JUECES 18 - Dios Rimashcata Quillcashcami

Dan aillucuna Micaías curata japishcamanta

¹ Chai punzhacunaca Israel llactapica jatun mandacca mana tiyarcachu. Shinallatac Dan aillupish, Israel aillupurapica paicuna causangapac allpataca manarac japircachu. Chaimantami chai punzhacunapica maipi causanata mashcacurca.

² Shina mashcacushpami Dan aillupac miraicunaca pichca runacunata allpata ricushpa, ricsishpa shamuchun cacharcacuna. Paicunaca Zora pueblomanta, Etaol pueblomanta paicunapac aillupura alli sinchi runacunatami cacharca. Chashna cachashpaca: —Chai llacta ima shina cashcata ricumugrichic— nirca. Chai runacunaca Efraín urcuman chayashpami Micaiaspac huasipi pacarirca.

³ Micaiaspac huasi ladopi cashpami chai runacunaca levita mosotaca rimashcapi ricsircacuna. Chashna ricsishpami paipacman cuchuyashpaca: —¿Pitac cantaca caiman apamurca? ¿Imatatac caipica ruhuacungui? ¿Imatac ruhuangapactac caiman shamurcangui?— nishpa tapurcacuna.

⁴ Shina tapucpi paica: —Micaiasca allicunata parlanacushpami cura cachun caipi saquichirca— nirca.

⁵ Shina nicpimi, chai runacunaca: —Ñucanchic ricushcaca alli cashcata yachangapac Taita Diosman tapushpa cuiyari— nirca.

⁶ Shina nicpimi, chai curaca: —Cancunata Mandac Diosmi cuidashpa pushacun, ama manchashpa cushilla richiclla— nirca.

⁷ Chashna rishpami chai pichca runacunaca Lais puebloman chayarca. Chaiman chayashpami chai gentecunataca Sidón pueblopi causaccuna shina cushilla ima llaqui japinata mana manchashpa, yangalla causaccunata ricurca. Chai llactapica pi llaquichicpish, pi mana allita ruhuacpish mana tiyarcachu. Sión pueblomanta carupimi causarcacuna. Pihuan ima rimanacunatapish mana charircacunachu.

⁸ Paicuna Zora puebloman, Etaol puebloman cuticpimi paicunapac huauquicunaca: —¿Ima tiyanchu?— nishpa tapurcacuna.

⁹ Shina tapucpi paicunaca: —¡Chai allpataca ricugrircanchicmi. Chai allpaca sumacmi cashca. Chaimanta jatarishpa chai allpata quichungapac huichai rishunchic! Cancunaca ima nishpatac casilla saquiringuichic. Chai llactata ñucanchic japingapac utca jacuchiclla. Ama upalla saquirichicchu.

¹⁰ Chai llactaman chayashpaca ima llaquitapish mana yuyarishpa causac gentecunapacman chayashpami, achca allpata ricunguichic. Chai allpatami Taita Diosca ñucanchic maquipi churashca. Chai llactapica tucui cai pachapi tiyacmi tiyan.

Danpac aillucuna Levitata apashcamanta

¹¹ Shina nicpimi Zora, Estaol pueblomanta Dan aillucunaca sucta patsac soldadocunahuan macanacungapac macanacunata apashca llucshirca.

¹² Shina huichai rishpa Judá llacta Quiriat-jearim pueblopimi inti tigrana ladoman carpa huasicunata shayachishpa tiyarircacuna. Chaimantami cunan punzhacaman chai pambaca Dan aillupac carpa huasicuna shayachina pamba shuti can.

¹³ Chaimanta rishpaca Efraín urcuta rishpami Micaiaspac huasiman chayarca.

¹⁴ Chaiman chayashpaca Lais llacta muyundita ricungapac ric pichca runacuna paicunapac huauquicunaman parlashpaca: —Caipica shuc efodpish huasipi charina dioscunatapish, cullquita yacuyachishpa, caspita llacllashpa ruhuashca diospish tiyanmi. Chaicunataca ¿Imatatac ruhuagringuichic?— nirca.

¹⁵ Chaiman rishpaca Micaiaspac huasipi causac levita mosopacman cuchuyashpami saludarca.

¹⁶ Danpac aillumanta sucta patsac soldadocunaca macanacunata apashcami pungu yaicunapi shayacurcacuna.

