ Shina cashcamantami israelcunaca cananeocunahuan, heteocunahuan, amorreocunahuan, ferezeocunahuan, heveocunahuan, jebuseocunahuan causarca.

⁶ Chashna causashpami, israelcunaca paicunapac ushicunahuan cazararca. Shinallatac israelcunapac ushicunapish chai gentecunahuan cazarashpa, paicunapac diosta adorarcacuna.

Otoniel Cusan-risataimta atishcamanta

⁷ Israelcunaca Mandac Diospac ñaupapi mana allita ruhuashpami paicunata Mandac Diosta cungarishpa Baal dioscunata, Aserami diosman ricchacunata servircacuna.

⁸ Chaimantami Mandac Diosca nina japiric shina piñarishpa, israelcunataca Mesopotamia llactata mandac Cusan-risataimpac maquipi churarca. Chaipimi paicunaca pusac huatata servirca.

⁹ Israelcuna chashna llaquita apashpa Mandac Diosta caparishpa mañacpimi, Mandac Diosca chai llaquimanta llucchirca. Chai llaquimanta llucchicca Cenazpac churi Calebpac quipa huauqui Otonielmi carca.

¹⁰ Otonielca Mandac Diospac Espíritu japicpimi, israelcunapac juez tucushpa macanacungapac llucshirca. Mandac Diosca Siria llactata jatun mandac Cusan-risataimta paipac maquipi churacpimi, Cusan-risataimtaca atirca.

¹¹ Chashnami chai llactapi causaccunaca chuscu chunga huatata cushilla causarca. Quipataca Cenazpac churi Otonielca huañurcami.

Moabitacuna israelcunata llaquichicucpi Aod atishcamanta

¹² Israelcunaca cutinllatacmi Mandac Diospac ñaupapi mana allita ruhuai callarirca. Chaimantami Mandac Diosca israelcunata llaquichichun Moab llactata mandac Eglonta sinchiyachirca.

¹³ Chai mandacca amonitacunata, amalecitacunata tandachishpami israelcunataca huañuchirca. Chashna atishpami, palmacuna tiyac pamba pueblotaca tucui japirca.

¹⁴ Chaimantami israelcunaca chunga pusac huatata jatun mandac Eglonta servishpa causarcacuna.

¹⁵ Chashna llaquita causacushpami israelcunaca Mandac Diosta caparishpa mañarca. Shina mañacpimi, Mandac Diosca chai llaquimanta llucchichun Benjamín aillumanta Gerapac churi imatapish lluquihuan ruhuac Aodta churarca. Paitami israelcunaca Moab llactata jatun mandac Eglonman shuc convidanata cugrichun cacharca.

¹⁶ Aodca chaupi metro ishcai filoyuc espadatami ruhuashca carca. Chai espadatami paipac churana ucuta alli lado cinturapi huarcuchishpa rirca.

¹⁷ Shina rishpami, Moab llactata mandac Eglonman convidanata cugrirca. Eglonca yalli huira runami carca.

¹⁸ Mandac Eglonman convidanata cushca quipaca paihuan shamuc gentecunataca caya minchacaman nishpami cacharca.

¹⁹ Ashtahuanpish ruhuashcalla dioscuna tiyac Gilgal pueblo cuchumanta cutishpami Eglontaca: —Jatun mandaclla, canmanca shuc pacalla huillanatami charini— nirca. Shina nicpimi paica: —¡Upallai!— nirca. Chai quipami, Eglonca tucui paihuan caccunataca canzhaman llucchichun mandarca.

²⁰ Rupai punzhacunapi llandurina ucupi mandac Eglón tiyacucpimi Aodca: —Can jatun mandacmanca Diosmanta huillanatami charini— nirca. Chashna nicpimi, Eglonca pai tiyacushcamanta jatarirca.

²¹ Shina jataricpimi, Aodca lluqui maquihuan alli lado cinturamanta espadata llucchishpa huicsapi satirca.

²² Shina saticpimi, espadaca cabondi huicsapi tucui yaicurca. Mandac Eglón yalli huira cacpimi, espada tucui pambarirca. Chaimantami Aodca espadata mana llucchishpa, chaillapitac saquirca. Shina cacpica mapapish llucshircami.

²³ Quipaca Aodca Eglón llandurina ucumanta llucshishpami, pungutapish huichcashpa, aldabashpa corredorman llucchirca.

²⁴ Aod llucchishca quipaca mandac Eglonta serviccuna shamushpami pungucuna huichcashca, aldabashca cacta ricurca. Chaita ricushpami: «Cai llandurina ucullapitacmi jatun mandacca mapayachicunga» yuyarca.

²⁵ Chashnami unaicaman shuyacurcalla. Ña unaita shuyacushpallatacmi punguta mana pascacpi, llaveta japishpa, punguta pascashpa yaicurca. Shina yaicushpaca jatun mandac Eglón ucu pambapi huañushca siricuctami tarirca.

²⁶ Chashna paicuna shuyacucpica, Aodca ñami miticushpa callpashca carca. Paica Gilgal pueblo cuchullapi tiyac dioscuna tiyana pambata pasashpami Seirat pambapi miticurca.

Aod moabitacunata atishcamanta

²⁷ Aod chaiman yaicushpaca Efrainpac urcupimi cornetapi tocarca. Chashna tocacpimi, israelcunaca Aodhuan urcumanta urai shamurca. Paica israelcunata ñaupashpami shamurca.

²⁸ Chaipimi Aodca paicunataca: «¡Ñucata catichiclla! Mandac Diosmi ñucanchicta piñac moabitacunata ñucanchic maquipi churashca» nirca. Shina nicpimi, Aodta catishpa rishpaca Moab puebloman rina ñan Jordán yacupi chapashpa, pita mana pasachirca.

²⁹ Chai punzhapica macanacunata alli yachac alli sinchi chunga huaranga moabitacunatami huañuchirca. Shinami shucllatapish mana atichishpa tucui huañuchirca.

³⁰ Chai punzhapica moabitacunaca israelcunapac maquipimi yaicurca. Chai quipaca pusac chunga huatatami cushilla chai llactapica causarca.

Filisteocuna israelcunata llaquichicucpi Samgar llucchishcamanta

³¹ Aod huañushca quipaca Anatpac churi Samgarmi sucta patsac filisteocunata huagrata tucsina puyahuan huañuchirca. Chashnami paipish israelcunataca chai llaquimanta llucchirca.