JUECES 21 - Dios Rimashcata Quillcashcami

Israelcuna Benjamín aillucunata llaquichishcamanta

¹ Israelcuna Mizpa pueblopica: «Ñucanchicpuramantaca ñucanchic ushitaca Benjamín aillucunahuan cazarachunca pipish mana cushunchu» nishpami Diospac shutipi ari nishca carca.

² Chaimantami israelcunaca Bet-el puebloman rishpa, chishiyangacaman Mandac Diospac ñaupapi caparishpa huacashpaca:

³ —Israelcunata Mandac Dioslla, ñucanchic israelcunapurapica shuc aillu illanmi. ¿Ima nishpatac Israelpica chashna tucurcayari?— nircacuna.

⁴ Cayandi punzha israelcuna utca jatarishpami, shuc altarta ruhuashpa animalta Diosman cushpa tucui rupachircacuna. Shinallatac Dios-huan alli tucungapacpish animalcunata curcacunami.

⁵ Chai quipami israelcunaca: «¿Tucui Israel aillumantaca maijantac Diospac tandanacuimanca mana shamurca?» nishpa tapurcacuna. Paicunaca: «Mizpa puebloman maijanpish mana ricca huañungatacmi» nishpami Diospac shutipi ari nishca carcacuna.

⁶ Israelcunaca, paicunapac huauqui Benjamín aillumantami munai llaquirirca. Shina llaquirishpaca: «¡Cunanca, israelcunapuramanta shuc aillu chingarishcami!

⁷ Ñucanchicca: “Ñucanchic ushitaca Benjaminpac aillucunahuan cazarachunca mana cushunchu” nishpami, Mandac Diospac shutipi ari nircanchic. ¿Chai saquirishca Benjamín aillucunaman huarmicunata cungapacca imatatac ruhuashun?» nircacuna.

⁸ Shinallatac paicunaca: «¿Israel aillupuramanta maijan aillu cai Mizpa puebloman Mandac Diospac ñaupaman mana shamushpa saquirishcangachu?» nishpa tapurca. Jabes-galaad llactapi causaccunaca shucllapish chai tandanacuimanca mana rishcachu carca.

⁹ Israel aillucunata yupacpica, Jabes-galaad llactamantaca pipish mana chaipichu carca.

¹⁰ Chaimantami chai tandanacushca gentecunaca chunga ishcai huaranga alli sinchi runacunata cacharca. Paicunataca: «Riquichic, Jabes-galaad llactapi causaccunataca huarmicunatapish, huahuacunatapish espadahuan huañuchigrichic.

¹¹ Chaiman chayashpaca, tucui caricunata, carihuan chayarinacushca huarmicunatapish huañuchinguichic» nishpami cacharcacuna.

¹² Jabes-galaad llactapi causaccunapurapica carihuan manarac chayarishca huarmicunataca chuscu patsactami tarirca. Paicunatami Canaán llactapi cac Silo pueblopi cac carpa huasiman apamurcacuna.

¹³ Chai quipami tandanacushca israelcunaca Rimón quingraipi tiyacuc Benjamín aillucunamanca: “Cunanca alli tucushun” nichun huillaccunata cacharca.

¹⁴ Chashna cachacpimi, Benjamín aillucunaca cutirca. Paicunamanmi Jabes-galaad llactapi huañuimanta saquirishca huarmicunata cazarachun curca. Shina cacpipish mana tucuiman pactarcachu.

¹⁵ Mandac Dios israelcunapurapi shuc ailluta anchuchishpa chushacllata saquishcamantami israelcunaca munai llaquirirca.

¹⁶ Chaimantami chaipi tandanacushcata pushac yuyaccunaca: «Benjamín aillupurapica huarmicunaca mana tiyanchu, tucurishcami. Chai saquirishca Benjamín aillucunaman huarmicunata cungapacca ¿Imatatac ruhuashun?» nircacuna.

¹⁷ Shinallatac: «Israelcunapurapi Benjamín aillucuna ama chingarichunca chai saquirishca Benjamín aillucunallatac chai allpata japishpami alli canga.

¹⁸ Shina cacpipish, ñucanchicca ñucanchic ushicunata mana cui pudinchicchu— nirca. Israelcunaca: “¡Maijanpish Benjamín aillucunaman cazarachun ushita cucca mana alli nishcami canga!” nishcami» nishpami, Diospac shutipi ari nishca carca.

¹⁹ Israelcunaca: «Riquichic, huatantami Silo pueblopi Mandac Diosman shuc fiesta ruhuancuna. Silo puebloca Bet-el pueblomanta jahuamanmi saquirin. Bet-elmanta Siquemman rina ñanta, inti llucshina ladoman Lebona pueblomantaca ura ladomanmi can» nirca.

²⁰ Chaimantami Benjamín aillucunataca: «Silo puebloman rishpa uvas chagrapi miticushpa chapaichic.

²¹ Chaipica, Silo pueblomanta solteracuna muyushpa bailangapac llucshicucpica, cancunapish uvas chagramanta llucshishpa cada shuc, shuc solterata shuhuashpa Benjamín llactaman apamuichic.

²² Cutin solteracunapac taitacuna, mana cashpaca turicuna ñucanchicta imatapish nic shamucpica: “Ñucanchicca macanacushpapish mana tucui paicunaman solteracunataca tarircanchicchu. Cai ushicunataca mana cancunapac maquihuanchu cushcanguichic. Chaimanta mana juchayucchu tucunguichic. Cai solteracunata paicunaman cazarachun cuichicllayari” nishunllami» nirca.

²³ Shina nicpimi, Benjamín aillucunaca chai bailacucpuramanta cada shuc, shuc solterata shuhuashpa aparca. Chai quipaca quiquin llactaman cutishpami, cutinllatac pueblocunata ruhuashpa causai callarirca.

²⁴ Israelcunapish chaimantaca quiquin llactaman, quiquin aillupacman, quiquin familiacunapacmanmi cutircacuna.

²⁵ Chai huatacunapica Israel llactapica mana jatun mandac tiyarcachu. Chaimantami paicunaca quiquin munashcata ruhuashpa causarcacuna.