¹⁷ Chai levita cura macanacuna apashca sucta patsac soldadocunahuan pungu yaicunapi shayacucpica llactata puringapac ric pichca soldadocunaca Micaiaspac huasiman yaicushpami huasipi charina dioscunatapish, cullquita yacuyachishpa, caspita llacllashpa ruhuashca diostapish, aparca.

¹⁸ Shinami chai runacunaca Micaiaspac huasiman yaicushpa huasipi charina dioscunata, cullquita yacuyachishpa, caspita llacllashpa ruhuashca diostapish, efodtapish, apacucta ricurca. Shina ricushpami chai curaca: —¿Imatatac ruhuacunguichic?— nirca.

¹⁹ Shina nicpimi paicunaca: —¡Cambac shimita maquihuan jarcarishpa upallai! Ñucanchic taita shina, cura cangapac ñucanchic-huan jacu. ¿Canmanca shuc runapac huasillapi, mana cashpaca shuc aillupac, mana cashpaca Israel aillupac cura canachu alli?— nircacuna.

²⁰ Shina nicpimi, chai curaca tucui shunguhuan cushichishpa efodtapish, huasipi charina diostapish, cullquita yacuyachishpa, caspita llacllashpa ruhuashca diostapish apashpa, paicunapac chaupita rirca.

²¹ Chashnami huahuacunatapish, huagracunatapish, tucui charishcacunataca ñaupachishpa cutin puri callarircacuna.

²² Danpac aillucunaca ña Micaiaspac huasimanta caruyacpimi, Micaiaspac huasi cuchupi causaccunaca tandanacushpa, Danpac huahuacunata catircacuna.

²³ Chashna rishpa Danpac aillucunata caparicpimi, paicunaca tigrarishpa Micaiastaca: —¿Ima nishpatac cai tucui gentecunata tandachircanguichic?— nirca.

²⁴ Shina nicpimi Micaiasca: —Ñuca ruhuashca dioscunatapish, ñucapac curatapish cancuna apacpica, ¿Ñucamanca imatac saquirin? ¿Chashna apashca jahuachu cancunaca: “¿Imatac tucunguichic?” nishpa tapunguichic?— nirca.

²⁵ Shina nicpi, Danpac aillucunaca: —¡Caitaca ñucanchicpurapi mana ninachu canguichic! Upalla cai. Pacta ñucanchicpuramanta maijan yallita piñarishpa cantapish, cambac familiacunatapish tucuchinman— nirca.

²⁶ Dan aillucuna yallita sinchi runacuna cacta ricushpami, Micaiasca paipac huasiman cutirca. Cutin Danpac aillucunaca cutinllatac puri callarircacunami.

Dan aillupuramanta curacuna tucushcamanta

²⁷ Danpac aillucunaca Micaiaspac ima charishcacunatapish, curatapish apashpa rishpaca Lais pueblomanmi chayarca. Chaipi causac gentecunaca ima llaquitapish mana yuyashpami cushilla causacurca. Chaiman Danpac aillucuna chayashpami espadahuan huañuchishpa pueblopica ninata churarca.

²⁸ Lais pueblo Sidón pueblomanta carupi cacpi, shuctac pueblocunahuan mana ricsinacuc cacpimi paicunataca pi mana ayudac shamurca. Chai puebloca Bet-rehob pueblo cuchullapi tiyac pambapimi carca. Quipaca cutinllatac chai pueblota shayachishpami chaipi causai callarircacuna.

²⁹ Chai pueblotaca paicunapac taita Danta yuyarishpami Danta shutichircacuna. Shina cacpipish utcamanca Lais shutimi carca. Danca Israelpimi huacharirca.

³⁰ Chai pueblopimi Danpac aillucunaca alli ningapac caspita llacllashpa diosta ruhuarcacuna. Paicunapac cura cachunca Moisespac churi Gersón runapac churi Jonatantami cura cachun churarca. Chashnami paipish, paipac churicunapish Danpac aillucunamantaca israelcunata prezu apai punzhacunacaman cura carca.

³¹ Chashnami paicuna alli ningapac Micaías ruhuashca diosta Diospaclla carpa huasi Silo pueblopi tiyashca punzhacunacaman chaipi charircacuna.